බාර්සිලෝනාවේ පිහිටි ලයනල් මෙසීගේ නිවෙස වටකළ ‘බාර්සිලෝනා’ පාපන්දු සමාජයේ ආධාරකරුවෝ වසර 21 කට පසුව තමන්ගේ ක්‍රීඩා සමාජය අතහැර යාමට ගත් තීරණය සම්බන්ධයෙන් ලයනල් මෙසීට සිය කණගාටුව ප්‍රකාශ කළහ. මේ අතරවාරයේදී ප්‍රංශයේ පැරිස් නුවර සිටින ශාන්ත ජර්මේන් ක්‍රීඩා සමාජයේ ආධාරකරුවෝ මෙසී එන තෙක් මගබලා සිටිති.
මෙසීගේ නික්මයාම සම්බන්ධයෙන් තමන් කෙතරම් නොසතුටට පත්ව සිටින්නේද යත්, පැරිසියේ ක්‍රීඩා සමාජයට සම්බන්ධවීම අභියෝගයට ලක්කරමින්, බාර්සිලෝනා ආධාරකරුවකු ප්‍රංශ අධිකරණයේ නඩුවක්ද ගොනුකර තිබේ. ඔහුගේ අභිප්‍රාය වන්නේ ලයනල් මෙසී බාර්සිලෝනාවෙන් ඉවත්ව පැරිසියේ ශාන්ත ජර්මේන් ක්‍රීඩා සමාජයට සම්බන්ධවීම වැළැක්වීමට යුරෝපා කොමිසම මගින් පියවර ගැනීමයි.
ආර්ජන්ටිනාවේ ජාතික පාපන්දු කණ්ඩායමේ නායකයා ද වන ලයනල් මෙසී සිය වෘත්තීය දිවිය සම්පූර්ණයෙන්ම පාහේ කැපකළේ ස්පාඤ්ඤයේ බාර්සිලෝනා පාපන්දු සමාජය වෙනුවෙනි. මේ වන විට 34 හැවිරිදි වියේ පසුවන මෙසී, ඊයේ (ඉරිදා) මාධ්‍ය සාකච්ඡාවක් පවත්වමින් කියා සිටියේ තමන් බාර්සිලෝනා ක්‍රීඩා සමාජයෙන් ඉවත්වීමට සූදානම් බවත්, ප්‍රංශයේ “ශාන්ත ජර්මේන් ක්‍රීඩා සමාජය සමග කළ “කතාබහ වල ඇත්තත් තිබෙනවා” කියාත්ය.
මාධ්‍ය සාකච්ඡාව පැවැත්වෙන අතරතුරේදී කහිප වතාවක්ම කතාකරගත නොහැකිව නතර වූ මෙසී, තමන් වයස අවුරුදු 13 සිට ක්‍රීඩා කළ ක්‍රීඩා සමාජය හැරයාමේ වේදනාවෙන් සිටින බවද පෙන්නුම් කළේය. අවස්ථා කිහිපයකදීම සිය ලේන්සුවෙන් කඳුළු පිසදාගත් පාපන්දු ශූරයා...
“අපි මේ අවුරුද්දේත් මෙහිදීම, අපේ ගෙදරම, ඉන්නවා කියන එක තමයි මගේත් පවුලේත් සිතිවිල්ල වුණේ. අනෙක් සියලු දේට වඩා අපට වැදගත් වුණේ ඒකයි”
“කොහොම වුණත් මම ක්‍රීඩා සමාජය අතහැර යනවා, මගේ ජීවිතය වෙනස් කරගන්නවා කියන එක ගැන තවමත් ස්ථිර තීරණයක් අරගෙන නෑ.. මා මේ ක්‍රීඩා සමාජයට හරිම ආදරෙයි” යයි පැවසූවේ කඳුලු නවතාගැනීමට උත්සාහ කරමිනි.
“තවත් ශූරයන්ගේ කුසලාන තරගාවලියක් දිනන්න මා කැමැත්තෙන් හිටියා... ඒත් මා කිසි දෙයක් ගැන කණගාටුවන්නේ නෑ.... මම මගේ මෙතැන තරග දිවිය අවසන් කරන්නේ කුසලාන රැසක් ඉතිරි කරලායි” යයිද මෙසී පැවසීය.
බාර්සිලෝනා නුවර ඉතාමත් ධනවත් පුද්ගලයන් වෙසෙන කාසල්ඩිෆෙල්ස් ප්‍රදේශයේ මෙසීගේ නිවස පිහිටා තිබේ. ඔහු එයින් පිටව යන බවට සංඥාවක් නොතිබුණ නමුත් අද (සඳුදා) උදෑසන සිටම පාපන්දු ලෝලීන් ඒ අසළ ගැවසුනේ තමන්ගේ ප්‍රියතම ක්‍රීඩකයා යන්තමින් හෝ දැකගැනීමේ අටියෙනි.
“මට නම් මේ කිසිදෙයක් හිතාගන්න බෑ”
“මා හැමදාමත් ආදරය කළ, මට ආදර්ශයක් වුණ, මා හැමදාමත් අනුගමනය කළ ක්‍රීඩකයෙක් අප අතහැරලා යනවා කියන එක මහ වේදනාවක්” යයි ක්‍රිස්ටියන් ගාර්ෂියා පැවසීය. බාර්සිලෝනා පාපන්දු සමාජයේ බැනියමකින් සැරසී සිටි ඔහුගේ බැනියමේ අංක 10 සහ ‘මෙසී’ යනුවෙන් සටහන් කර තිබිණ.
කොරෝනා වසංගතය නිසා ඇතිවූ ආර්ථික අවපාතය හේතුවෙන් සිය වැටුපෙන් 50්‍ර කට බාර්සිලෝනා ක්‍රීඩා සමාජය වෙනුවෙන් ක්‍රීඩා කිරීමටත්, ඒ සඳහා නව කොන්ත්‍රාත්තුවක් අත්සන් කිරීමටත් මෙසී එකඟව සිටියේය. එහෙත් ස්පාඤ්ඤ පාපන්දු ලීගයේ මූල්‍ය පාලන නීතිරීති හේතුවෙන් එය අවසානයක් දැකිය හැකිවූ එකඟතාවක් නොවීය. බාර්සිලෝනා පාපන්දු සමාජයේ අලාභය යුරෝ බිලියන 1 ක් හෙවත් ඩොලර් මිලියන 1200 ක් තරම් විශාල වී තිබිණ
“සල්ලි නෙමේ.. එයාව තියාගන්න ක්‍රීඩා සමාජය දැනගන්න ඕනේ.. එයාව රඳවා ගන්න අවශ්‍ය පියවර ගත්තා කියා මා නම් හිතන්නේ නෑ” යයි බාර්සිලෝනා පිලේ තවත් ආධාරකරුවෙක් පැවසීය.
ප්‍රංශයේ පුවත්පත් වාර්තා කරන්නේ මෙසී ඉරිදා හෝ සඳුදා පැරිස් නුවරට පැමිණෙන බවත්, වෛද්‍ය පරීක්‍ෂණ වලට මුහුණ දීමෙන් පසුව පැරිස් ශාන්ත ජර්මේන් පිල (පී.එස්.ජී.) සමග එක්වන බවත්ය.
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
