(ශානුක අරවින්ද)
කොට්ටේ ආනන්ද සාස්ත්‍රාලය සහ නුගේගොඩ ශාන්ත ජෝන් විදුහල අතර කොළඹ පී. සරවනමුත්තු ක්‍රීඩාංගණයේදී පැවැත්වෙන 25 වැනි ‘ශ්‍රී ජයවර්ධනපුර සටන’ වාර්ෂික මහ ක්‍රිකට් තරගයේ පළමු දිනය වූ ඊයේ (21 වැනිදා) ආනන්ද සාස්ත්‍රාල පළමු ඉනිම ලකුණු 150 කට සීමා කිරීමට ශාන්ත ජෝන් පන්දු යවන්නෝ සමත් වූහ.
එහිදී දක්ෂ පන්දු යැවීමක නිරත වූ ශාන්ත ජෝන් විදුහලේ පියුමාල් දෙව්රංග ලකුණු 38 කට කඩුලු 4 ක් බිඳහෙළමින් ආනන්ද සාස්ත්‍රාල පළමු ඉනිම අඩ පණ කළේය. ඒ සඳහා ඔහුට අනගි සහායක් දුන් නායක අනුසර ප්‍රනාන්දු, කළණ ප්‍රබුධිත සහ ඉමෙත් සන්සිලු කඩුලු 2 බැගින් දවාගත්හ.
ආනන්ද සාස්ත්‍රාල ඉනිමේ වැඩිම ලකුණු ලාභියා බවට පත්වූ පෝෂිත මදනායක හයේ පහර 2 ක් සහ හතරේ පහර 6 ක් සමග ලකුණු 70 ක් රැස්කළ නමුත් පිතිකරුවන් 7 දෙනෙක්ම ලකුණු 10 සීමාව ඉක්මවා යෑමටත් මත්තෙන් දැවී යෑම සාස්ත්‍රාල කණ්ඩායමට විශාල පාඩුවක් බවට පත් විය.
පළමු දිනය සඳහා ක්‍රීඩාව නතර කරන විට පන්දුවට පහර දෙමින් සිටි ශාන්ත ජෝන් විදුහල සිය පළමු ඉනිම වෙනුවෙන් කඩුල්ලක් දැවී ලකුණු 27 ක් ලබා සිටියේය. ඒ වන විට අරම්භක පිතිකරු කළණ ප්‍රබුධිත නොදැවී ලකුණු 18 ක්ද, වෝචන ලක්ෂාන් නොදැවී ලකුණුක්ද ලබා කඩුල්ලේ රැදී සිටියහ.
ආනන්ද සාස්ත්‍රාල පළමු ඉනිම - ඕවර 80.4 කදී සියලු දෙනා දැවී 150
(නදිල් පෙරේරා 26, පෝෂිත මදනායක 70, පියුමාල් දෙව්රංග 38/4, අනුසර ප්‍රනාන්දු 15/2, කළණ ප්‍රබුධිත 20/2, ඉමෙත් සන්සිලු 25/2)
ශාන්ත ජෝන් පළමු ඉනිම - ඕවර 17 කදී කඩුල්ලක් දැවී 27
(කළණ ප්‍රබුධිත නොදැවී 18)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
