(ෂේන් සෙනෙවිරත්න)
කටුගස්තොට ශාන්ත අන්තෝනි ක්‍රීඩාංගනයේදී ආරම්භ වූ ත්‍රිත්ව ශාන්ත අන්තෝනි 106 වැනි ‘කන්ද උඩ රට නිල් මහ හටන’ මහ ක්‍රිකට් තරගයේ ප්‍රථම දිනයේදී පන්දුවට පහර දුන් ත්‍රිත්ව විදුහල දිනය නිමාවට පත්වන විට සිය පළමු ඉනිම වෙනුවෙන් කඩුලු 4 ක් දැවී ලකුණු 222 ක් ලබා සිටියේය.
කාසිය වාසිය දිනූ ශාන්ත අන්තෝනි විදුහල් නායකයා ප්‍රථමයෙන් පන්දු යැවීම තෝරගත් අතර ඒ අනුව පිටියට පිවිසි ත්‍රිත්ව පිතිකරුවන් ශාන්ත අන්තෝනි පන්දු යවන්නන්ට හිසරදයක් වෙමින් පිත්ත හසුරුවන අයුරු දැක ගතහැකි විය.
ප්‍රථම දිනයේ සවස 4.30 ට මන්දාලෝක තත්වය හේතුවෙන් තරගය නතර කෙරුණු අතර නැවත ආරම්භ කිරීමට නොහැකි විය. එහිදී අගනා ශතකයක් වාර්තා කිරිමට පුලීෂ තිලකරත්න (106) සමත් වූ අතර ඊට හතරේ පහර 14 ක් ඇතුළත් විය. ආදම් හිල්මි අර්ධ ශතකයක් (61) වාර්තා කිරීමට සමත් විය.
මෙම තරගයේ දිවා ආහාරය නිමාවී යවන ලද පළමු ඕවරයේදී ක්‍රීඩාවේ ජීව ගුණයට හානිකර ආකාරයේ සිදුවීමක් දැකදැකගත හැකි වූ අතර එහිදී ත්‍රිත්ව පිතිකරුවෙකු පහරක් එල්ල කොට දිව යන අවස්ථාවේදී පන්දු යවන්නා පිටුපස කකුල යොදාගෙන කකුල් මාට්ටුවක් දමන ආකාරය කැමරාවේ සටහන්ව තිබිණ.
එම අවස්ථාවේදී පිතිකරුවා බිම ඇද වැටෙන ආකාරයද දැකගත හැකි වූ අතර එය බොහෝ දෙනෙකුගේ දැඩි කතාබාට ලක් වූ සිදුවීමක් බවටද පත්විය.
ත්‍රිත්ව විදුහල් පළමු ඉනිම - ඕවර 74 කදී කඩුලු 4 කට 222
(පුලීෂ තිලකරත්න 106, ආදම් හිල්මි 61, වතිල උදාර නොදැවී 30)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
