(දමින්ද විජේසූරිය)
වාර්ෂික මහ ක්‍රිකට් තරගයේදී බලාපොරොත්තු සුන්වූ නමුත් ඊට සතියකින් පසු තෝමසුවන් පරදවා මස්ටැංග්ස් කුසලානය තමන් සතුකරගැනීමට රාජකීයයෝ සමත් වූහ. එය පසුගිය වසරේ අහිමි වූ මස්ටැංග්ස් කුසලානය නැවත ලබා ගැනීමක් ද වූ අතර රාජකීය විද්‍යාලයට අමතක නොවන ජයග්‍රහණයක් ලබා දීමට හිරුන් ලියනාරච්චි සමත් විය.
කොළඹ සිංහල ක්‍රීඩා සමාජ පිටියේදී සකස් කර තිබූ හරිත පැහැ තණතීරුවකදී පළමුව පන්දු යැවීමට රාජකීය නායක රමිරු පෙරේරා තීරණය කළේය. එහෙත් සාන්ත තෝමස් ආරම්භක පිතිකරුවෝ සාධාරණ වශයෙන් සාර්ථක ආරම්භයක් ලබා ගත්හ.
අවිනාශ් ප්‍රනාන්දු දැවී යාමෙන් පසුව පැමිණි සදෙව් සොයිසා, ආරම්භක පිතිකරුවා වූ ජේඩන් අමරවීර සමඟ එක්ව ලකුණු 58 ක සම්බන්ධතාවයක් ගොඩනැංවීය. සොයිසා ලකුණු 32 කට දැවී ගිය නමුත් ජේඩ්න් අමරවීර ඔහුගේ පාසල් ක්‍රිකට් දිවියේ හොඳම එක්දින ඉනිම ක්‍රීඩා කළේය.
අනෙක් අන්තයේ පිතිකරුවන් දැවී ගියද අමරවීර සන්සුන්ව සිටිමින් ඉතා වටිනා ලකුණු 70ක් ලබා ගත්තේ සාන්ත තෝමස් කණ්ඩායමේ මුළු ලකුණු සංඛ්‍යාව 220 දක්වා ගෙන යමිනි. නිල් මහ හටනේ ශතක ලාභින් වූ දිනෙත් ගුණවර්ධන සහ රෙෂොන් සොලමන්ස් ද පිළිවෙලින් 25 සහ 27 ලෙස තම කණ්ඩායමට ලකුණු එකතු කළහ.
රාජකීය කණ්ඩායම වෙනුවෙන් නායක රමිරු පෙරේරා කැපී පෙනෙන පන්දු යැවීමක නිරත වෙමින් ලකුණු 45 කට කඩුලු 3 ක් දවා ගත්තේය.
රාජකීය ඉනිම ආරම්භයේදීම පිතිකරුවන් දෙදෙනකු ලකුණු නොලබා දැවී ගිය නමුත් හිරුන් ලියනාරච්චි (105) සහ විමත් දින්සර (30) එක්ව ඉනිම පිළිසකර කළහ. විමත් දින්සර වේගවත් ලකුණු 30ක් ලබා ගනිමින් රාජකීයයන් නැවත තරගයට ගෙන ආවේය.
ලියනාරච්චිට තමාගේම පිතිහරඹයක නිරත විය. ඔහු විටෙක වේගයෙන් ලකුණු රැස් කළ අතර අවශ්‍ය අවස්ථාවේදී තැන්පත්ව සිටියේය. හතරේ පහර 13 කින් සහ හයේ පහරකින් තම පාසලේ සිසුන් මෙන්ම ආදි සිසුන්වත් අමන්දානන්දයට පත්කළ ලියනාරච්චි, මැදපෙළ පිතිකරුවන් වූ රමිරු පෙරේරා සහ අනුෂ් පොලොනොවිට සමඟ කුඩා සම්බන්ධතා ගොඩනඟමින් කණ්ඩායම ඉලක්කයට ආසන්නය දක්වා ගෙන ගියේය. ලියනාරච්චිගේ පිතිහරඹය හමුවේ තරගය තමන්ගෙන් ගිළිහී යන බව සාන්ත තෝමස් පන්දු යවන්නන්ට වැටහෙන විටත් හානිය සිදුවී හමාරය.
සචිත්‍ර ගුණසිංහගේ විශිෂ්ට උඩ පන්දුවකින් ලියනාරච්චි දැවී ගියද තෙවිඳු වේවැල්වල (නොදැවී 25) සහ යසිඳු දිසානායක (නොදැවී 18) රාජකීය කණ්ඩායම ජය ටැඹ කරා කැඳවාගෙන ගියහ.
සාන්ත තෝමස් විද්‍යාලය - ඕවර 49.1 කදී සියලු දෙනා දැවී 220 යි
(ජේඩ්න් අමරවීර 70, අවිනාශ් ප්‍රනාන්දු 17, සදෙව් සොයිසා 32, දිනෙත් ගුණවර්ධන 25, රෙෂාන් සොලමන්ස් 27, කවිඳු ඩයස් 17, කාලිඩ් රහිම්ඩීන් 24/2, රනුක මලවිආරච්චි 41/2, රමිරු පෙරේරා 45/3)
රාජකීය විද්‍යාලය - ඕවර 46.4 කදී කඩුලු 6 ට 223 යි
(හිරුන් ලියනාරච්චි 105, විමත් දින්සර 30, රමිරු පෙරේරා 11, අනූෂ් පොළොන්නෝවිට 23, තෙවිඳු වේවැල්වල නොදැවී 25, යසිඳු දිසානායක නොදැවී 18, කවිඳු ඩයස් 57/3)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
