ක්‍රීඩා ඇමැති උසාවි යයි

(නාමල් පතිරගේ)

ක්‍රිකට් අතුරු කමිටුවට එරෙහිව අභියාචනාධිකරණය පනවා තිබෙන තහනම ඉවත් කරවා ගැනීම සඳහා මුලපුරමින් ක්‍රීඩා ඇමැති රොෂාන් රණසිංහ මහතා අනිද්දා (13) ශ්‍රේෂ්ඨාධිකරණය හමුවට යෑමට තීරණය කර ඇතැයි ක්‍රීඩා අමාත්‍යාංශ ආරංචි මාර්ග සඳහන් කරයි.

ඒ සම්බන්ධයෙන් ඇමැතිවරයා ඊයේ (10) වන විට නීතිපතිවරයාගෙන් උපදෙස් ලබා ගනිමින් සිටි බවද එහිදී වාර්තා වේ. නීතිපතිවරයා සම්බන්ධයෙන් ක්‍රීඩා ඇමැතිවරයා ඉකුත් දිනවලදී මතභේදාත්මක ප්‍රකාශ සිදු කළත් මේ වනවිට එම තත්වය සමනය වී තිබෙන බවත් වාර්තා වේ.

ඉරිදා (5) අතිවිශේෂ ගැසට් නිවේදනයකින් ක්‍රීඩා ඇමැති රොෂාන් රණසිංහ මහතා ශ්‍රී ලංකා ක්‍රිකට් ආයතනය අත්හිටුවමින් සත් පුද්ගල ක්‍රිකට් අතුරු කමිටුවක් ප්‍රකාශයට පත් කළේය.

මෙම ක්‍රියාදාමය වළක්වමින් අභියාචනාධිකරණයෙන්  ලබන බ්‍රහස්පතින්දා (16) දක්වා තහනම් නියෝගයක් පැනවූයේ ශ්‍රී ලංකා ක්‍රිකට් ආයතනයේ සභාපති ෂම්මි සිල්වා මහතා ගොනු කළ රිට් පෙත්සමක් සලකා බලමිනි.

ඒ අනුව බ්‍රහස්පතින්දා මෙම රිට් පෙත්සම අභියාචනාධිකරණය විසින් යළි සලකා බැලීමට නියමිතය. අභියාචනාධිකරණයේ මෙම තහනමට එරෙහිව අතුරු තහනම් නියෝගයක් ලබාගැනීමට ශ්‍රේෂ්ඨාධිකරණය හමුවට යාම ක්‍රීඩා ඇමැතිවරයාගේ අපේකෂාවයි.

එහිදී ක්‍රීඩා ඇමැතිවරයා වෙනුවෙන් පෞද්ගලිකව නීතිඥවරුන් පිරිසක් පෙනී සිටිනු ඇතැයි ද වාර්තාවේ. ක්‍රීඩා අමාත්‍යාංශ ආරංචි මාර්ග සඳහන් කරන අන්දමට මේ වනවිට ක්‍රීඩා අමාත්‍යංශයේ එතෙක් කටයුතු කරමින් සිටි නීති උපදේශකවරිය ඉවත් කර තිබෙන බැවින් ඒ වෙනුවට තාවකාලිකව පත්කළ නීතිඥවරුන් දෙදෙනකු  අමාත්‍යාංශයේ සේවයට බඳවා ගෙන තිබේ.

කෙසේ වුවත් ඔවුන්ද මේ වනවිට ක්‍රීඩා අමාත්‍යාංශයේ සේවයෙන් ඉවත් ගොස් තිබෙන බැවින් නිත්‍ය නීති උපදේශකවරයකු අමාත්‍යාංශයට  බඳවා ගැනීමට අයැදුම්පත් කැඳවා ඇතැයි ද වාර්තා වේ.