මූලික වටය පුරා අපරාජිතව සිටි නෙදර්ලන්තය යූරෝ 2020 පාපන්දු තරගාවලියෙන් ඉවතට ඇද දමමින් එහි අර්ධ අවසන් පූර්ව වටයට සුදුසුකම් ලබාගැනීමට චෙක් ජනරජය සමත් විය. ඒ අවසන් 16 දෙනාගේ වටයේ ඉරිදා පැවැති තරගයකදී නෙදර්ලන්තයට එරෙහිව ගෝල 2-0 ක පෙරළිකාර ජයක් වාර්තා කරමිනි.
තරගයේ පළමු අර්ධය නිමාවන විට දෙපිලම ගෝල ලබා නොසිටි අතර දෙවැනි අර්ධය ආරම්භ වී විනාඩි 10 ක් ගතවන විට චෙක් ජනරජයේ පැට්රික් ෂික්ට ගෝලයක් ලබාගැනීමට තිබූ අවස්ථාවක් වලක්වාළීම සඳහා නිතී විරෝධී ලෙස බාධා කිරීම හේතුවෙන් නෙදර්ලන්තයේ පැමතායිස් ඩි ලීග්ට් රතු කාඩ්පත පෙන්වා පිටියෙන් ඉවත් කිරීමට විනිසුරුවරයා කටයුතු කළේය.
ඒ අනුව තරගයේ විනාඩි 35 ක කාලයක් පුරා නෙදර්ලන්තයට ක්‍රීඩකයන් 10 දෙනකුගෙන් ක්‍රීඩා කිරීමට සිදුවූ අතර ඉන් නිසි ඵල නෙලාගත් චෙක් ජනරජ ක්‍රීඩකයෝ 68 වැනි සහ 88 වැනි විනාඩිවලදී ගෝල දෙකක් ලබාගනිමින් තරගයේ වාසිය තමන් වෙතට හරවාගත්හ. 68 වැනි විනාඩියේදී තෝමස් කාලස්ගේ පන්දු යොමු කිරීමකින් තමා වෙත ඇදී ආ පන්දුව හිසින් දැල තුළට යෙමුකළ තෝමස් හෝල්ස්, 80 වැනි විනාඩියේදී පැට්රික් ෂික්ට ගෝලයක් ලබාගැනීම සඳහා දක්ෂ පන්දු යොමුකිරීමක නිරත විය.
මෙම තරගයට පෙර නෙදර්ලන්තය ලෝක පාපන්දු ශ්‍රේණිගත කිරීම්හි 16 වැනි ස්ථානයේ පසුවූ අතර චෙක් ජනරජය එහි 40 වැනි ස්ථානයේ රැදී සිටියේය. මූලික වටයේදී යුක්රේනයට එරෙහිව ගෝල 3-2 ක් ලෙසද, ඔස්ට්‍රියාවට එරෙහිව ගෝල 2-0 ක ලෙසද, උතුරු මෙසිඩෝනියාවට එරෙහිව ගෝල 3-0 ක් ලෙසද ජය ලබමින් ‘සී’ ශූරයන් ලෙස නෙදර්ලන්තය අවසන් 16 දෙනාගේ වටයට සුදුසුකම් ලැබීය.
නෙදර්ලන්තයේ ඉදිරි ගමන් මඟ අවහර කර දැමූ චෙක් ජනරජය මෙවර තරගාවලියේ අවසන් 16 දෙනාගේ වටයට සුදුසුකම් ලැබුවේ මූලික වටයේදී එක් ජයග්‍රහණයක් පමණක් ලබා ‘ඩී’ කාණ්ඩයේ තෙවැනියා ලෙසිනි. එහිදී ස්කොට්ලන්තයට එරෙහිව ගෝල 2-0 ක ජයක් ලැබූ චෙක් ජනරජය, ක්‍රොයේෂියාව සමග ගෝල 1-1 ක් ලෙස සම වූ අතර එංගලන්තය හමුවේ ගෝල 1-0 ක් ලෙස පරාජයට පත්විය.
මෙම තර‍ගයේදී ලැබූ ජයත් සමග ජූලි මස 3 වැනිදා අර්ධ අවසන් පූර්ව වටයේදී ඩෙනිමාර්කයට එරෙහිව තරග වැදීම සඳහා චෙක් ජනරජය අවස්ථාව උදා කරගත්තේය. ‘බී’ කාණ්ඩයේ දෙවැනියා ලෙසින් අවසන් 16 දෙනාගේ වටයට සුදුසුකම් ලැබූ ඩෙන්මාර්කය, එහිදී වේල්සයට එරෙහිව ගෝල 4-0 ක පහසු ජයක් වාර්තා කරමින් තරගාවලියේ අර්ධ අවසන් පූර්ව වටයට පිවිසියේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
