උතුරු දිග ඉතාලියේ ඊසාන දෙසින් පිහිටි ඉතා කුඩා රාජ්‍යයක් වන ශාන්ත මරිනා (සැන් මැරීනෝ) කණ්ඩායම පරාජය කරමින් ගෝල 10-0 ක දැවැන්ත ජයක් ලබාගත් එංගලන්ත කණ්ඩායම ලබන වසරේදී පැවැත්වෙන පාපන්දු ලෝක කුසලාන තරගාවලිය සඳහා සුදුසුකම් ලබාගත්තේය. තරගකාරී මට්ටමේ පාපන්දු කී‍්‍රඩාවේදී එංගලන්තය ලබාගත් දැවැන්තම ජයග‍්‍රහණය ලෙසින් මෙය සැලකෙයි.
ලබන වසරේදී කටාර්හිදී පැවැත්වෙන ලෝක කුසලාන තරගාවලියට සුදුසුකම් ලබාගැනීම සඳහා ඊයේ (15 වැනිදා) පැවැති මෙම තරගයේදී එංගලන්තයට අවශ්‍ය වූයේතරගය ජය පරාජයෙන් තොරව අවසන් කරගැනීම පමණි. එහෙත් ගෝල පිට ගෝල ලබාගත් එංගලන්ත කී‍්‍රඩකයෝ 10-0 ක ජයක් අත්කර ගත්හ. එංගලන්තය මෙවන් දැවැන්ත ජයක් ලබාගත්තේ 1964 දී ඇමරිකා එක්සත් ජනපදය හා පැවැති සුහද තරගයකදීය.
හෙන්රි මැක්ග්වයර් පළමු ගෝලය ලබාගත් අතර සැන් මරීනෝ කණ්ඩායමේ පිලිප් ෆැබ්රිගේ වැරදීමකින් පන්දුව ඔහුගේම කණ්ඩායමේ දැළ ඇතුළට රිංගා ගත්තේය. එතැනින් වැඩ ඇල්ලූ එංගලන්ත නායක හැරී කේන් පිට පිටම ගෝල 4 ක් ලබාගත්තේ පළමු අර්ධය නිමාවේදී එංගලන්ත කණ්ඩායම 6-0 ක් ලෙසින් ඉදිරියට ගෙන යමිනි.
විවේකයෙන් පසුව ආර්සනෙල් පිලේ මැද පෙළ කී‍්‍රඩක ස්මිත් රෝ 58 වැනි විනාඩියේදී ගෝලයක් ලබාගත් අතර 69 වැනි විනාඩියේදී ටිරෝන් මින්ග් හිසින් ගැසූ පහරකින් ලබාගත් ගෝලයත් සමගම ලකුණු සංඛ්‍යාව 8-0 ක් විය. එහෙත් අනුකම්පාවක් පෙන්වූයේ එංගලන්තය නොවේ. 78 වැනි විනාඩියේදී ටැමී ඒබ‍්‍රහම් ගෝලයක් ලබාගත් අතර ඊළ`ග විනාඩියේ බුකායෝ සකාගේ හිසින් නික්මුණු පන්දුව දැළ තුළට රිංගා ගත්තේ 10-0 ක ජයක් එංගලන්ත පිලට අත්කර දෙමිනි.
නායක හැරී කේන් මේ වසරේදී එංගලන්ත පිල වෙනුවෙන් ලබාගත් ගෝල සංඛ්‍යාව 16 කි. වසර 113 ක් පැරණි වාර්තාවක් බිඳිමින් හැරී කේන් අත්කරගත්තේ 1908 දී ජෝර්ජ් හිල්ස්ඩන් විසින් පිහිටුවන ලද ගෝල 12 වාර්තාවයි. ජෝර්ජ්ගේ වාර්තාව 1927 දී ඩික්සි ඞීන් විසින් සමකරනු ලැබ තිබිණ.
මේ වන විට එංගලන්තය වෙනුවෙන් වැඩිම අන්තර්ජාතික ගෝල සංඛ්‍යාවක් ලබාගත් කී‍්‍රඩකයන් අතර තුන්වැනි ස්ථානයේ සිටින හැරී කේන් විසින් ගැරී ලින්කර්ගේ ගෝල 48 සමකරනු ලැබ සිටී. එහෙත් ඔහු තවමත් ශී‍්‍රමත් බොබී චාල්ටන් (49) සහ වේන් රූනි (53) දෙදෙනාට පසුපසින් සිටී.
1993 දීත් සැන් මැරීනෝ කණ්ඩායමට මෙවන් ඉරණමක් අත්වූයේ ඉයන් රයිට් විසින් එකම තරගයකදී ගෝල 4 ක් ලබාගත් බැවිනි.
කටාර් 2022 ලෝක කුසලාන තරගාවලිය සඳහා යුරෝපීය සුදුසුකම් ලැබීමේ තරගාවලියේ ‘අයි’ කාණ්ඩයෙන් තරග කළ එංගලන්තය සුදුසුකම් ලැබීමේ තරගාවලිය අවසන් කළේ එහි පෙරමුණ ගනිමිනි. සහභාගි වූ තරග 10 න් 8 ක් ජයගත් එංගලන්තය තරග 2 ක් ජය පැරදුමෙන් තොරව අවසන් කරගනිමින් අපරාජිත බවත් රැකගත්තේය.
තවත් මාස 12 කින් පමණ එංගලන්ත කණ්ඩායම කටාර් බලා යන්නේ පාපන්දු ලෝක කුසලාන දිනාගැනීමට වඩාත් ආසන්න කණ්ඩායමක් ලෙසිනි.
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
