(නාමල් පතිරගේ)
සැප්තැම්බර් 29 වැනිදා පැවැත්වීමට තීරණය කර තිබෙන ශ්‍රී ලංකා පාපන්දු ආයතනයේ නිලවරණය (2023-27) පාර්ශව දෙකක් අතර ඡන්ද සටනක් බවට පත්වීමෙන් අන්තර් ජාතික පාපන්දු සම්මේලනය ශ්‍රී ලංකාවට දැන් පනවා තිබෙන ජාත්‍යන්තර පාපන්දු තහනම ඉවත් කිරීමේ කටයුතු පමාවනු ඇතැයි වාර්තා වේ. නිලවරණය ඡන්ද විමසුමකට හැරීමෙන් එය පවත්වා අවසන් වනතුරු ඇතිවිය හැකි අවිනිශ්චිත තත්වයත් එහි දී ජාත්‍යන්තර පාපන්දු සම්මේලනය දැඩි ලස නිරීක්‍ෂණය කරමින් සිටින බවද එහිදී වැඩිදුරටත් වාර්තා වේ.
මෙම තත්ත්වයෙන් ශ්‍රී ලංකාවට එල්ලවී තිබෙන අනෙක් ප්‍රධානතම බලපෑම වී ඇත්තේ සැප්තැම්බර් 29 වැනිදා නිලවරණය පවත්වා අවසන්වනතුරු ලෝක කුසලන (2026) සුදුසුකම් තරග වටය සූදානම් වන ශ්‍රී ලංකා ජාතික පාපන්දු කණ්ඩායමට පහසුකම් සැලසීමේ කටයුතු අඩපණ වීමයි. ඒ සඳහා වගකීමක් ගත හැකි පාපන්දු ආයතනයේ පාර්ශවයක් නිලවරණය පවත්වා අවසන්වනතුරු තීරණය කිරීමට නොහැකිවීම ඊට ආසන්නතම හේතුවයි.
ජනවාරි 14 වැනිදා පැවැති ශ්‍රී ලංකා පාපන්දු ආයතනයේ නිලවරණයට (2023-24) තෙවැනි (දේශපාලන) පාර්ශවයක අතපෙවීම් සිදුවූ බවට චෝදනා කරමින් අන්තර් ජාතික පාපන්දු සම්මේලනය ශ්‍රී ලංකාවට ජාත්‍යන්තර පාපන්දු තහනමක් පැන වූයේ පසුගිය ජනවාරි 21 වැනිදා සිටය. එය ඉවත් කරවා ගැනීමට එම සම්මේලනය ශ්‍රී ලංකාවට පනවා තිබෙන ප්‍රධානතම කොන්දේසිය වන්නේ තමන් ලබා දී තිබෙන මාර්ගෝපදේශ මාලාවට අනුව යමින් ශ්‍රී ලංකා පාපන්දු ආයතනයේ මීළඟ නිලවරණය විධිමත්ව පවත්වා අවසන් කළ යුතු බවයි.
සැප්තැම්බර් 29 වැනිදා පැවැත්වීමට අපේක්‍ෂිත නිලවරණයේ දී ඊට ඉදිරිපත්වන සියලු පාර්ශව එකඟතාවයෙන් ඡන්ද විමසුමකට නොගොස් තනතුරුවලට පත්වීමෙන් මතභේදාත්මක තත්වය අවමකර ගත හැකි බව අන්තර් ජාතික පාපන්දු සම්මේලනයේ අදහස වී තිබේ.
ඊට අනුගත වෙමින් ජනවාරි 14 වැනිදා නිලවරණයේ දී බෙදී සිටි පාපන්දු ආයතනයේ හිටපු සභාපතිවරුන් වන ජස්වර් උමාර්, රංජිත් රුද්‍රිගු හා වෛද්‍ය මනිල් ප්‍රනාන්දු යන මහත්වරු මෙවර නිලවරණයේ දී එකම පාර්ශවයකට එක්වෙමින් නාම යෝජනා බාරදීම කැපී පෙණුනු සිදුවීමක් විය. එහෙත් සැප්තැම්බර් 29 වැනිදා පැවැත්වෙන නිලවරණයේ දී අනුරාධපුර ලීගයේ සභාපති දක්‍ෂිත සුමතිපාල මහතාගේ නායකත්වයෙන් තවත් පාර්ශවයක් නාමයෝජනා බාරදීමෙන් අන්තර් ජාතික පාපන්දු සම්මේලනයේ අදහස ක්‍රියාත්මක නොවීය.
කෙසේ වුවත් නිලවරණය පවත්වා අවසන් කිරීමේ කොන්දේසිය මත, ලෝක කුසලාන (2026) නිර්දේශිත කලාපීය තරග වටයට ශ්‍රී ලංකාව ඇතුළත් කර ගැනීමට අන්තර් ජාතික පාපන්දු සම්මේලනය ඉකුත්දා කටයුතු කළේය. ඒ අනුව ශ්‍රී ලංකාවේ ප්‍රතිවාදියා බවට පත්ව තිබෙන යේමනය හා තරග දෙකක් ලබන ඔක්තෝබර් 12 හා 17 යන දිනවලදී කොළඹ හා සානා යන දෙරටේ අගනගරවලදී පැවැත්වේ.
ශ්‍රී ලංකාව 2022 ජුනි 14 වැනිදා ආසියානු කුසලාන (2023) සුදුසුකම් තරග වටය යටතේ අවසන් වරට සහභාගී වූ ජාත්‍යන්තර තරගයේ දී මාලදිවයින මුණ ගැසී ගෝල 1-0 ක පරාජයක් ලබා තිබේ.
ශ්‍රී ලංකාව වසරක් තිස්සේ ජාත්‍යන්තර පාපන්දු තරගයකට සහභාගී නොවුවත් ජූලි 20 වැනිදා කළ අලුත්ම ලෝක පාපන්දු ශ්‍රේණිගත කිරීම් අනුව 207 සිට 204 දක්වා ඉදිරියට පැමිණියේය. එහෙත් ආසියාවේ තවමත් ශ්‍රී ලංකාව අන්තිමයාය. ඒ 46 වැනි ස්ථානයේ පසු වෙමිනි.
යේමනය අවසන් වරට ජාත්‍යන්තර පාපන්දු තරගයකට සහභාගී වෙමින් පසුගිය ජනවාරි 12 වැනිදා පැවැති ‘‘ගල්ෆ්’’ ශූරතා කුසලාන තරගයකදී ඉරාකය හමුවේ ගෝල 5-0 ක පරාජයක් ලබා තිබේ. ඔවුන් මේ වනවිට ලෝක පාපන්දු ශ්‍රේණිගත කිරීම් අනුව 156 වැනි ස්ථානයේ රැඳී සිටියි. ආසියාවේ පසුවන්නේ 46 කින් 31 වැනි ස්ථානයේය.
යේමනය ජාත්‍යන්තර පාපන්දු තරගයකදී ශ්‍රී ලංකාවට මුණ ගැසෙන පළමු අවස්ථාව මෙයයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
