(ෂේන් සෙනෙවිරත්න)
මහනුවර ධර්මරාජ විදුහල සහ කිංස්වුඩ් විදුහල අතර 118 වැනි වතාවටත් පවත්වනු ලබන ‘කන්ද උඩරට සුලෝහිත සංග්‍රාමය’ නමින් විරුදාවලියලත් මහ ක්‍රිකට් තරගය මෙම මස 4, 5 සහ 6 යන තෙදින තුළ පල්ලෙකැලේ ජාත්‍යන්තර ක්‍රිකට් ක්‍රීඩාංගණයේදී පැවැත්වීමට නියමිතය.
මහ ක්‍රිකට් තරගයක සිය වැනි තරගය සම්පූර්ණ වීමත් සමග දින තුනක තරගයක් වශයෙන් ක්‍රීඩා කිරීමේ අභිමානය කන්ද උඩරට මහා ක්‍රිකට් වංශකථාවේ ප්‍රථම වතාවට මීට වසර 17 පෙර මෙම දෙවිදුහල ලබාගත්තද, එය තෙදින තරගයක් ලෙස පැවැත්වෙන පළමු අවස්ථාව ලෙස මෙය හැඳින්විය හැකිය.
කන්ද උඩරට දෙවිදුහල් අතර පවත්වනු ලබන පළමු මහ ක්‍රිකට් තරගය 1893 වසරේදී ආරම්භ වී ඇති, වර්ථමානයේ සුලෝහිත සංග්‍රාමය ලෙස නම් කර ඇති මෙම මහ ක්‍රිකට් තරගයේ පළමු තරගය බෝගම්බර ක්‍රීඩාපිටියේදී පවත්වා තිබේ. එවකට දෙවිදුහලේ ගුරුවරුන්ද ඊට සහභාගි වී ඇති බැවින් ධර්මරාජ විදුහලේ නායකත්වය දරා ඇත්තේ ධර්මරාජ විදුහලේ සිටි කීර්තිමත් විදුහල්පතිවරයකු වන ශ්‍රීමත් බාරොන් ජයතිලක මහතාා විසිනි. කිංස්වුඩ් විදුහල් පිලේ නායකත්වය දරා ඇත්තේ ඒ.ටී. ස්පෙන්සර් මහතා විසිනි.
කෙසේ නමුත් පාසල් සිසුන් පමණක් සහභාගි වන මහා ක්‍රිකට් තරගයක් වශයෙන් දෙවිදුහල අතර ප්‍රථම වතාවට පවත්වා ඇත්තේ 1899 වසරේදී වන අතර ඒ සඳහා ධර්මරාජ විදුහලේ නායකත්වය ජේ.සි. ද මෙල් විසින් දරා ඇති අතර කිංස්වුඩ් විදුහලේ නායකත්වය ටී.බී. මාෂල් විසින් දරා තිබේ.
මෙම මහා ක්‍රිකට් ඉතිහාසයේ මෙතෙක් පැවති තරග අතරින් වැඩිම වාර ගණනක් ජයග්‍රහණය කිරීමේ ගෞරවය හිමිකරගෙන ඇත්තේ ධර්මරාජ විදුහල වන අතර ඔවුන් තරග 34ක් ජයග්‍රහණය කොට තිබේ. කිංස්වුඩ් විදුහල තරග 19 ක ජය වාර්තා කොට තිබේ. ධර්මරාජ විදුහල අවසන් වරට පසුගිය වසරේදී (2024) දුලාර බන්දුසේනගේ නායකත්වයෙන් ජය වාර්තා කොට ඇති අතර කිංස්වුඩ් විදුහල අවසන් වරට ජය වාර්තාකොට ඇත්තේ 1958 වසරේදී මොරිස් ප්‍රනාන්දුගේ නායකත්වය යටතේය.
