(ශානුක අරවින්ද)
කොළඹ ආනන්ද විදුහල සහ කොළඹ නාලන්දා විදුහල අතර පැවැති 95 වැනි ‘සුලෝහිත සංග්‍රාමය’ වාර්ෂික මහ ක්‍රිකට් තරගයට සමගාමීව දෙවිදුහල් අතර ‘ආචාර්ය පී. ද එස්. කුලරත්න’ කුසලාන වෙනුවෙන් 48 වැනි වරට පැවැති වාර්ෂික එක්දින තරගය අද (16 වැනිදා) විසඳුමකින් තොරව නිමාවට පත් විය.
මෙම තරගයත් සමග මෙතෙක් පැවැති තරග 48 න් තරග 26 ක් ජයගැනීමට නාලන්දා විදුහල සමත්ව ඇති අතර ආනන්ද විදුහල ජයගෙන ඇති තරග සංඛ්‍යාව 16 කි. ඊයේ පැවැති තරගය දෙවිදුහල් අතර විසඳුමකින් තොරව නිමාවට පත්වූ 6 වැනි එක්දින තරගය ලෙස ඉතිහාසයට එක් විය.
කොළඹ එස්.එස්.සී. ක්‍රීඩාංගණයේදී පැවැති මෙම තරගය වර්ෂාව හේතුවෙන් නතර කරන විට ජයග්‍රහණය සඳහා ලකුණු 250 ක ඉලක්කයක් හඹායමින් සිටි නාලන්දා විදුහල ඕවර 12.2 ක් අවසානයේ කඩුලු 2 ක් දැවී ලකුණු 62 ක් ලබා සිටියේය. ඒ වන විට කඩුල්ලේ රැදී සිටි ආරම්භක පිතිකරු ලිතුම් විජේකුමාර හතරේ පහර 5 ක් සමග නොදැවී ලබා සිටි ලකුණු සංඛ්‍යාව 29 කි.
පළමුවෙන් පන්දුවට පහරදුන් නාලන්දා විදුහල ඕවර 50 අවසානයේ කඩුලු 9 ක් දැවී ලකුණු 249 ක් ලබාගත් අතර නාලන්දා විදුහල් කණ්ඩායමේ වැඩිම ලකුණු ලාභියා බවට පත්වූ කෙනුල් ද සිල්වා පන්දු 47 කින් ලකුණු 39 ක් රැස්කළේ හයේ පහරක් සහ හතරේ පහර 4 ක් සමගිනි.
ආරම්භක පිතිකරු නෙතුල එදිරිමාන්න පන්දු 53 කදී හයේ පහරක් සහ හතරේ පහර 2 ක් සමග ලකුණු 34 ක්ද, නායක ආෂිංස නයිනායක පන්දු 27 කදී හතරේ පහර 3 ක් සමග ලකුණු 30 ක්ද රැස්කරමින් ආනන්ද විදුහල් කණ්ඩායමේ ලකුණු සංඛ්‍යාව ඉහළ දැමූහ. එහිදී දක්ෂ පන්දු යැවීමක නිරත වූ හසිත් රත්නායක ලකුණු 46 කට කඩුලු 4 ක් දවාගත්තේය.
ආනන්ද විදුහල - ඕවර 50 කදී කඩුලු 9 ක් දැවි 249
(නෙතුල එදිරිමාන්න 34, දිනද අතලගේ 29, කෙනුල් ද සිල්වා 39, මිහින් මුනසිංහ 29, කවීෂ මෙන්ඩිස් 22, ආෂිංස නයිනායක 30, ශාරද ජයරතන නොදැවී 21, හසිත් රත්නායක 46/4, සදෙව් සමරසිංහ 41/2)
නාලන්දා විදුහල - ඕවර 12.2 කදී කඩුලු 2 ක් දැවී 62
(ලිතුම් විජේකුමාර නොදැවී 29)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
