(ශානුක අරවින්ද)
වේල්ස් කුමර විදුහල සහ ශාන්ත සෙබස්තියන් විදුහල අතර මොරටුව ද සොයිසා ක්‍රීඩාංගණයේදී පැවැති 75 වැනි ‘රන් මහ සටන’ මහ ක්‍රිකට් තරගය අද (2 වැනිදා) ජය පැරදුමකින් තොරව නිමාවට පත් විය. එහෙත් පළමු ඉනිමේ ජයක් වාර්තා කළ ශාන්ත සෙබස්තියන් විදුහල තරගයේ වැඩි ගෞරව හිමිකර ගැනීමට සමත් විය.
එහිදී පිත්තෙන් මෙන්ම පන්දුවෙන්ද දස්කම් දැක්වූ ශාන්ත සෙබස්තියන් නායක රයන් දිසානායක තරගයේ වීරයා ලෙස සම්මාන දිනාගත් අතර එම විදුහලේම ලෙෂාන් ප්‍රනාන්දු දක්ෂතම පිතිකරුවා ලෙස සම්මාන හිමිකර ගත්තේය. වේල්ස් කුමර විදුහලේ රූසඳු සිල්වා සහ ඔෂාන් මනීෂ පිළිවෙලින් දක්ෂතම පන්දු යවන්නා සහ පන්දු රකින්නා ලෙස සම්මාන ලැබූහ.
තරගය නිමාවට පත්වන විට දෙවැනි ඉනිම වෙනුවෙන් පන්දුවට පහර දෙමින් සිටි වේල්ස් කුමරුවෝ, කඩුලු 6 ක් දැවී ලකුණු 157 ක් ලබා සිටියහ. එහිදී හයේ පහරක් සහ හතරේ පහර 5 ක් සමග ලකුණු 56 ක් රැස්කිරීමට ඔෂාන් මනීෂ සමත් වූ අතර අර්ධ ශතකය පෙනී පෙනී දැවී ගිය දෙනෙත් සිතුමිණ හතරේ පහර 3 ක් සමග ලකුණු 49 ක් රැස්කළේය.
කාසියේ වාසිය දිනූ ශාන්ත සෙබස්තියන් නායක රයන් දිසානායකගේ ආරාධයෙන් පළමුවෙන් පන්දුවට පහරදුන් වේල්ස් කුමර විදුහල සිය පළමු ඉනිම වෙනුවෙන් ලබාගත් ලකුණු 161 කට පිළිතුරු වශයෙන් ලකුණු 208 ක් රැස්කිරීමට ශාන්ත සෙබස්තියන් විදුහල සමත් විය.
එහිදී සෙබස්තියන් ඉනිමේ වැඩිම ලකුණු ලාභියා බවට පත්වූ ලෙෂාන් ප්‍රනාන්දු (50) හයේ පහරකින් සහ හතරේ පහර 5 කින් සිය අර්ධ ශතකය සැරසුවේය. සිය කණ්ඩායමේ ලකුණු සංඛ්‍යාව ඉහළ දැමීම සඳහා ලෙෂාන්ට අනගි සහායක් දුන් නායක රයන් හතරේ පහර 3 ක් සමග ලකුණු 33 ක් රැස්කළේය.
වේල්ස් කුමර පළමු ඉනිමේදී අර්ධ ශතයක් ලබාගැනීමට නායක රිවිත් ජයසූරිය (50) සමත් වූ අතර ඔහුගේ ඉනිමද හයේ පහරකින් සහ හතරේ පහර 5 කින් සමන්විත විය. ඉතා ඉවසිලිවන්ත ඉනිමක් ක්‍රීඩා කළ ගවීෂ ප්‍රනාන්දු පන්දු 113 කට මුහුණ දෙමින් ලකුණු 38 ක් රැස්කළේ හතරේ පහරක් සමගිනි.
වේල්ස් කුමර විදුහල් පළමු ඉනිම - ඕවර 68.4 කදී සියලු දෙනා දැවී 161
(රිවිත් ජයසූරිය 50, සුවස් ප්‍රනාන්දු 20, ගවීෂ ප්‍රනාන්දු 38, නෙතුල් අනුහස් 16, රූසඳු සිල්වා 16, රයන් දිසානායක 33/4, ෂෙනාස් හෂීන් 35/3, අදීෂ් අල්මේදා 41/2)
ශාන්ත සෙබස්තියන් විදුහල් පළමු ඉනිම - ඕවර 69.4 කදී සියලු දෙනා දැවී 208
(අදීෂ් අල්මේදා 19, රයන් දිසානායක 33, ලෙෂාන් ප්‍රනාන්දු 50, ෂෙෆාන් ප්‍රනාන්දු 23, මලින්ත සිල්වා 27, ෂෙනාස් හෂීන් 26, නෙතුල් අනුහස් 53/3, රූසඳු සිල්වා 30/3, රිවිත් ජයසූරිය 54/2)
වේල්ස් කුමර විදුහල් දෙවැනි ඉනිම - ඕවර 62 කදී කඩුලු 6 ක් දැවී 157
(පළිඟු පෙරේරා 21, දෙනෙත් සිතුමිණ 49, ඔෂාන් මනීෂ 56, මලින්ත සිල්වා 42/2, රයන් දිසානායක 47/2)
(ඡායාරූප - ඉසුරු පෙරේරා)
(ඡායාරූප - ගයාන් අමරසේකර)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