මෙවර මහා ක්‍රිකට් තරගයේ දින තුනක තරගයකට මුහුණ දීම සඳහා පෙරහුරු තරගයක් වශයෙන් කටුගස්තොට ශාන්ත අන්තෝන් විදුහල සමග ධර්මරාජ ලේක් විව් ක්‍රීඩාංගනයේදී පැවති තුන්දින තරගයේදී අති විශිෂ්ට ක්‍රීඩා විලාශයක නිරත වූ ධර්මරාජ පිල ලකුණු 450 සීමාව ආසන්නයට පැමිණීමට සමත් වූ අතර ප්‍රතිවාදින්ට දෙවැනි ඉනිමට පන්දුවට පහර දීමට ආරාධනා කිරීමටද ධර්මරාජ පන්දු යවන්නන්ගේ බලඇණිය වග බලා ගත්තේය.
ධර්මරාජ්‍ය විදුවල මෙවර තරග වාරයේ ‘ඒ’ කොටසේ තරග කරමින් තරග 14 කට මුහුණදී පූර්ණ ජයග්‍රහණ 2 ක් වාර්තා කොට ඉතිරි තරග 12 ජය පැරදුමෙන් තොරව නිමා කොට තිබේ. කිංස්වුඩ් විදුහල ‘බී’ කොටසේ ක්‍රීඩා කරමින් මෙවර තරග වාරයේ තරග 15 කට මුහුණදී ඉන් තරග 7 ක පූර්ණ ජය වාර්තා කරමින් ඉතිරි තරග ජය පැරදුමෙන් තොරව නිමා කොට තිබේ.
ධර්මරාජ විදුහලේ පිතිකරණ අංශයෙන් පළමු බලාපොරොත්තුව වන පළිඳු පෙරේරා මෙවර තරග වාරයේ ලකුණු 936 සීමාවේ සිටින අතර ලක්වීන් අබේසිංහ ලකුණු 500 සීමාව ආසන්නයේද, ඉසුරු පන්නල ලකුණු 600 සීමාව පසුකොටද තිබේ.
කිංස්වුඩ් විදුහලේ නායකත්වය දරණ ශ්‍රී ලංකා වයස අවුරුදු 19 න් පිල නියෝජනය කරන කවීජ ගමගේ මෙවර තරග වාරය තුළ ලකුණු 1000 සීමාව ඉක්මවා ගොස් ඇති අතර පන්දු යවීමෙන් දස්කම් දක්වමින් කඩුලු 90 ක් දවාගෙන තිබේ. කිංස්වුඩ් විදුහල වෙනුවෙන් නිකේශල නානායක්කාර ලකුණු 600 සීමාව පසු කොට ඇති අතර කෙනූල පිළියන්ග කඩුලු 48 ක් දවාගෙන තිබේ.
ධර්මරාජ සංචිතය
පළිඳු පෙරේරා (නායක), ඉසුරු පන්නල (උප නායක), සනුක රත්නායක, ඉසුරු ජයවර්ධන, ලක්වීන්, අබේසිංහ, ධනුෂ්ක මනුකල්ප, නිසල අබේරත්න, කවිඳු ගුණරත්න, ඔනීජ සේසත්, තරිඳු වර්ණකුලගේ, සුමේධ ප්‍රසාද්, මෙත්සිලු බණ්ඩාර, ජනුත් ජයසිංහආරච්චි, කේශන ගුණරත්න, කාශ්‍යප දිසානායක, ගවේෂ් පූර්ණ, චානුක ලක්ෂාන්, මතිෂ රූපසිංහ සහ ජයෝද්‍ය කඩිගව
කිංස්වුඩ් සංචිතය
කවීජ ගමගේ (නායක), නිකේෂල නානායක්කාර (උප නායක), ආදිල් සෙරීෆ්, ගෞරංග බණ්ඩාර, කෙනුල පිළියන්ග, යෝසත් අබේකෝන්, චනුල් කොඩිතුවක්කු, උපාධි ජයවර්ධන, මනුල විජයතුංග, පමුදිත බණ්ඩාර, ඩිල්ෂාන් වීරවංශ, නදීෂ බණ්ඩාරනායක, හේෂාන් වීරසිංහ, රිස්වාන් රශාක්, ඒෂාන් විජේකෝන්, ඩොමින්සර පීරිස්, තේෂාන් දංගම්පොල, ගයාන් තෙන්නකෝන් සහ උමන්ත කිසිරි
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
