(නාමල් පතිරගේ)
දකුණු ආසියානු පාපන්දු සම්මේලනයේ විධායක සභාව අද (9) රැස්වී ගත් තීන්දුවකට අනුව 13 වැනි දකුණු ආසියානු (සාෆ්) පාපන්දු ශූරතාවලියේ සත්කාරයෙන් බංග්ලාදේශය ඉවත් කර එය මාලදිවයිනට පිරිනැමීමට තීරණය වී තිබේ. ඒ අනුව 13 වැනි සාෆ් පාපන්දු ශූරතා තරගාවලිය මාලදිවයිනේ සත්කාරයෙන් ‘මාලේ’ නුවරදී ලබන ඔක්තෝබර් 1 වැනිදා සිට 13 වැනිදා දක්වා පැවැත්වීමට අද පැවැති විධායක කමිටු රැස්වීමේදී වැඩිදුරටත් තීරණය වී තිබේ.
මෙම තරගාවලිය සඳහා භූතානයේ සහභාගීත්වය මෙතෙක් සනාථ වී නැති තත්ත්වයක තරගාවලියට සහභාගි වන රටවල් ගණන පහකට සීමා වන්නේ නම් මෙවර තරගාවලිය ලීග් තරගාවලියක් ලෙස පැවැත්වීමට සැලසුම් කෙරේ. එහිදී වැඩිම ප්‍රසාද ලකුණු ගණන ලබන කණ්ඩායම් දෙක අවසන් මහ තරගයට යොමු කෙරේ.
කෙසේ වුවත් භූතානය තරගාවලියට සහභාගි වන්නේ නම් රටවල් හයක් තරගාවලියට එක්වන බැවින් එවිට මූලික වටය පමණක් කාණ්ඩ දෙකට බෙදා පවත්වා අනතුරුව වැඩිම ප්‍රසාද ලකුණු ලබන රටවල් හතරක් පිළිමලුන් පිටුදැමීමේ ක්‍රමයට පැවැත්වෙන අවසන් වටයට ඉදිරිපත් කෙරේ.
සත්කාරක මාලදිවයින හැරෙන්නට ශ්‍රී ලංකාව, ඉන්දියාව, බංග්ලාදේශය, නේපාලය මෙවර තරගාවලියට එක්වන බව දැනටමත් සනාථ කර තිබේ.
වසර 2020 සැප්තැම්බර් මාසයේ ‘ඩකා’ නුවරදී පැවැත්වීමට සැලසුම් කර තිබූ තරගාවලිය කොවිඩ් වසංගත තත්ත්වය හේතුවෙන් දිගින් දිගටම කල් දැමීමට සිදු විය. එහෙත් බංග්ලාදේශයේ තවදුරටත් පවතින කොවිඩ් අවදානම හමුවේ 13 වැනි තරගාවලියේ සත්කාරය බාර ගැනීමට මාලදිවයින කැමැත්ත පළ කළේය.
ඒ සඳහා ‘සූම්’ තාක්ෂණය ඔස්සේ අද (9 වැනිදා) පැවැති දකුණු ආසියානු පාපන්දු සමුළුවේ විධායක සභාවේ අනුමැතිය හිමි වුණු බව ශ්‍රී ලංකා පාපන්දු සම්මේලනයේ සභාපති ජස්වර් උමාර් මහතා ‘ලංකාදීප’යට පැවසීය.
ශූරයන්ට ඇමරිකානු ඩොලර් 50,000 ක ත්‍යාගයක් ප්‍රදානය කෙරෙන මෙම තරගාවලියේ ගියවර (2018) ශූරතාව මාලදිවයින විසින් දිනා ගන්නා ලද්දේ ප්‍රබල ඉන්දීය කණ්ඩායම ගෝල 2-1 කට පරාජය කරමිනි.
මෙම තරගාවලියේ වැඩිම වාර ගණනක් ශූරතාව (හත් වරක්) දිනාගෙන ඇත්තේ ඉන්දියාවයි. ශ්‍රී ලංකාව එය දිනාගත් එකම අවස්ථාව 1995 කොළඹදී පැවැති තරගාවලියේදීය. ඒ අවසන් මහ තරගය සම වීමෙන් පසුව පිරිනැමුණු අතිරේක කාලය තුළදී ශ්‍රී ලංකාව රන් හෙවත් ගෝල්ඩන් ගෝලය (1-0) වාර්තා කිරීමෙනි.
දකුණු ආසියානු පාපන්දු සම්මේලනයේ උප සභාපතිවරයකු ලෙස ශ්‍රී ලංකා පාපන්දු සම්මේලනයේ හිටපු සභාපති අනුර ද සිල්වා මහතා තවදුරටත් කටයුතු කරයි.
දකුණු ආසියානු තරගාවලිය ඉලක්ක කරමින් ජාතික පාපන්දු සංචිතයේ පුහුණුවීම් මෙම 31 වැනිදා සිට ආරම්භ කිරීමට කටයුතු යොදා තිබේ. 2015 බංග්ලාදේශයේ පැවැති තරගාවලියේදී ශ්‍රී ලංකාව අවසන් පූර්ව වටය දක්වා පැමිණෙමින් දස්කම් දැක්වීය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
