(ෂේන් සෙනෙවිරත්න)
කන්ද උඩරට දෙවැනි පැරණිතම මහ ක්‍රිකට් තරගය වශයෙන් සැලකෙන ත්‍රිත්ව - ශාන්ත අන්තෝනි 106 වැනි ‘නිල් මහ හටන’ මහ ක්‍රිකට් තරගය ප්‍රථම වතාවට තෙදින තරගයක් ලෙස හෙට (3 වැනිදා) සිට 5 වැනිදා දක්වා කටුගස්තොට ශාන්ත අන්තෝනි ක්‍රීඩා පිටියේදී පැවැත්වේ. මෙවර තරගයේදී මලිත් රත්නායක විසින් ත්‍රිත්ව පිලද, චාරුක ඒකනායක විසින් ශාන්ත අන්තෝනි පිලද මෙහෙයවනු ලබති.
1914 වසරේදී ආරම්භ වී ඇති මෙම මහ ක්‍රිකට් තරගයේ පළමු වැන්න බෝගම්බර පිටියේදී පවත්වා ඇති අතර ශාන්ත අන්තෝනි විදුහල ඉන් ජය ලබා ඇත්තේ සී.සී. සේනාරත්නගේ නායකත්වය යටතේය. පළමු තරගයේ ත්‍රිත්ව විදුහලේ නායකත්වය දරනු ලැබ ඇත්තේ සී.ඊ. ද සිල්වා විසිනි. ත්‍රිත්ව විදුහල ඔවුන්ගේ පළමු ජය වාර්තා කොට ඇත්තේ 1915 වසරේදී ආර්. ඔන්ඩච්චිගේ නායකතවය යටතේය.
මෙතෙක් පැවති මහ ක්‍රිකට් තරග 105 අතරින් වැඩි ගෞරව දිනාගනිමින් ජය වාර්තාකොට ඇත්තේ ත්‍රිත්ව විදුහල වන අතර ඔවුන් මේ වන විට තරග 23 ක ජය වාර්තා කොට තිබේ. ශාන්ත අන්තෝනි විදුහල තරග 11 ක් ජයගෙන ඇත. ත්‍රිත්ව විදුහල අවසන් වරට නිරෝෂන් දික්වැල්ලගේ නායකත්වයෙන් 2012 වසරේදී ජය වර්තා කොට ඇති අතර ශාන්ත අන්තෝනි විදුහල 1992 වසරේදී උමේෂ් ද අල්විස්ගේ නායකත්වයෙන් ජය වාර්තා කර තිබේ.
මෙම දෙවිදුහල නියෝජනය කළ ක්‍රිකට් ක්‍රීඩකයන්ගේ ඉතිහාසය දෙස බැලීමේදී ශ්‍රී ලංකාවේ පළමු ටෙස්ට් පිලට මෙම දෙවිදුහලෙන්ම ක්‍රීඩක නියෝජනයන් ලැබී ඇත. ත්‍රිත්ව විදුහල නියෝජනය කළ වේග පන්දු යවන ක්‍රීඩක රවි රත්නායකද, ශාන්ත අන්තෝනි විදුහල නියෝජනය කළ කඩුලු රකින ක්‍රීඩක මහේෂ් ගුණතිලක සහ බර්නාඩ් පෙරේරාද පළමු ටෙස්ට් පිලට ඇතුළත් වූහ.
ත්‍රිත්ව විදුහලේ ආදි සිසුන් වූ කුමාර සංගක්කාර, නිලන්ත රත්නායක, කෞශල්‍ය වීරරත්න, සචිත් පතරණ, නිරෝෂන් දික්වැල්ල සහ ලහිරු කුමාරද, ශාන්ත අන්තෝනි විදුහලේ ආදි සිසුන් වූ මුත්තයියා මුරලිදරන්, මහේෂ් ගුණතිලක, බර්නාඩ් පෙරේරා, මාලන් වොන්හාට්, රුවන් කල්පගේ, පියල් විජේතුංග සහ චමිදු වික්‍රමසිංහද පසු කළෙක ශ්‍රී ලංකා ක්‍රිකට් පිල නියෝජනය කළහ.
ත්‍රිත්ව විදුහල් පිල
මලිත් රත්නායක (නායක), වතිල උදාර (සම උප නායක), ඩිමන්ත මහවිතාන (සම උප නායක), ජයවි ලියනගම, පුලීෂ තිලකරත්න, රජිදු තිලකරත්න, කවිඳු ජයරත්න, දිනාල් ප්‍රනාන්දු, සෙත්මික සෙනවිරත්න, ආදම් හිල්මි, තිසල් යාපා, රනුල් ගුණරත්න, චනිරු සේනාරත්න, කනිල්ක ඇන්තනි, ඔිෂණ ලොකුගේ, ප්‍රවීන් රුකුණායක, මහේන්ද්‍ර අබේසිංහ, විදුනෙත් ධම්මගේ සහ ස්වාත් අනුරජීව
ශාන්ත අන්තෝනි විදුහල් පිල
චාරුක ඒකනායක (නායක), ජනුක රත්නායක, කෙවන් ප්‍රනාන්දු, බිමාෂ් සමරසිංහ, තරුෂ දසුන්, දිනූර ගනේගොඩ, කෞෂික කුමාරසිංහ, රයන් ග්‍රෙගරි, දිනූල විජේසිංහ, ඔකිත ප්‍රනාන්දු, සදෙව් අමරකෝන්, නෙදන් ඊබට්, තිළිණ පූර්ණිම, කවිඳු නවාංජන, විශ්ව තිලකරත්න, සනූක කල්පන, අංජන වීරසේකර, ඉමෙත් රාජපක්ෂ, යොහාන් සේනානායක, නිකිල් අභිලාෂ් සහ සනිතු ගුණතිලක
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
