ක්වින්ටින් ඩි’ කොක්ගේ වේගවත් පිතිහරඹය හමුවේ ඉන්දීය ප්‍රිමියර් ලීග් තරගාවලියේ හයවැනි තරගය ලෙස රාජස්ථාන් රෝයල්ස් කණ්ඩායම සහ කොල්කටා නයිට් රයිඩර්ස් කණ්ඩායම අතර ගුවහටි නුවරදී ඊයේ (26 වැනිදා) පැවැති තරගයෙන් කඩුලු 8 ක ජයක් වාර්තා කිරීමට කොල්කටා කණ්ඩයම සමත් විය.
ජයග්‍රහණය සඳහා ලකුණු 152 ක ඉලක්කයක් හඹාගිය කොල්කටා ක්‍රීඩකයෝ ඕවර 17.3 ක් අවසානයේ කඩුලු 2 ක් දැවී ඉලක්කය සපුරාගත්හ. එහිදී වේගවත් පිතිහරඹයක නිරත වූ ක්වින්ටින් ඩි’කොක් පන්දු 61 කදී හයේ පහර 6 ක් සහ හතරේ පහර 8 ක් සමග නොදැවී ලකුණු 97 ක් රැස්කරමින් සිය කණ්ඩායම ජයග්‍රහණය කරා ගෙන ගියේය.
අන්ග්ක්‍රිෂ් රඝුවංශි (නොදැවී 22) සමග එක්ව තෙවැනි කඩුල්ල වෙනුවෙන් පන්දු 44 කදී ලකුණු 83 ක සම්බන්ධතාවක් ගොඩනැගීමටද ඩි’කොක් සමත් වූ අතර පන්දු 17 කදී වාර්තා වූ රඝුවංශිගේ ඉනිම හතරේ පහර 2 කින් සමන්විත විය. නායක අජින්ක්‍යා රහනේ පන්දු 15 කින් ලකුණු 18 ක් රැස්කළේ හයේ පහරක් සහ හතරේ පහරක් මගිනි.
පළමුවෙන් පන්දුවට පහරදුන් රාජස්ථාන් කණ්ඩායම ඕවර 20 අවසානයේ කඩුලු 9 ක් දැවී ලකුණු 151 ක් ලබාගත් අතර රජස්ථාන් ඉනිමේ වැඩිම ලකුණු ලාභියා බවට පත්වූ ධරූව් ජුරෙල් පන්දු 28 කදී හතරේ පහර 5 ක් සමග ලකුණු 33 ක්ද, ආරම්භක පිතිකරු යෂස්වි ජයිස්වාල් පන්දු 24 කදී හයේ පහර 2 ක් සහ හතරේ පහර 2 ක් සමග ලකුණු 29 ක්ද රැස්කළහ.
දක්ෂ පන්දු යැවීමක නිරත වූ වරුණ් චක්‍රවර්ති සිය ඕවර 4 ලකුණු 17 කට සීමා කරමින් කඩුලු 2 ක් දවාගත් අතර රාජස්ථාන් පිතකරුවන් පීඩනයට පත්කිරීම සඳහා ඔහුට අනගි සහායක් දුන් මුයින් අලී, වයිභව් අරෝරා සහ හර්ෂිත් රානාද කඩුලු 2 බැගින් බිඳහෙළීමට සමත් වූහ.
රජස්ථාන් රෝයල්ස් පිල - ඕවර 20 කදී කඩුලු 9 ක් දැවී 151
(යෂස්වි ජයිස්වාල් 29, රියාන් පරාග් 25, ධුරූව් ජුරෙල් 33, ජොෆ්රා ආචර් 16, වරුණ් චක්‍රවර්ති 17/2, මුයින් අලී 23/2, වයිභව් අරෝරා 33/2, හර්ෂිත් රානා 36/2)
කොල්කටා නයිට් රයිඩර්ස් පිල - ඕවර 17.3 කදී කඩුලු 2 ක් දැවී 153
(ක්වින්ටින් ඩි’ කොක් නොදැවී 97, අජින්ක්‍යා රහනේ 18, අන්ග්ක්‍රිෂ් රඝුවංශි නොදැවී 22)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
