මුම්බායි ක්‍රීඩකයෝ තෙවැනි ජය ලබති

ඉන්දීය ප්‍රිමියර් ලීග් තරගාවලියේ 33 වැනි තරගය ලෙස මුම්බායි ඉන්දියන්ස් කණ්ඩායම සහ සන්රයිසස් හයිද්‍රාබාද් කණ්ඩායම අතර මුම්බායි නුවර වැන්කඩේ ක්‍රීඩාංගණයේදී ඊයේ (17 වැනිදා) පැවැති තරගයෙන් කඩුලු 4 ක ජයක් වාර්තා කිරීමට මුම්බායි කණ්ඩායම සමත් විය. මුම්බායි කණ්ඩායම මෙවර තරගාවලියේදී ලැබූ තෙවැනි ජය මෙය විය. 

ජයග්‍රහණය සඳහා ලකුණු 163 ක ඉලක්කයක් හඹාගිය මුම්බායි ක්‍රීඩකයෝ ඕවර 18.1 ක් අවසානයේ කඩුලු 6 ක් දැවී ඉලක්කය සපුරාගත්හ. වේගවත් පිතිහරඹයක නිරත වූ නායක හර්දීක් පාණ්ඩ්‍යා පන්දු 9 කදී හයේ පහරක් සහ හතරේ පහර 3 ක් සමග නොදැවී ලකුණු 21 ක් රැස්කරමින් සිය කණ්ඩායමේ ජයග්‍රහණය ඉක්මන් කළේය. 

විල් ජැක්ස් පන්දු 26 කදී හයේ පහර 2 ක් සහ හතරේ පහර 3 ක් සමග ලකුණු 36 ක්ද, ආරම්භක පිතිකරු රයන් රිකෙල්ටන් පන්දු 23 කදී හතරේ පහර 5 ක් සමග ලකුණු 31 ක්ද රැස්කරමින් ජයග්‍රහණයට දායකත්වය ලබාදුන්හ. සූර්යකුමාර් යාදව් පන්දු 15 කින් හයේ පහර 2 ක් සහ හතරේ පහර 2 ක් සමග ලකුණු 26 ක්ද, රෝහිත් ශර්මා පන්දු 16 කින් හයේ පහර 3 ක් සමග ලකුණු 26 ක්ද රැස්කළහ. 

දක්ෂ පන්දු යැවීමක නිරත වූ පැට් කමින්ස් සිය ඕවර 4 ලකුණු 26 කට සීමා කරමින් කඩුලු 3 ක් දවාගත් නමුත් ඔහුට මුම්බායි කණ්ඩායමේ ජයග්‍රහාහී මාවත අවහිර කිරීමට නොහැකි විය. ජයග්‍රහණය සඳහා මුම්බායි කණ්ඩායමට ලකුණු 2 ක් පමණක් අවැසිව තිබියදී 18 වැනි ඕවරය ලකුණකට සීමා කරමින් කඩුලු 2 ක් බිඳහෙළීමට ඒෂාන් මාලිංග සමත් විය.  

පළමුවෙන් පන්දුවට පහරදුන් හයිද්‍රාබාද් කණ්ඩායම ඕවර 20 අවසානයේ කඩුලු 5 ක් දැවී ලකුණු 162 ක් ලබාගත් අතර එහිදී සිය කණ්ඩායමට වේගවත් ආරම්භයක් ලබාදුන් අභිෂේක් ශර්මා පන්දු 28 කින් ලකුණු 40 ක් රැස්කළේ හතරේ පහර 7 ක් සමගිනි. ට්‍රැවීස් හෙඩ් (28) සමග එක්ව පළමු කඩුල්ල වෙනුවෙන් පන්දු 45 කදී ලකුණු 59 ක සම්බන්ධතාවක් ගොඩගැනීමටද අභිෂේක් සමත් විය.  

පන්දු 29 කදී වාර්තා වූ හෙඩ්ගේ ඉනිමට හතරේ පහර 3 ක් ඇතුළත් වූ අතර හෙන්රිච් ක්ලාසන් පන්දු 28 කදී ලකුණු 37 ක් රැස්කළේ හයේ පහර 2 ක් සහ හතරේ පහර 3 ක් සමගිනි. නිතිෂ් රෙඩ්ඩි පන්දු 21 කදී හතරේ පහරක් සමග ලකුණු 19 ක්ද, අනිකෙත් වෙර්මා පන්දු 8 කදී හයේ පහර 2 ක් සමග නොදැවී ලකුණු 18 ක්ද රැස්කරමින් සිය කණ්ඩායමේ ලකුණු සංඛ්‍යාව ඉහළ දැමූහ. 

සන්රයිසස් හයිද්‍රාබාද් පිල - ඕවර 20 කදී කඩුලු 5 ක් දැවී 162 
(අභිෂේක් ශර්මා 40, ට්‍රැවීස් හෙඩ් 28, නිතිෂ් රෙඩ්ඩි 19, හෙන්රිච් ක්ලාසන් 37, අනිකෙත් වෙර්මා නොදැවී 18, විල් ජැක්ස් 14/2) 

මුම්බායි ඉන්දියන්ස් පිල - ඕවර 18.1 කදී කඩුලු 6 ක් දැවී 166  
(රයන් රිකෙල්ටන් 31, රෝහිත් ශර්මා 26, විල් ජැක්ස් 36, සූර්යකුමාර් යාදව් 26, තිලක් වර්මා නොදැවී 21, හර්දීක් පාණ්ඩ්‍යා 21, පැට් කමින්ස් 26, ඒෂාන් මාලිංග 36/2) 

-036