(ශානුක අරවින්ද)
මොරටුව ශාන්ත සෙබස්තියන් විදුහල සහ වේල්ස් කුමර විදුහල අතර පැවැත්වෙන 75 වැනි ‘රන් සටන’ වාර්ෂික මහ ක්‍රිකට් තරගය හෙට (28 වැනිදා) සිට දින තුනක් පුරා මොරටුව ද සොයිසා ක්‍රීඩාංගණයේදී පැවැත්වේ.
එම තරගයට සමගාමීව පැවැත්වෙන 40 වැනි වාර්ෂික එක්දින තරගය මාර්තු මස 8 වැනිදාත්, තෙවැනි විස්සයි-20 තරගය 9 වැනිදාත් එම ක්‍රීඩාංගණයේදීම පැවැත්වීමට කටයුතු යොදා තිබේ.
මෙවර මහ ක්‍රිකට් තරගයේදී ශාන්ත සෙබස්තියන් විදුහල් කණ්ඩායම මෙහෙයවීමේ වගකීම රයාන් දිසානායකට පැවරී තිබේ. එහිදී වේල්ස් කුමර විදුහල් කණ්ඩායම මෙහෙයවීමේ අවස්ථාව රිවාන් ජයසූරියට හිමිව තිබේ. අදේශ් අල්මේදා ශාන්ත සෙබස්තියන් විදුහල් කණ්ඩායමේ උප නායකයා ලෙසත්, රසිඳු ප්‍රනාන්දු වේල්ස් කුමර විදුහල් කණ්ඩායමේ උප නායකයා ලෙසත් කටයුතු කරති.
දෙවිදුහල් අතර මෙතෙක් පැවති මහ ක්‍රිකට් තරග 74 දී ජයග්‍රහණ 6 ක් අත්කර ගැනීමට වේල්ස් කුමර විදුහල සමත්ව ඇති අතර, ශාන්ත සෙබස්තියන් විදුහල තරග 4 ක් ජයගෙන තිබේ. සෙසු තරග ජය පැරදුමෙන් තොරව නිමාවට පත්ව ඇත. මෙතෙක් පැවති එක්දින තරග 39 න් තරග 20 ක් ජයගැනීමට ශාන්ත සෙබස්තියන් විදුහල සමත්ව ඇති අතර, වේල්ස් කුමර තරග 15 ක් ජයගෙන තිබේ. එක් තරගයක් ලකුණු සම වීමෙන් අවසන්ව ඇති අතර, සෙසු තරග 3 අත්හැර දමා තිබේ.
මෙවර අන්තර් පාසල් 19 න් පහළ තරග වාරය තුළදී පූර්ණ ජයග්‍රහණ 5 ක් සහ පළමු ඉනිමේ ජයග්‍රහණ 8 ක් වාර්තා කිරීමට සමත් වූ ශාන්ත සෙබස්තියන් විදුහල, මේ වන විට තරගාවලියේ අවසන් මහ තරගයට සුදුසුකම් ලබා සිටියි. මෙවර අන්තර් පාසල් 19 න් පහළ තරග වාරය තුළ පූර්ණ ජයග්‍රහණ 3 ක් සහ පළමු ඉනිමේ ජයග්‍රහණ 8 ක් වාර්තා කිරීමට වේල්ස් කුමර විදුහල සමත් වුවද, ඔවුන්ට තරගාවලියේ අවසන් පූර්ව වටයට සුදුසුකම් ලබාගැනීමට නොහැකි විය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
