(නාමල් පතිරගේ)
පරාජය වීමේ අපේක්‍ෂාවෙන් කිසිදු කණ්ඩායමක් තරගයකට සහභාගී නොවන බවත් හෙට (17) යේමනයට එරෙහිව පැවැත්වෙන තරගයේදීත් ශ්‍රී ලංකාවේ අපේක්‍ෂාව තරගය ජය ගැනීම පමණක්ම වන බවත් ශ්‍රී ලංකා ජාතික පාපන්දු කණ්ඩායමේ නායක චරිත බණ්ඩාර රත්නායක අද පාපන්දු නිවසේ දී පැවැති විශේෂ මාධ්‍ය හමුවක දී පැවැසීය.
ලෝක කුසලාන පාපන්දු (2026) තරගාවලියේ ආසියානු කලාපීය නිර්දේශිත පළමු තරග වටය යටතේ හෙට පස්වරු 3.00 රීඩ් මාවත ක්‍රීඩා සංකීර්ණ පිටියේ දී සත්කාරක ශ්‍රී ලංකාව හා යේමනය අතර පැවැත්වෙන දෙවැනි තරගය පිළිබඳව මාධ්‍ය වෙත අදහස් දක්වමින් චරිත බණ්ඩාර රත්නායක එසේ පැවසීය.
දෙරට අතර සෞදි අරාබියේ අබා නුවර දී පැවැති ලෝක කුසලාන (2026) නිර්දේශිත ආසියානු කලාප තරග වටයේ පළමු තරගයෙන් යේමනය ගෝල 3-0 ක ජයක් ලැබීය.
ඒ අනුව ශ්‍රී ලංකාව 2026 ලෝක කුසලාන තරගාවලියේ නිර්දේෂිත තරග වට සඳහා මෙතැන් සිට ඉදිරියට යාමට නම් අද කොළඹ දී පැවැත්වෙන දෙරට අතර දෙවැනි තරගයේ දී අවම වශයෙන් යේමනය ගෝල 4-0 කින් පරාජයට පත් කිරීම අනිවාර්ය වේ.
මේ හැරෙන්නට ශ්‍රී ලංකාවට ඒ සඳහා තවත් ඉතිරිව තිබෙන ආසන්නතම එකම විකල්පය වන්නේ අද තරගය අවම ගෝල 3-0 කට ජය ගැනීමයි. එහිදී තරග දෙකකින් සමන්විත දෙරට අතර මෙම තරගාවලිය සම වේ. මෙවැනි සමවන විටක දී ඊළඟ තරග වටයට මෙම දෙරටින් සුදුස්සා නිර්දේශ කර ගැනෙන්නේ දඬුවම් පහර ප්‍රදානය මගිනි.
නායක චරිත රත්නායක ඊයේ මාධ්‍ය හමුවේ දී මෙසේ ද පැවසීය.
‘‘පළමු තරගයේ දී සිදුවූ අපේ අඩුපාඩු හදාගෙන මේ තරගය හොඳින් අවසන් කරන්න බලාපොරොත්තු වෙනවා. පරදින්න බලාගෙන අපි කවුරුත් තරගවලට එන්නේ නෑ. මේ තරගයේදීත් අපේ අපේක්‍ෂාව ජයග්‍රහණය කිරීමයි.’’
හෙට තරගය සඳහා ශ්‍රී ලංකා කණ්ඩායමේ නායකයා ලෙස නම්කර සිටියේ නිකල්ස් හර්ෂ ප්‍රනාන්දුය. එහෙත් අසනීප තත්වයක් මැද ඔහු වෙනුවට පළමු තරගයේ දී නායකයා ලෙස කටයුතු කළ චරිත බණ්ඩාර රත්නායක හෙට පැවැත්වෙන දෙවැනි තරගයේදීත් ශ්‍රී ලංකා කණ්ඩායමේ නායකයා ලෙස නම්කර තිබේ.
