(නාමල් පතිරගේ)
කොළඹ සුගතදාස පිටියේදී අඟහරුවාදා (25) ආරම්භ වන 102 වැනි ජාතික මලල ක්‍රීඩා තරගාවලියට සහභාගිවීම සදහා ඉතාලියේ වෙසෙන ශ්‍රී ලංකා කෙටි ධාවන ශූර යුපුන් ප්‍රියදර්ශන අබේකෝන් අද (24) දිවයිනට ළගා වන බව ශ්‍රී ලංකා මලල ක්‍රීඩා ආයතනය පවසයි.
ක්‍රීඩක ක්‍රීඩිකාවන් 700 දෙනෙකු පමණ මෙවර ජාතික මලල ක්‍රීඩා තරගාවලියට සහභාගි වන අතර එය බදාදා හා බ්‍රහස්පතින්දා (26 -27) යන දිනවලදීත් සුගතදාස පිටියේදී පැවැත්වේ.
මීටර් 100 (පිරිමි) ඉසව්වට තරග වැදීම සදහා ඔහු දිවයිනට ළගා වන අතර කොළඹදී ජාතික තරගාවලියට ඔහුගේ සහභාගිවීමේ ප්‍රධානතම අරමුණ වන්නේ 2024 පැරිස් ඔලිම්පික් උළෙල සදහා එකී ඉසව්වෙන් නිර්දේශ ලබා ගැනීමේ තවත් උත්සාහයක නිරතවීමය. කෙසේවුවත් කොළඹට පැමිණෙන ඔහු ඉරිදා (30) මලල ක්‍රීඩා ආයතනය සූදානම් කර තිබෙන විශේෂ තේරීම් තරගාවලියටත් සහභාගිවීමට තීරණය කර තිබේ.
මෙම තේරීම් තරගාවලියේ සුවිශේෂී වැදගත්කම වන්නේ එය පැරිස් ඔලිම්පික් නිර්දේශ ලබා ගැනීමට මෙරට ක්‍රීඩක ක්‍රීඩිකාවන්ට උත්සාහ දැරිය හැකි අවසන් තරග අවස්ථාව බවට පත්වීමයි. එසේම මෙම දිනය ලොව පුරා මලල ක්‍රීඩාවෙන් ක්‍රීඩක ක්‍රීඩිකාවන්ට නිර්දේශ ලබා ගැනීමට ලැබෙන අවසන් දිනයයි.
යුපුන් අබේකෝන් මෙරට තරගාවලියකට සහභාගි වන්නේ 2019 න් පසුවයි. අවසන් වරට වසර 2019 අගෝස්තු 28 වැනිදා කොළඹදී යුද හමුදා තරගාවලියට සහභාගිවීම ඔහුගේ මෙතෙක් සහභාගිවූ අවසන් දේශීය තරගාවලියයි. එහිදී ඔහු මිටර් 100 (පිරිමි ) ඉසව්වෙන් තත්පර 10.44 ක දක්ෂතාවයක් දක්වා තිබේ.
කෙසේවුවත් යුපුන් කොළඹට ළගා වන විට ලෝක ශ්‍රේණිගත කිරිම් අනුව මිටර් 100 (පිරිමි) ඉසව්වෙන් පසුවන්නේ 78 වැනි ස්ථානයේය. පැරිස් ඔලිම්පික් සදහා එහිදී සුදුසුකම් ලේඛනයෙන්, පංගු (වයිල්ඩ් කාඩ්) ක්‍රමයෙන් හා ප්‍රසාද ලකුණු යන ක්‍රම තුනෙන්ම තෝරා ගන්නේ ක්‍රීඩකයන් 56 දෙනෙකු පමණි.
ඒ අනුව ඔහුගේ මෙවර පැරිස් ඔලිම්පික් උත්සාහය මේ වන විට දැඩි අභියෝගයක් බවට පත්ව තිබේ.
කෙසේවුවත් ලෝක මලල ක්‍රීඩා ආයතනය බී කාන්ඩයේ තරගාවලියක් ලෙස නිර්දේශ කර ඇති ශ්‍රී ලංකාවේ ජාතික මලල ක්‍රීඩා ඉසව් ජයග්‍රහකයෙකුට ඔහුගේ මුළු ප්‍රසාද ලකුණු ගොන්නට ලකුණු 100 ක් එකතුවේ.
ඒ අනුව ප්‍ර්‍රසාද ලකුණු ක්‍රමයෙන් හෝ පැරිස් ඔලිම්පික් නිර්දේශ ලබා ගැනීමේ ඔහුගේ උත්සාහයට කොළඹ තරග සහභාගිත්වය වැදගත් වේ. ඉරිදා පැවැත්වෙන විශේෂ තේරීම් තරගාවලියට ලෝක සංගමය සී කාන්ඩයේ තත්වය ලබාදී තිබේ.
යුපුන් දකුණු ආසියාවේ වඩාත්ම අවධානය දිනා ගත් කෙටි ධාවකයෙකු බවට පත්ව සිටින්නේ 2022 සූරිච් නුවරදී ඔහු මීටර් 100 (පිරිමි) ඉසව්ව තත්පර 9.96 කට නිමා කිරීමෙන් තව දුරටත් දකුණු ආසියාවේ වේගවත්ම මිනිසා බවට පත්ව සිටීමයි.
පැරිස් ඔලිම්පික් මීටර් 100 ඉසව්වේ සුදුසුකම් ලේඛනයේ ක්‍රීඩකයෙකු සදහා අවම නිර්දේශය තත්පර 10.00 කි. කෙසේවුවත් යුපුන්ගේ 2022 සූරිච් නුවර දක්ෂතාවය පැරිස් ඔලිම්පික් නිර්දේශ නිල කාල වකවානුවට ගැනෙන්නේ නැත.
තරුෂි කරුණාරත්න (මීටර් 800 -කාන්තා), කාලිංග කුමාරගේ, අනුර දර්ශන (මීටර් 400 - පිරිමි), නදීෂා දිල්හානි ලේකම්ගේ (හෙල්ල විසි කිරීම) යන මෙවර පැරිස් ඔලිම්පික් නිර්දේශ ආසන්නයටම ළගාවී සිටින ශ්‍රී ලංකා මලල ක්‍රීඩක ක්‍රීඩිකාවන්ගේ මෙවර ජාතික තරගාවලියේ සහභාගිත්වයද ඒ හේතුවෙන් දැඩි අවධානයක් දිනා තිබේ.
පොදු රාජ්‍ය මණ්ඩලීය ක්‍රීඩා ලෝකඩ පදක්කම්ලාභී යුපුන් අබේකෝන් 2022 ටෝකියෝ ඔලිම්පික් උළෙල සදහාද නිර්දේශ ලබා ගත් ශ්‍රී ලංකා ක්‍රීඩකයෙකි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
