(ශානුක අරවින්ද)
කොළඹ ආනන්ද විදුහල සහ නාලන්දා විදුහල අතර කොළඹ එස්.එස්.සී. ක්‍රිකට් ක්‍රීඩාංගණයේදී පැවැත්වෙන 95 වැනි ‘සුලෝහිත සංග්‍රාමය’ මහ ක්‍රිකට් තරගයේ පළමු දිනය වූ අද (28 වැනිදා) ක්‍රීඩාව නතර කරන විට පන්දුවට පහර දෙමින් සිටි ආනන්ද විදුහල කඩුලු 3 ක් දැවී ලකුණු 154 ක් ලබා සිටියේය.
වර්ෂාව හේතුවෙන් තරගයේ පළමු දිනය ඕවර 47 කට සීමා වූ අතර කාසියේ වාසිය දිනූ නාලන්දා කණ්ඩායම් නායක සදෙව් සමරසිංහගේ ආරාධනයෙන් පළමුවෙන් පන්දුවට පහරදුන් ආනන්ද විදුහලේ පළමු කඩුල්ල ලකුණු පුවරුවට එකදු ලකුණක් හෝ එක් වීමට පෙරාතුව බිඳවැටීම කැපී පෙනුණ සිදුවීමක් විය.
කෙසේ වුවත් ඉන් අනතුරුව නෙතුල එදිරිමාන්න (49) සමග එක්ව දෙවැනි කඩුල්ල වෙනුවෙන් ලකුණු 93 ක සම්බන්ධතාවක් ගොඩනැගීමට දිනද අතලගේ (නොදැවී 52) සමත් විය. අර්ධ ශතකය පෙනි පෙනී තිබියදී නෙතුල දැවී ගියේ හසිත රත්නායකගේ පන්දුවක් හමුවේ මනූප මන්මිත අතට උඩ පන්දුවක් ලබා දෙමිනි.
ඉවසිලිවන්ත ඉනිමක් ක්‍රීඩා කළ දිනද, පන්දු 140 ක් පුරා සිය කඩුල්ල ආරක්ෂා කරගත්තේ හතරේ පහර 4 ක්ද එල්ල කරමිනි. තරමක් වේගයෙන් ලකුණු රැස්කළ කිත්ම විතානපතිරණ පන්දු 28 කදී ලකුණු 32 ක් රැස්කළේ හයේ පහරක් සහ හතරේ පහර 4 ක් සමගිනි. කෙනුල ද සොයිසා හතරේ පහර 2 ක් සමග නොදැවී ලකුණු 13 ක් ලබා දිනය නිමාවට පත්වන විට කඩුල්ලේ රැදී සිටියේය.
පන්දු 3 කට පමණක් මුහුණදුන් ආරම්භක පිතිකරු දිනඳු සෙල්ලප්පෙරුම දැවී ගියේ ඔසඳ ප්‍රමුදිතගේ පන්දුවක් හමුවේ කඩුලු රකින ක්‍රීඩක මානස ද සිල්වා අතට උඩ පන්දුවක් දෙමිනි. රවින්ද්‍ර කොට්ටච්චි මහතා සහ චාමර ද සොයිසා මහතා මෙම තරගයේ ප්‍රධාන විනිසුරුවන් ලෙස කටයුතු කරති.
ආනන්ද විදුහල් පළමු ඉනිම - ඕවර 47 කදී කඩුලු 3 කට 154
(නෙතුල එදිරිමාන්න 49, දිනද අතලගේ නොදැවී 52, කිත්ම විතානපතිරණ 32)
(ඡායාරූප - ගයාන් අමරසේකර)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
