(කරන්දෙණිය – එම්. සුසිල් ප්‍රියන්ත)
අම්බලන්ගොඩ ප්‍රජාපතී ගෝතමී බාලිකා විද්‍යාලය සහ තංගල්ල ශ්‍රී ලංකා මිත්‍රත්ව බාලිකා පාසල අතර දෙවැනි වරට පැවැත්වෙන ‘මිතුරියන්ගේ සටන’ ක්‍රිකට් තරගය හෙට (28) අම්බලන්ගොඩ මහජන ක්‍රීඩාංගණයේදී පැවැත්වේ.
ප්‍රජාපතී ගෝතමී බාලිකාවන්ගේ සත්කාරකත්වයෙන් මෙවර අම්බලන්ගොඩදී පැවැත්වෙන ‘මිතුරියන්ගේ සටන’ ක්‍රිකට් තරගය අම්බලන්ගොඩ ක්‍රිකට් නරඹන්නන්ට නවමු අත්දැකීමක් වනු ඇත. ඒ, දෙවිදුහලක කාන්තා කණ්ඩායම් දෙකක් අතර වාර්ෂික ක්‍රිකට් තරගයක් අම්බලන්ගොඩ පැවැත්වෙනුයේ පළමු වරට වීම හේතුවෙනි.
මෙම කාන්තා ක්‍රිකට් තරගයේ පළමුවැන්න ශ්‍රී ලංකා සිංගප්පූරු මිත්‍රත්ව පාසලේ සත්කාරකත්වයෙන් පසුගිය වසරේදී (2024) වීරකැටිය මණ්ඩාඩුව ක්‍රීඩාංගණයේදී පැවැත්විණ. මේ දෙවිදුහලටම මංගල වාර්ෂික ක්‍රිකට් තරගයේ ජය භුක්ති විඳීමට නොහැකි වූවේ, එය ජය පරාජයෙන් තොර වීම නිසාය.
එක් දිනයකට පමණක් සීමා වූ මේ දෙවිදුහල් කාන්තා වාර්ෂික ක්‍රිකට් තරගයේදී එක් කණ්ඩායමකට එක් ඉනිමකදී ක්‍රීඩා කළ හැකි උපරිම ඕවර සංඛ්‍යාව 30කි. ඒ අනුව මේ ක්‍රිකට් තරගයේ ක්‍රියාත්මක කළ හැකි මුළු ඕවර සංඛ්‍යාව 120කි.
මේ දෙවිදුහලෙන් මේ වන විට ප්‍රජාපතී ගෝතමී බාලිකා විද්‍යාලය ජාතික කාන්තා ක්‍රිකට් කණ්ඩායමට ක්‍රිකට් ක්‍රිඩිකාවන් කිහිපදෙනකුම බිහි කර හමාරය. එහෙත්, ශ්‍රී ලංකා සිංගප්පූරු මිත්‍රත්ව පාසලට තවමත් එවන් අවස්ථාවක් හිමි වී නැත.
එහෙත්, ප්‍රජාපතී ගෝතමී බාලිකා විදුහල් කණ්ඩායමට හොඳ සටනක් දිය හැකි ක්‍රීඩිකාවෝ රැසක්ම ශ්‍රී ලංකා සිංගප්පූරු මිත්‍රත්ව පාසල් බාලිකා කණ්ඩායමේ සිටිති. ගියවර පැවැති මංගල තරගයේදී එය හොඳින්ම දක්නට ලැබිණ. එම තරගයේදී පළමු ඉනිමේ ජය ශ්‍රී ලංකා සිංගප්පූරු මිත්‍රත්ව පාසල් බාලිකා කණ්ඩායම දිනා ගැනීම එයට හොඳම නිදසුනකි.
මෙවර පැවැත්වෙන ශූරියන්ගේ සටන දෙවැනි ක්‍රිකට් තරගයේදී අම්බලන්ගොඩ ප්‍රජාපතී ගෝතමී බාලිකා විදුහල් කණ්ඩායම සචිනි සාවින්ද්‍යා විසින් මෙහෙයවනු ලබන අතර, ශ්‍රී ලංකා සිංගප්පූරු මිත්‍රත්ව පාසල් බාලිකා කණ්ඩායම දමෝධ්‍යා තත්සරණි විසින් මෙහෙයවනු ලබයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
