වසර 55 කට පසුව පිළිමළුන් පිටුදැකීමේ වටයේ තරගයකදී ජර්මනිය පරාජය කිරීමට එංගලන්තය අඟහරුවාදා සමත් විය. යූරෝ 2020 පාපන්දු තරගාවලියේ අවසන් 16 දෙනාගේ වටය යටතේ පැවැති එම තරගය ගෝල 2-0 ක් ලෙස ජයගැනීමට සමත් වීමත් සමග එංගලන්තය තරගාවලියේ අර්ධ අවසන් පූර්ව වටයට සුදුසුකම් ලැබීය.
පළමු අර්ධය නිමාවන විට දෙපිලම ගෝල ලබා නොසිටි නමුත් තරගයේ 75 වැනි සහ 86 වැනි විනාඩිවලදී ගෝල ලබාගත් එංගලන්ත ක්‍රීඩකයයෝ අවසන් මොහොතේදී ජර්මනිය තරගාවලියෙන් ඉවතට ඇද දැමූහ. ලුක් ෂෝගේ සහයෝගයෙන් රහීම් ස්ටර්ලින් එංගලන්තය වෙනුවෙන් පළමු ගෝලය ලබාගත් අතර ජැක් ග්‍රීලිෂ්ගේ සහයෝගයෙන් නායක හැරී කේන් සිය කණ්ඩායම වෙනුවෙන් දෙවැනි ගෝලය ලබාගත්තේය.
මෙම තරගයට පෙර එංගලන්තය ලෝක පාපන්දු ශ්‍රේණිගත කිරීම්හි 4 වැනි ස්ථානයේ පසුවූ අතර ජර්මනිය එහි 12 වැනි ස්ථානයේ රැදී සිටියේය. මූලික වටයේදී ක්‍රොයේෂියාවට එරෙහිව ගෝල 1-0 ක් ලෙසද, චෙක් ජනරජයට එරෙහිව ගෝල 1-0 ක් ලෙසද ජය වාර්තා කළ එංගලන්තය, ස්කොට්ලන්තය සමග ගෝල 0-0 ක් ලෙස සම වෙමින් ‘ඩී’ කාණ්ඩයේ ශූරයන් ලෙස අවසන් 16 දෙනාගේ වටයට සුදුසුකම් ලැබීය.
මෙම තරගයේදී එංගලන්තය හමුවේ පරාජය වීම හේතුවෙන් තරගාවලියෙන් ඉවතට විසිවූ ජර්මනිය අවසන් 16 දෙනාගේ වටයට පිවිසියේ මූලික වටයේදී එක් ජයග්‍රහණයක් ලබා ‘එෆ්’ කාණ්ඩයේ දෙවැනියා ලෙසිනි. එහිදී පෘතුගාලයට එරෙහිව ගෝල 4-2 ක ජයක් ලැබූ ජර්මනිය, හංගේරියාව සමග ගෝල 2-2 ක් ලෙස සම වෙමින් ප්‍රංශය හමුවේ ගෝල 1-0 ක් ලෙස පරාජයට පත්විය.
මෙම තරගයේදී ලැබූ ජයත් සමග ජූලි මස 3 වැනිදා අර්ධ අවසන් පූර්ව වටයේදී යුක්රේනයට එරෙහිව තරග වැදීම සඳහා එංගලන්තය අවස්ථාව උදා කරගත්තේය. ‘සී’ කාණ්ඩයේ තෙවැනි ස්ථානය හිමිකරගනිමින් අවසන් 16 දෙනාගේ වටයට සුදුසුකම් ලැබූ යුක්රේනය, එහිදී ඉතා තියණු සටනකින් පසුව ස්වීඩනයට එරෙහිව ගෝල 2-1 ක ජයක් වාර්තා කරමින් තරගාවලියේ අර්ධ අවසන් පූර්ව වටයට පිවිසියේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
