(සිරංගිකා ලොකුකරවිට)
‘ආදරවන්තයන්ගේ සටන’ ලෙස විරුදාවලිය ලැබූ ගාල්ල මහින්ද සහ රිච්මන්ඩ් දෙවිදුහල් අතර පැවැත්වෙන වාර්ෂික මහ ක්‍රිකට් තරගය හෙට (3 වැනිදා) සිට 5 වැනිදා දක්වා ගාල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වේ.
120 වැනි වතාවට පැවැත්වෙන මෙම තරගය මෙවර පළමු වතාවට තෙදින තරගයක් ලෙස පැවැත්වීම විශේෂත්වයකි. මෙම තරගයට සමගාමීව විද්‍යාල දෙක අතර එක්දින ක්‍රිකට් තරගයක්ද, ආදි සිසුන් අතර ක්‍රිකට් තරගයක්ද, රථ පෙළපාලි, සුහද විවාද තරග ආදීය පැවැත්වීමද සිදුවන බැවින් ‘ආදරවන්තයන්ගේ සටන’ පැවැත්වෙන දින කිහිපයම ගාල්ල සැණකෙළි ස්වරූපයක් උසුළයි.
මෙම මහා ක්‍රිකට් තරගය 1905 වර්ෂයේදී ආරම්භ වී ඇති අතර පළමුව එක් දිනක් තුළ ක්‍රීඩා කර ඇතත් පසුව එය දෙදින තරගයක් ලෙස වෙනස් වී මෙම වර්ෂයේ සිට තෙදින තරගයක් ලෙස පැවැත්වීමට පාසල් දෙකම එකඟවී තිබේ. ලෝක යුද්ධය පැවැති කාලයේදී සහ කොරෝනා වසංගතය හේතුවෙන් අවස්ථා කිහිපයකදී මෙම තරගය පවත්වා නැත. මෙතෙත් පවත්වා ඇති තරගවලදී ජයග්‍රහණ 23 ක් අත්කර ගැනීමට මහින්ද විද්‍යාලයද, ජයග්‍රහණය 24 ක් වාර්තා කිරීමට රිච්මන්ඩ් විද්‍යාලයද සමත්ව තිබේ.
මහින්ද කණ්ඩායමක් අවසන් වරට මෙම තරගය ජයග්‍රහණය කර ඇත්තේ 2008 වර්ෂයේදී වන අතර රිච්මන්ඩ් කණ්ඩායම අවසන් වරට එය ජයග්‍රහණය කර ඇත්තේ 2019 වර්ෂයේදීය. මෙවර ආදරවන්තයන්ගේ සටනේ මහින්ද විදුහල් කණ්ඩායමේ නායකයා ලෙස කවීන් රුක්ෂාන් කටයුතු කරන අතර උප නායකයා ලෙස අරෝෂ උදයංග කටයුතු කරයි.
රිච්මන්ඩ් විදුහල් කණ්ඩායමේ නායකයා ලෙස තමිදු ප්‍රදීප්ත කටයුතු කරන අතර උප නායකයා ලෙස යුරි කොත්තුගොඩ කටයුතු කරයි.
මෙවර අන්තර් පාසල් ක්‍රිකට් තරගාවලියේදී තරග 13 කට සහභාගී වු රිච්මන්ඩ් විද්‍යාලයීය කණ්ඩායම එහිදී පුර්ණ ජයග්‍රහණ 2 ක් ලබා ඇත. ඔවුන් හමුවේ මාතර ශාන්ත තෝමස් විද්‍යාලය හා කුරූණෑගල මලියදේව විද්‍යාලය පරාජයට පත්ව ඇත. කෙසේ වුවත් තරග 7 කදී රිච්මන්ඩ් විද්‍යාලය පළමු ඉනිම පරාජයට පත්ව ඇත.
අන්තර් පාසල් තරගාවලියේ තරග 13 කට සහභාගී වී ඇති මහින්ද විද්‍යාලයීය කණ්ඩායම පුර්ණ ජයග්‍රහණ 4 ක් හිමිකරගෙන ඇත. මහින්දය හමුවේ ගල්කිස්ස ශාන්ත තෝමස්, මොරටු විද්‍යාලය, මාතර ශාන්ත තෝමස් හා ශාන්ත සෙබස්තියන් යන විද්‍යාල පරාජයට පත්ව ඇත. මහින්ද විද්‍යාලය මෙවර තරගාවලියේදී පළමු ඉනිමේ ජයග්‍රහණ 3 ක් ලබා ඇති අතර පළමු ඉනිමේ පරාජයන් 3 ක් ලබා ඇත.
එසේම මෙවර අන්තර් පාසල් ක්‍රිකට් තරගාවයේ පලමු කාණ්ඩයේ ‘බී’ තලයේ අවසන් මහා තරගයේදී කොළඹ තර්ස්ටන් විද්‍යාලය සමගින් සම ශූරයන් බවට පත්වන්නටද ගාල්ල මහින්ද විද්‍යාලය සමත්ව සිටියි.
