එංගලන්තය කොදෙව්වන්ගේ අපරාජිත බව බිඳ දමයි

(ශානුක අරවින්ද)  

විස්සයි-20 ලෝක කුසලාන ක්‍රිකට් තරගාවලියේ සුපිරි 8 දෙනාගේ වටය යටතේ බටහිර ඉන්දීය කොදෙව් පිල සහ එංගලන්තය අතර ශාන්ත ලුසියාහි ග්‍රොස් අයිලට් නුවර ඩැරන් සැමී ජාතික ක්‍රිකට් ක්‍රීඩාංගණයේදී පෙරේදා (19 වැනිදා) පැවැති තරගයෙන් කඩුලු 8 ක පහසු ජයක් වාර්තා කිරීමට එංගලන්තය සමත් විය. එංගලන්තයේ එම ජයත් සමග පිට පිටම තරග 4 ක් ජයගෙන සිටි කොදෙව්වන්ගේ අපරාජිත බව බිඳවැටිණ.

ජයග්‍රහණය සඳහා ලකුණු 181 ක ඉලක්කයක් හඹාගිය එංගලන්තය ඕවර 17.3 ක් අවසානයේ කඩුලු 2 ක් දැවී ලකුණු 181 ක් ලබාගත් අතර ප්‍රවේගකාරී පිතිහරඹයක නිරත වූ ආරම්භක පිතිකරු පිලිප් සෝල්ට් පන්දු 47 කදී හයේ පහර 5 ක් සහ හතරේ පහර 7 ක් සමග නොදැවී ලකුණු 87 ක් රැස්කිරීමට සමත් විය.ෙ

ජොනී බෙයාස්ටෝ (නොදැවී 48) සමග එක්ව තෙවැනි කඩුල්ල වෙනුවෙන් පන්දු 44 කදී ලකුණු 97 ක නොබිඳුණු සම්බන්ධතාවක් ගොඩනගමින් සෝල්ට් සිය කණ්ඩායමේ ජයග්‍රහණය තහවුරු කළේය. පන්දු 26 කට මුහුණදුන් බෙයාස්ටෝ හයේ පහර 2 කින් සහ හතරේ පහර 5 කින් සිය ඉනිම අලංකාර කළේය.

පළමුවෙන් පන්දුවට පහරදුන් කෙ‍ාදෙව්වෝ ඕවර 20 අවසානයේ කඩුලු 4 ක් දැවී ලකුණු 180 ක් ලබාගත්හ. එහිදී ප්‍රවේගකාරී පිතිහරඹයක නිරත වූ නායක රෝමන් පවෙල් පන්දු 17 කදී හයේ පහර 5 ක් සමග ලකුණු 36 ක් රැස්කළේය. නිකලස් පූරන් පන්දු 32 කදී හයේ පහරක් සහ හතරේ පහර 4 ක් සමග ලකුණු 36 ක්ද, ජොන්සන් චාල්ස් පන්දු 34 කදී හයේ පහරක් සහ හතරේ පහර 4 ක් සමග ලකුණු 38 ක්ද රැස්කරමින් කොදෙව් ඉනිම ගොඩනැගූහ.  

බ්‍රෙන්ඩන් කිං (23) සමග එක්ව පළමු කඩුල්ල වෙනුවෙන් පන්දු 26 කදී ලකුණු 40 ක සම්බන්ධතාවක් ගොඩනැගූ ‍චාල්ස්, ඉන් නොනැවතී නිලසල් පූරන් සමග එක්ව දෙවැනි කඩුල්ල වෙනුවෙන් පන්දු 41 කදී ලකුණු 54 ක සම්බන්ධතාවක්ද පිහිටුවමින් කොදෙව් ඉනිම ගොඩනැගූහ. චාල්ස්ගේ දැවී ‍යෑමෙන් අනතුරුව රෝමන් පවෙල් සමග එක්ව තෙවැනි කඩුල්ල සඳහ‍ා පන්දු 23 කදී ලකුණු 43 ක් එක් කිරීමටද පූරන් සමත් විය.

බ.ඉ. කොදෙව් පිල - ඕවර 20 කදී කඩුලු 4 ක් දැවී 180    
(බෙන්ඩන් කිං 23, ජොන්සන් චාල්ස් 38, නිකලස් පූරන් 36, රෝමන් පවෙල් 36, ශර්ෆේන් රදර්ෆෝඩ් නොදැවී 28)

එංගලන්තය - ඕවර 17.3 කදී කඩුලු 2 ක් දැවී 181
(පිලිප් සෝල්ට් නොදැවී 87, ජොස් බට්ලර් 25, ජොනී‍ බෙයාස්‍ටෝ නොදැවී 48)