(රෝෂන් තුෂාර)
ශ්‍රී ලංකා පාසල් ක්‍රිකට් සංගමය සංවිධානය කරන අවුරුදු 19න් පහළ පළමු කාණ්ඩයේ පාසල් ක්‍රිකට් තරගාවලියේ දී කොළඹ මහානාම විදුහල සහ මහනුවර ත්‍රිත්ව විද්‍යාලය අතර අර්ධ අවසාන පූර්ව තරගය පැවැත්වීමෙන් තොරව අනෙකුත් අර්ධ අවසන් තරග සහ අවසන් තරගය පැවැත්වීම වළක්වමින් කොළඹ සිවිල් අභියාචන මහාධිකරණය එම සංගමයට අතුරු තහනම් නියෝගයක් අද (20) නිකුත් කළේය.
කොළඹ මහානාම විද්‍යාලයේ නියෝජ්‍ය විදුහල්පති ,ඩබ්ලිව්. ඒ. එච්. එස්. බණ්ඩාර මහත්මිය විසින් ශ්‍රී ලංකා පාසල් ක්‍රිකට් සංගමයේ සභාපති ඔෂාර පණ්ඩිතරත්න ඇතුළු 54 දෙනෙකුට එරෙහිව ගොනුකළ අභියාචන පෙත්සමක් සලකා බැලීමෙන් පසුව මෙම අතුරු නියෝගය නිකුත් කළේය.
මහනාම විද්‍යාලයේ අභියාචන පෙත්සම සලකාා බැලූ සිවිල් අභියාචන මහාධිකරණ විනිසුරුවන් වන නාමල් බළල්ලේ හා ප්‍රෑන්ක් ගුණවර්ධන මහත්වරු මෙම අතුරු නියෝගය නිකුත් කළහ.
ශ්‍රී ලංකා පාසල් ක්‍රිකට් සංගමයට එරෙහිව කොළඹ මහනාම විදුහල විසින් කොළඹ දිසා අධිකරණයේ පැවරූ නඩුව කොළඹ ප්‍රධාන දිසා විනිසුරුවරයා විසින් පෙබරවාරි 28 වෙනි දින නිෂ්ප්‍රභා කිරීම නීතියට පටහැනි බව සඳහන් කරමින් මෙම අභියාචන පෙත්සම ගොනුකර තිබිණි.
පෙත්සම්කරුවන් වෙනුවෙන් නීතීඥ සංජීව කළුආරච්චි මහතාගේ උපදෙස් පරිදි ජනාධිපති නීතිඥ ෆයිසර් මුස්තාපා මහතා කරුණු දක්වමින් කියා සිටියේ කොළඹ දිසා අධිකරණය මගින් සිය නඩුව නිශ්ප්‍රභා කරමින් නිකුත් කළ නියෝගය නීතියට පටහැනි බවය.
පෙත්සම් කරු වන මහානාම විද්‍යාලය විසින් පෙබරවාරි 20 වෙනි දින පාසල් ක්‍රිකට් තරගාවලියට එරෙහිව නඩු පැවරූ බවත් ,එම නඩුව ප්‍රකාරව විත්තිකාර පාසල් ක්‍රිකට් සංගමයට වාරණ නියෝගයක් ද නිකුත් කළ බවද සඳහන් කළේය.
පසුගිය 28 දින අදාළ නඩුවේ නියෝගය ප්‍රකාශයට පත් කළ කොළඹ ප්‍රධාන දිසා විනිසුරුවරයා මහානාම විද්‍යාලයෙහි නියෝජ්‍ය විදුහල්පතිවරයා මෙම නඩුව පැවරීමේදී ආයතන සංග්‍රහයේ වගන්ති ප්‍රකාරව අමාත්‍යාංශ ලේකම්වරයාගේ අනුමැතිය ලබාගෙන නොමැති වීම හා අත්‍යවශ්‍ය පාර්ශව වගඋත්තරකරුවන් ලෙස නම් කර නොතිබීම කරුණු සලකා බැලීමෙන් පසුව නඩුව නිෂ්ප්‍රභ කර ඇති බව නීතිඥවරයා පෙන්වා දුන්නේය.
පැමිණිලිකාර පෙත්සම්කරු පාසලේ උන්නතිය වෙනුවෙන් නඩු පැවරීම කර ඇති බවත්, ජනාධිපති නීතිඥවරයා මහාධිකරණය හමුවේ කරුණු දක්වමින් පෙන්වා දුන්නේය.
කොළඹ දිසා අධිකරණයේ නියෝගයට එරෙහිව ගොනු කළ මෙම අභියාචන පෙත්සම විභාග කිරීමට අවසර ලබා දෙන ලෙසත් වගඋත්තරකාර විත්තිකරුවන්ට නොතීසී නිකුත් කරන ලෙසත් ඉල්ලා සිටි ජනාධිපති නීතිඥවරයා පෙත්සම විභාග කර අවසන් වන තෙක් 19 න් පහළ පාසල් ක්‍රිකට් තරගාවලියේ කොළඹ මහානාම විද්‍යාලය හා මහනුවර ත්‍රිත්ව විද්‍යාලය අතර අවසන් පූර්ව තරගයක් පැවැත්වීමකින් තොරව කොළඹ රාජකීය හා මහනුවර ත්‍රිත්ව විද්‍යාලය අතර අර්ධ අවසන් පූර්ව තරග පැවැත්වීම වළක්වන අතුරු තහනම් නියෝගයක් නිකුත් කරන ලෙසට ඉල්ලා සිටියේය.
පැමිණිලිකාර වග උත්තරකරුවන් වෙනුවෙන් ඉදිරිපත් කරුණු සලකා බැලූ සිවිල් අභියාචන මහාධිකරණ විනිසුරුවන් රුපියල් ලක්ෂ දෙකක මුදලක් පෙත්සම්කරුවන් විසින් අධිකරණයේ තැන්පත් කිරීමෙන් පසුව ක්‍රිකට් තරගාවලිය පැවැත්වීම වළක්වමින් අතුරු තහනම් නියෝගය නිකුත් කරන ලෙසට නියෝග කළේය.
විත්තිකාර වග උත්තරකරුවන්ට නොතීසී නිකුත් කරමින් ලබන 27 වෙන දින අධිකරණයේ පෙනී සිටින ලෙසට ද නියෝග කළේය.
පැමිණිලිකාර පෙත්සම්කරුවන් වෙනුවෙන් නීතිඥ සංජීව කළුවරච්චි මහතාගේ උපදෙස් පරිදි ජනාධිපති නීතිඥ ෆයිසර් මුස්තාපා නීතිඥ චාමර නානායක්කාරවසම් සහ නීතිඥ අමිල පෙරේරා යන මහත්වරු පෙනී සිටියහ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