මෙවර තරගාවලියේදී රිච්මන්ඩ් විද්‍යාලය වෙනුවෙන් වැඩිම ලකුණු ලබාගෙන ඇත්තේ ආරම්භක පිතිකරු නිකිල් ජයවීරය. ඔහු ශතක තුනක් සමගින් ලකුණු 750 ක් ලබා ගෙන ඇති අතර රිච්මන්ඩ් නායක තමිදු ප්‍රදීප්ත ශතක දෙකක් සමගින් ලකුණු 550 ක්ද, හේලිත් එදිරිසිංහ සහ ෂෙහාන් ද සොයිසා ලකුණු 400 බැගින්ද ලබා ගෙන ඇත. රිච්මන්ඩ් විද්‍යාලය වෙනුවෙන් මෙවර තරගාවලියේදී පුබුදු මහිරංග කඩුලු 40 ක්ද, නෙතුජ භාෂිත කඩුලු 34 ක්ද, මලිත් ද සිල්වා කඩුලු 30 ක්ද බැගින් දවාගෙන ඇත.
මෙවර තරගාවලියේදී මහින්ද විදුහල වෙනුවෙන් වැඩිම ලකුණු ලබාගෙන ඇත්තේ ආරම්භක පිතිකරු දුල්සිත් දර්ශනය. ඔහු ශතක දෙකක් හා අර්ධ ශතක තුනක් සමගින් ලකුණු 650 ක් ලබා ගෙන ඇත. මෙම කණ්ඩායම් දෙකේම එකම ද්විත්ව ශතක ලාභියා වන මහින්ද විද්‍යාලයේ සෙනුක දංගමුව ලකුණු 500 ක් ලබා ගෙන ඇත්තේ එම ද්විත්ව ශතකයට අමතරව හා අර්ධ ශතක දෙකක්ද සමගිනි. ඔහු මාතර ශාන්ත තෝමස් විද්‍යාලයට එරෙහිව තරගාවලියේ අවසන් පුර්ව තරගයේදී ලකුණු 200 ක් ලබාගත්තේය.
ඔවුන්ට අමතරව මහින්ද විද්‍යාලය වෙනුවෙන් රන්දුල මාභරණ හා තෙවිදු රශ්මිත ලකුණු 300 බැගින් ලබා ගෙන ඇති අතර පන්දු යැවීමේදී සෙනුක දංගමුව කඩුලු 45 දවාගනිමින් මහින්දයේ වැඩිම කඩුලු ලාභියා බවට පත්ව සිටියි. අරෝෂ උදයංග සහ සදෙව් නෙත්මිණ කඩුලු 40 බැගින් දවාගනිමින් පන්දුවෙන් දක්ෂතා දක්වා ඇත.
රිච්මන්ඩ් විද්‍යාලයීය කණ්ඩායම
ඉදිරි පෙළ වමේ සිට - ෂෙහාන් ද සොයිසා, සිදත් ප්‍රියංකර මහතා (සහය පුහුණුකරු) නුවන් ජයසිංහ මහතා (භාර ආචාර්ය), තමිදු ප්‍රදීප්ත (නායක), රුසිරු මද්දුමහේවා මහතා (විදුහල්පති), යුරි කොත්තුගොඩ (උප නායක), පී.ඒ. ධර්මරත්න මහතා (සහකාර විදුහල්පති- ක්‍රීඩා), ඉන්දික චන්දන මහතා (ප්‍රධාන පුහුණුකරු) සහ නිකිල් ජයවීර
පසු පෙළ වමේ සිට - රවිනු රන්දුණු, මිනඟ ආරියදාස, බෙවින් ජයවර්ධන, නෙත්සර ආකාශ්, පුනාල් හන්සජිත්, තෙනුර ඩයස්, පුබුදු මිහිරංග, මලිත් ද සිල්වා, ටෙනුෂ නිම්සර, හේලිත් එදිරිසිංහ, චමෝද් පුන්සර, නෙතුජ භාෂිත, රිසිනු රූපසිංහ
මහින්ද විද්‍යාලයීය කණ්ඩායම
ඉදිරි පෙළ වමේ සිට - ටී.ඩී. අජන්ත කුමාර මහතා (ප්‍රධාන පුහුණුකරු), වයි. නිශාන්ත කුමාර මහතා (භාර ආචාර්ය), එල්.පී.වීරමන් මහතා (නියෝජ්‍ය විදුහල්පති ක්‍රීඩා), කවීන් රුක්ෂාන් (නායක), ජනක පේදුරුහේවා මහතා (විදුහල්පති), අරෝෂ උදයංග (උප නායක) එම්.ඩබ් අජිත් මහතා (ක්‍රීඩා භාර ආචාර්ය), ජගත් පී. සමරකෝන් මහතා (භාර ආචාර්ය-කනිෂ්ඨ) සහ සචිත් ලක්මාල් මහතා (සහය පුහුණුකරු)
පසු පෙළ වමේ සිට - දිනෙත් පැහැසර, තියෝන් හේලික, විනුප නෙත්මිර, සහන්ජිත් ඉරුගල්බණ්ඩාර, දුල්සිත් දර්ශණ, සෙනුක දංගමුව, සදෙව් නෙත්මිණ, මානිත රාජපක්ෂ, විශ්මිත සත්සර, චාර්ය පරණවිතාන, රන්දුල මාභරණ, සජීව් පුන්සර, සෙහස් ආශිංෂ, කවීෂ ගිත්මල් සහ තෙවිදු රශ්මික
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