හෙට තරගය සඳහා ආරාධනා පත් හැරෙන්නට ප්‍රවේශ පත්‍ර ප්‍රමාණයක් ද අලෙවි කෙරෙන අතර එහි ආදායම ජාතික ක්‍රීඩා අරමුදලට බැර කරන බව ශ්‍රී ලංකා පාපන්දු ආයතනයේ සභාපති ජස්වර් උමාර් මහතා පවසයි.
මේ අතර හෙට තරගය පස්වරු 3.00 වන විට ආරම්භ වන අතර රීඩ් මාවත ක්‍රීඩා සංකීර්ණයේ විදුලි ආලෝක ධාරා පද්ධතියේ උද්ගතව පවතින දෝෂ හේතුවෙන් මෙසේ අඳුර වැටීමට පෙර තරගය පවත්වා අවසන් කිරීමට තරග සංවිධායකයෝ උනන්දුවී තිබේ.
ශ්‍රී ලංකා පුහුණුකරු ඇන්ඩි මොරිසන් මහතා පැවසුවේ මේ අවස්ථාවේ දී ශ්‍රී ලංකා කණ්ඩායමෙන් ප්‍රාතිහාර්යයක් අපේක්‍ෂා කළ නොහැකි වුවත් පළමු තරගය හමුවේ වඩාත් හොඳින් හඳුනාගත් යේමන කණ්ඩායමට වෙනස් සැලැස්මක් යටතේ හොඳ සටනක් ලබාදීමට ශ්‍රී ලංකා කණ්ඩායම අදිටනෙන් පසුවන බවයි.
මාධ්‍ය හමුවට යේමන පාපන්දු කණ්ඩායමේ නායක හරෝන් අල් සුබයිඩි හා එහි ප්‍රධාන පුහුණුකරු හිරොස්ලොව් ෙෂා්යුකුප් මහතා ද එක්ව සිටියහ. පළමු තරගය ජය ගැනීම තුළින් තමන් එක් කඩඉමක් පසුකර සිටින බවත් අද තරගයෙන් ඉලක්කය සම්පූර්ණ කර ගැනීමට උනන්දුවී සිටින බවත් එහිදී ඔවුන් පැවසූහ.
හෙට තරගය පරාජයට පත්වුවහොත් 2026 ලෝක කුසලාන පාපන්දු තරග ශ්‍රී ලංකාවේ සහභාගීත්වය එයින්ම අවසන් වේ.
23 වැනි ලෝක කුසලාන පාපන්දු තරගාවලිය 2026 ජුනි - ජූලි කාලසීමාවේ දී (දින තහවුරු කර නැත) ඇමෙරිකාව, කැනඩාව හා මෙක්සිකෝවේ සම සත්කාරයෙන් පැවැත්වේ. මෙතෙක් පැවැති ආකෘතිය වෙනස් කරමින් මෙවර ලෝක කුසලාන තරගාවලියේ අවසන් වටය සඳහා කණ්ඩායමේ සහභාගීත්වය 48ක් දක්වා ඉහළ නංවා තිබේ. මින් පෙර අවසන් වටයට සහභාගි කර ගත් කණ්ඩායම් ගණන 32 කට සීමා විය.
කොළඹදී අද දෙපිල තරගවදින විට ලෝක පාපන්දු ශ්‍රේණිගත කිරීම් අනුව ශ්‍රී ලංකාව 202 වැනි ස්ථානයේත්, යේමනය 156 වැනි ස්ථානයේත් කල්ගෙවයි.
වසර 2021 ජුනි මාසයේ සිට අද දක්වා ශ්‍රී ලංකාව සහභාගි වූ ජාත්‍යන්තර පාපන්දු තරග 14කදී ජයගෙන ඇත්තේ එකම (බංග්ලාදේශයට එරෙහිව) තරගයක් පමණි. තරග තුනක් ජයපරාජයෙන් තොරව අවසන් වී තිබේ.
මාධ්‍ය හමුවට එක්ව සිටි ශ්‍රී ලංකා කණ්ඩායමේ පුහුණුකරු ඇන්ඩි මොරිසන් මහතා හා නායක චරිත බණ්ඩාර රත්නායක...
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
