එංගලන්ත පාපන්දු කණ්ඩායම...
යූරෝ 2020 පාපන්දු තරගාවලියේ සිවුවැනි අර්ධ අවසන් පූර්ව තරගය ශ්‍රී ලංකා වේලාවෙන් හෙට (4 වැනිදා) අළුයම 12.30 ට ආරම්භ වන අතර එහිදී එංගලන්තයට එරෙහිව යුක්රේනය තරග බිමට පිවිසෙනු ඇත. එංගලන්තය මේ වන විට ලෝක පාපන්දු ශ්‍රේණිගත කිරීම්හි 4 වැනි ස්ථානයේ පසුවන අතර යුක්රේනය එහි 24 වැනි ස්ථානයේ රැඳී සිටියි.
‘ඩී’ කාණ්ඩයේ ශූරයන් බවට පත්වෙමින් අවසන් 16 දෙනාගේ වටයට සුදුසුකම් ලැබූ එංගලන්තය, එහිදී ගෝල 2-0 ක් ලෙස ප්‍රබල ජර්මනිය පරාජය කරමින් අර්ධ අවසන් පූර්ව වටයට පිවිසියේය. ‘සී’ කාණ්ඩයේ තෙවැනි ස්ථානය හිමිකර ගනිමින් අවසන් 16 දෙනාගේ වටයට සුදුසුකම් ලැබූ යුක්රේනය, අර්ධ අවසන් පූර්ව වටයට පිවිසියේ එහිදී ස්වීඩනයට එරෙහිව ගෝල 2-1 ක ජයක් වාර්තා කරමිනි.
මූලික වටයේදී ක්‍රොයේෂියාවට එරෙහිව ගෝල 1-0 ක් ලෙසද, චෙක් ජනරජයට එරෙහිව ගෝල 1-0 ක් ලෙසද ජය වාර්තා කළ එංගලන්තය, ස්කොට්ලන්තය සමග ගෝල 0-0 ක් ලෙස සමවිය. එහිදී උතුරු මෙසිඩෝනියාවට එරෙහිව ගෝල 2-1 ක ජයක් වාර්තා කළ යුක්රේනය, නෙදර්ලන්තය හමුවේ ගෝල 3-2 ක් ලෙසද, ඔස්ට්‍රියාව හමුවේ ගෝල 1-0 ක් ලෙසද පරාජයට පත්විය.
මින් පෙර එංගලන්තය සහ යුක්රේනය අවස්ථා 7 කදී එකිනෙකාට එරෙහිව තරගවැදී ඇති අතර ඉන් තරග 4 කදීම ජය වාර්තා කිරීමට එංගලන්තය සමත් වී ඇත. එහිදී යුක්රේනයට ජයගත හැකිවී ඇත්තේ එක් තරගයක් පමණි. දෙරට අතර පැවැති සෙසු තරග 2 ජය පැරදුමකින් තොරව නිමාවී ඇත.
කෙසේ වුවත් 2013 වසරේ සැප්තැම්බර් මාසයෙන් පසුව එංගලන්තය සහ යුක්රේනය එකිනෙකාට එරෙහිව තරග වැදී නොමැති අතර මෙම තරගයේදී ඔවුන් එකිනෙකා හමුවන්නේ වසර 8 කට පසුවය. අවසන් වරට දෙටර අතර පැවැති තරගය ලෝක කුසලාන පාපන්දු තරගයක් වූ අතර එය ගෝල 0-0 ක් ලෙස ජය පැරදුමකින් තොරව නිමාවට පත් වී ඇත.
අවසන් වටර යුක්රේනය පරාජය කිරීමට එංගලන්තය සමත්ව ඇත්තේ 2012 වසරේ සැප්තැම්බර් මාසයේදී වන අතර යූරෝ පාපන්දු තරගයක් ලෙස පැවැති එම තරගයෙන් ගෝල 1-0 ක් ලෙස එංගලන්තය ජය ලැබීය. එංගලන්තයට එරෙහිව තරගයක් ජයගැනීමට යුක්රේනය සමත්ව ඇත්තේ මීට වසර 12 කට පමණ ඉහතදී වන අතර ඒ ගෝල 1-0 ක් ලෙස 2009 වසරේ ඔක්තෝබර් මාසයේදී පැවැති ලෝක කුසලාන පාපන්දු තරගයකදීය.
මෙම තරගයෙන් ජය ලබන කණ්ඩායම මේ මස 7 වැනිදා පැවැත්වෙන දෙවැනි අවසන් පූර්ව තරගයේදී ඩෙන්මාර්කයට හෝ චෙක් ජනරජයට එරෙහිව තරග වැදීම සඳහා අවස්ථාව උදා කරගනු ඇත. ඩෙන්මාර්කය සහ චෙක් ජනරජය අතර පැවැත්වෙන අර්ධ අවසන් පූර්ව තරගය ශ්‍රී ලංකා වේලාවෙන් අද (3 වැනිදා) රාත්‍රී 9.30 ට ආරම්භ වේ.
යුක්රේන පාපන්දු කණ්ඩායම ...
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
