අපරාජිත ඉතාලියට එරෙහිව ස්පාඤ්ඤය

ඉතාලි පාපන්දු කණ්ඩායම පුහුණුවීම්වල නිරතවෙමින්...

යූරෝ 2020 පාපන්දු තරගාවලියේ පළමු අවසන් පූර්ව තරගය ශ්‍රී ලංකා වේලාවෙන් හෙට (7 වැනිදා) අළුයම 12.30 ට එංගලන්තයේ වෙම්බ්ලි ක්‍රීඩංගණයේදී ආරම්භ වන අතර එහිදී අපරාජිත ඉතාලියට එරෙහිව ස්පාඤ්ඤය තරග බිමට පිවිසීමට නියමිතය. ස්පාඤ්ඤය මේ වන විට ලෝක පාපන්දු ශ්‍රේණිගත කිරීම්හි 6 වැනි ස්ථානයේ පසුවන අතර ඉතාලිය එහි 7 වැනි ස්ථානයේ රැදී සිටියි.

මෙවර තරගාවලියේ තරග 5 කට සහභාගී වී ඇති ඉතාලිය එම තරග 5 ම ජයගනිමින් මේ වන විට 100% ක ජයග්‍රාහී ප්‍රතිශතයක් රඳවාගෙන සිටියි. මේ වන විට ජාත්‍යන්තර පාපන්දු තරග 13 කදී පිට පිටම ජය ලබා සිටින ඉතාලිය අවසන් වරට සහභාගි වූ තරග 32 දීම පරාජය නොවී සිටීමටද සමත්ව සිටියි‍.

‘ඒ’ කාණ්ඩයේ ශූරයන් බවට පත්වෙමින් අවසන් 16 දෙනාගේ වටයට සුදුසුකම් ලැබූ ඉතාලිය, එහිදී ගෝල 2-1 ‍ක් ලෙස ඔස්ට්‍රියාව පරාජය කරමින් අර්ධ අවසන් පූර්ව වටයට පිවිසියේය. ඔවුන් අවසන් පූර්ව වටයට සුදුසුකම් ලබාගත්තේ අර්ධ අවසන් පූර්ව වටයේදී ලොව අංක ‍එකේ පාපන්දු කණ්ඩායම වන බෙල්ජියමට එරෙහිව ගෝල 2-1 ක ජයක් වාර්තා කරමිනි.

‘ඊ’ කාණ්ඩයේ දෙවැනි ස්ථානය හිමිකර ගනිමින් අවසන් 16 දෙනාගේ වටයට සුදුසුකම් ලැබූ ස්පාඤ්ඤය, අර්ධ අවසන් පූර්ව වටයට පිවිසියේ ක්‍රොයේෂියාවට එරෙහිව ගෝල 5-3 ක ජයක් වාර්තා කරමිනි. අර්ධ අවසන් පූර්ව වටයේදී ස්විට්සර්ලන්තයට එරෙහිව දඬුවම් පහර 3-1 ක ජයක් වාර්තා කරමින් ස්පාඤ්ඤය තරගාවලියේ අවසන් පූර්ව වටයට සුදුසුකම් ලබාගත්තේය.

මූලික වටයේදී තුර්කියට එරෙහිව ගෝල 3-0 ක් ලෙසද, ස්විට්සර්ලන්තයට එරෙහිව ගෝල 3-0 ක් ලෙසද, වේල්සයට එරෙහිව ගෝල 1-0 ක් ලෙසද ජය වාර්තා කිරීමට ඉතාලිය සමත් විය. මූලික වටයේදී ස්ලෝවැකියාවට ‍එරෙහිව ගෝල 5-0 ක ජයක් වාර්තා කළ ස්පාඤ්ඤය, පෝලන්තය සමග ගෝල 1-1 ක් ලෙසත්, ස්වීඩනය සමග ගෝල 0-0 ක් ලෙසත් සම විය.

මින් පෙර ඉතාලිය සහ ස්පාඤ්ඤය අවස්ථා 33 කදී එකිනෙකාට එරෙහිව තරගවැදී ඇති අතර ඉන් තරග 12 කදීම ජය ලැබීමට ඉතාලිය සමත්වී ඇත. සෙසු තරග 21 න් 12 ක්ම ජය පැරදු‍මකින් තොරව නිමාවට පත්වී ඇති අතර ස්පාඤ්ඤයට ජයගැනීමට හැකි වී ඇත්තේ තරග 9 ක් පමණි. ඒ අනුව මෙම තරගයේදී කණ්ඩායම් දෙක අතර ඉතා තියුණු සටනක් දැක බලාගැනීමට ප්‍රේක්ෂකයන්ට අවස්ථාව උදාවනු නොඅනුමානය.

කෙසේ වුවත් 2017 වසරේ සැප්තැම්බර් මාසයෙන් පසුව ඉතාලිය සහ ස්පාඤ්ඤය එකිනෙකාට එරෙහිව තරග වැදී නොමැති අතර ඔවුන් එකිනෙකා හමුවන්නේ වසර 4 කට පමණ පසුවය. අවසන් වරට දෙටර අතර පැවැති තරගය ලෝක කුසලාන පාපන්දු තරගයක් වන අතර එහිදී ගෝල 3-0 ක් ලෙස ඉතාලිය පරාජය කිරීමට ස්පාඤ්ඤය සමත්වී ඇත.

අවසන් වටර ස්පාඤ්ඤය පරාජය කිරීමට ඉතාලිය සමත්ව ඇත්තේ 2016 වසරේ ජූනි මාසයේදී වන අතර යූරෝ පාපන්දු තරගයක් වූ එම තරගයෙන් ගෝල 2-0 ක් ලෙස ඉතාලිය ජය ලැබීය. මේ දක්වා පැවැති යූරෝ පාපන්දු තරගාවලි 15 න් 3 ක ශූරයන් බවට පත්වීමට ස්පාඤ්ඤය (1964, 2008 සහ 2012) සමත්වී ඇති අතර ඉතාලිය (1968) එක් වරක් එම ශූරතාවට හිමිකම් කීවේය.  

මෙම තරගයෙන් ජය ලබන කණ්ඩායම මේ මස 11 වැනිදා පැවැත්වෙන අවසන් මහ තරගයේදී එංගලන්තයට හෝ ඩෙන්මාර්කයට එරෙහිව තරග වැදීම සඳහා අවස්ථාව උදා කරගනු ඇත. එංගලන්තය සහ ඩෙන්මාර්කය අතර පැවැත්වෙන අවසන් පූර්ව තරගය ශ්‍රී ලංකා වේලාවෙන් අනිද්දා (8 වැනිදා) අලුයම 12.30 ට ආරම්භ වේ.

ස්පාඤ්ඤ පාපන්දු කණ්ඩායම පුහුණුවීම්වල නිරතවෙමින්...

- 036