------------------
ශානුක අරවින්ද
------------------
සදීෂ රාජපක්ෂගේ (නොදැවී 85) ඉවසිලිවන්ත පිතිහරඹය හේතුවෙන් අන්තර් පාසල් වයස 19 න් පහළ ක්‍රිකට් තරගාවලියේ I වැනි කොටසේ 'ඒ' කාණ්ඩයේ අවසන් පූර්ව වටයට සුදුසුකම් ලබාගැනීමට කොළඹ රාජකීය විදුහල අද (28 වැනිදා) සමත් විය.
මොරටුව ද සොයිසා ක්‍රීඩාංගණයේදී පැවැති අවසන් පූර්ව තරගයේදී කොළඹ මහානාම විදුහලට එරෙහිව කඩුලු 6 ක ජයක් අත්කර ගනිමින් රාජකීයයෝ අවසන් පූර්ව වටයට සුදුසුකම් ලැබුහ. එහිදී ඉතා ඉවසිලිවන්ත පිතිහරඹයක නිරත වු සදීෂ, සිය ඉනිම ගොඩනැගීම සඳහා පන්දු 129 කට මුහුණදුන් අතර ඊට ඇතුළත් වුයේ හතරේ පහර 3 ක් පමණි.
සෙහාන් හේරත් (62) සමග එක්ව තෙවැනි කඩුල්ල වෙනුවෙන් පන්දු 160 කදී ලකුණු 116 ක සම්බන්ධතාවක් ගොඩනැගූ සදිෂ, ඉන් නොනැවතී නායක අහන් වික්‍රමසිංහ (27) සමග එක්ව සිව්වැනි කඩුල්ල වෙනුවෙන් පන්දු 52 කදී ලකුණු 45 ක සම්බන්ධතාවක්ද ගොඩනගමින් රාජකීය විදුහලේ ජයග්‍රහණය තහවුරු කළේය.
කාසියේ වාසිය දිනු රාජකීය විදුහලේ ආරාධනයෙන් පළමුවෙන් පන්දුවට පහරදුන් මහානාම විදුහලට ඕවර 50 අවසානයේ කඩුලු 8 ක් දැවී ලබාගත හැකි වුයේ ලකුණු 209 ක් පමණි. එහිදී නායකත්වයේ ඉනිමක් ක්‍රීඩා කළ පවන් රත්නායක පන්දු 150 කදී හයේ පහර 4 ක් සහ හතරේ පහර 3 ක් සමග ලකුණු 114 ක් රැස්කළේය.
මහානාම විදුහල - ඕවර 50 කදී කඩුලු 8 ක් දැවී 209
(පවන් රත්නායක 114, විනුක රූබසිංහ 33, සොනාල් අමරසේකර 29/3)
රාජකීය විදුහල - ඕවර 47 කදී කඩුලු 4 ක් දැවී 210
(සෙහාන් හේරත් 62, සදීෂ රාජපක්ෂ නොදැවී 85, අහන් වික්‍රමසිංහ 27)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
