ඕස්ට්‍රියාවට එරෙහිව ඊයේ (17 වැනිදා) පැවැති මූලික වටයේ තරගයෙන් ගෝල 2-0 ක ජයක් වාර්තා කළ නෙදර්ලන්තය, යූරෝ 2020 පාපන්දු තරගාවලියේ 16 දෙනාගේ වටයට සුදුසුකම් ලබාගැනීමට සමත් විය. එම ජයත් සමග ‘සී’ කාණ්ඩයේ පෙරමුණ ගැනීමටද නෙදර්ලන්තය සමත් වූ අතර ඔවුන් හමුවේ ලද පරාජය හේතුවෙන් ඕස්ට්‍රියාව එම කාණ්ඩයේ තෙවැනි ස්ථානය දක්වා ඇද වැටිණ.
ඩෙන්සිල් ඩම්ෆයර්ස් පන්දුව ලබාගැනීමේදී ඕස්ට්‍රියානු ක්‍රීඩක ඩේවිඩ් ඇලබා කළ නීති විරොධී ක්‍රියාවක් හේතුවෙන් තරගයේ 11 වැනි විනාඩියේදී නෙදර්ලන්තයට දඬුවම් පහරක් හිමි විය. එම දඬුවම් පහර සාර්ථක කරගැනීමට මෙම්පිස් ඩි‍පේ සමත් වීමත් සමග ගෝල 1-0 ක් ලෙස නෙදර්ලන්තයට පෙරමුණ අත්කර දෙමින් තරගයේ පළමු අර්ධය නිමාවට පත්විය.
දෙවැනි අර්ධය ආරම්භ වී විනාඩි 22 ක් ගතවන විට එනම් තරගයේ 67 වැනි විනාඩියේදී නෙදර්ලන්තය වෙනුවෙන් තවත් ගෝලයක් ලබාගත් ඩෙන්සිල් ඩම්ෆයර්ස් සිය කණ්ඩායමට ගෝල 2-0 ක පහසු ජයක් අත්කර දුන්නේය. එහිදී ඩැනියෙල් මැලන්ගේ පන්දු යොමුකිරීමක් ඔස්සේ තමා වෙත පැමිණි පන්දුව කල්යල් බලා ඔස්‍ට්‍රියානු පිලේ ආරක්ෂක ක්‍රීඩකයන් මෙන්ම දැළ රකින්නාද මුලුමුනින්ම පරාජය කරමින් දැළ තුළට යොමු කිරීමට ඩම්ෆයර්ස් සමත් විය.
2012 වසරේදී මෙන්ම 2016 වසරේදී පැවැති යූරෝ පාපන්දු තරගාවලීන්හි පිළිමළුන් පිටුදැකීමේ වටයට සුදුසුකම් ලබාගැනීමට අපොහොසත් වූ නෙදර්ලන්තය, මෙවර තරගාවලියේ තවත් තරගයක් ඉතිරිව තිබියදීම අවසන් 16 දෙනාගේ වටයට පිවිසීම කැපී පෙනෙන සිදුවීමකි. අවසන් වරට ඔවුන් පිළිමළුන් පිටුදැකීමේ වටයට සුදුසුකම් ලබා තිබුණේ 2008 වසරේ පැවැති යූරෝ පාපන්දු තරගාවලියේදීය.
- 036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
