(ශානුක අරවින්ද)
වේල්ස් කුමර විදුහල සහ ශාන්ත සෙබස්තියන් විදුහල අතර මොරටුව ද සොයිසා ක්‍රීඩාංගණයේදී පැවැත්වෙන 75 වැනි ‘රන් මහ සටන’ මහ ක්‍රිකට් තරගයේ පළමු දිනය වූ ඊයේ (28 වැනිදා) ක්‍රීඩාව නතර කරන විට පන්දුවට පහර දෙමින් සිටි වේල්ස් කුමරුවෝ කඩුලු 4 ක් දැවී ලකුණු 111 ක් ලබා සිටියහ.
වර්ෂාව හේතුවෙන් තරගයේ පළමු දිනය ඕවර 44 කට සීමා වූ අතර කාසියේ වාසිය දිනූ ශාන්ත සෙබස්තියන් කණ්ඩායම් නායක රයන් දිසානායකගේ ආරාධනයෙන් පළමුවෙන් පන්දුවට පහරදුන් වේල්ස් කුමර විදුහල, එහිදී ලකුණු 93 ක් ඇතුළත කඩුලු 4 ක් අහිමිකර ගැනීමට කැපී පෙණුන සිදුවීමක් විය.
දක්ෂ පන්දු යැවීමක නිරත වූ අදීෂ් අල්මේදා, වේල්ස් කුමර කණ්ඩායමේ ආරම්භක පිතිකරු පලිඟු පෙරේරා (1) සහ ඔෂාන් මනීෂ (9) ලකුණු 10 සීමාව ඉක්මවා යෑමටත් මත්තෙන් පිටියෙන් ඉවත් කළේය. හතරේ පහර 2 ක් සමග ලකුණු 20 ක් රැස්කළ සුවස් ප්‍රනාන්දු දැවී ගියේ ෂෙනාස් හෂීන්ගේ පන්දුවක් හමුවේ ෂෙෆාන් ප්‍රනාන්දුගේ ස්ටම්ප් කිරීමකට හසු වෙමිනි.
කෙසේ වුවත් පන්දු 112 කට මුහුණ දෙමින් ඉතා ඉවසිලිවන්ත පිතිහරඹයක නිරත වූ නායක රිවිත් ජයසූරිය හයේ පහරක් සහ හතරේ පහර 5 ක් සමග ලකුණු 50 ක් රැස්කළේය. දිනය නිමාවට පත්වන විට කඩුල්ලේ රැදී සිටි ගවීෂ ප්‍රනාන්දු හතරේ පහරක් සමග නොදැවී ලකුණු 23 ක් ලබා සිටි අතර අනෙක් අන්තයේ රැදී සිටි නෙතුල් අනුහස් ලබා සිටියේ ලකුණු 5 ක් පමණි.
ජාත්‍යන්තර විනිසුරුවන් දෙපළක් වන රවීන්ද්‍ර විමලසිරි සහ රුචිර පල්ලියගුරු යන මහත්වරු මෙම තරගයේ ප්‍රධාන විනිසුරවන් දෙදෙනා ලෙස කටයුතු කරති.
වේල්ස් කුමර විදුහල් පළමු ඉනිම - ඕවර 44 කදී කඩුලු 4 කට 111
(රිවිත් ජයසූරිය 50, සුවස් ප්‍රනාන්දු 20, ගවීෂ ප්‍රනාන්දු නොදැවී 23, අදීෂ් අල්මේදා 36/2)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
