(නාමල් පතිරගේ)
’සෝල්’ නුවරදී අද (05) පැවැති ලෝක කුසලාන (2022) ආසියානු කලාප දෙවැනි වටයේ තරගයකදී ශ්‍රී ලංකාව ලෙබනනයට ගෝල 3-2කින් පරාජය වුවත් එය වාර්තා වන්නේ වසර 2009න් පසුව ජාත්‍යන්තර පාපන්දු තරගයකදී ශ්‍රී ලංකාව ලෙබනනයට පලකළ හොඳම දස්කම ලෙසයි.
වසර 2009දී නවදිල්ලි නුවර පැවැති ‘නේරු’ කුසලාන පාපන්දු තරගාවලියේදී ශ්‍රී ලංකාව ගෝල 4-3ක් ලෙස ලෙබනනය පරාජය කිරීමට සමත් විය. එහිදී ගෝල ත්‍රිත්වයක් ලබාගැනීමට මොහොමඩ් ඉසදීන්ට හැකිවිය.
අද (05) තරගයේදී ශ්‍රී ලංකා කණ්ඩායමේ උපනායක අහමඩ් වසීම් රසික් ගෝල 02ම වාර්තා කරමින් ශ්‍රී ලංකා කණ්ඩායමේ වීරයා බවට පත්වීම විවාදයක් නොවේ. එසේවුවත් තවත් ප්‍රධාන කරුණු 02ක් නිසා අද (05) තරගයේදී ශ්‍රී ලංකා කණ්ඩායම ජයග්‍රාහී ලෙබනන් කණ්ඩායමට වඩා කැපී පෙනුණේය. ඒ නායක සුජාන් පෙරේරාගේ වඩාත් විශිෂ්ඨ ගෝල රැකීමයි. එමෙන්ම දෙවැනි භාගයේදී ප්‍රතිවාදී ක්‍රීඩකයන් අපේක්ෂා නොකළ විශිෂ්ඨ තරග රටාවකට ශ්‍රී ලංකා පිල යොමුවීමයි.
ශ්‍රී ලංකාව බොහෝ පාපන්දු තරග අවස්ථාවලදී කඩා වැටීමට ලක්ව ඇත්තේ තරගයේ දෙවැනි භාගයේදීය. එහිදී ප්‍රතිවාදීන් වැඩිම ගෝල ගණනක් ශ්‍රී ලංකාවට එරෙහිව ලැබීමටද සමත්ව තිබේ. ශ්‍රී ලංකාවේ සේවය බාරගැනීමෙන් පසුව බොස්නියානු ජාතික පුහුණුකරු අමීර් ඇලජික් මහතා ශ්‍රී ලංකා කණ්ඩායම මෙහෙය වූ පළමු තරගයෙන්ම සිය පෞද්ගලික ප්‍රතිරූපය ආරක්ෂා කරගැනීමටද අද (05) තරගය බෙහෙවින් ඉවහල් වූ බව පෙනේ.
කෙසේවුවත් එම අවස්ථාව උදාකර ගැනීමට මෙම විදේශීය පුහුණුකරුවාට වසරකට වැඩි කාලයක් බලාසිටීමට සිදුවූයේ කෝවිඩ් වසංගතයෙන් ජාත්‍යන්තර පාපන්දු තරග පැවැත්වීම මුලුමනින්ම ඇණහිට තිබුණු නිසාය.
ලෝක කුසලාන (2022) ආසියානු කලාප දෙවැනි වටයේ ශ්‍රී ලංකාවට ඉතිරිව තිබෙන අවසන් තරගය ලබන බදාදා (09) සත්කාරක දකුණු කොරියාවට එරෙහිව යෙදී තිබේ.
“එච්” කාණ්ඩයේ ප්‍රසාද ලකුණු සටහනේ ශ්‍රී ලංකාවට තවදුරටත් ප්‍රසාද ලකුණු හිමිනොවේ. එහෙත් ලෙබනනය අද (05) ශ්‍රී ලංකාව මෙම තරග වටයේ දෙවැනි වතාවටත් පරාජය කිරීමත් සමග සිය ප්‍රසාද ලකුණු ගණන 07ක් දක්වා ඉහළ නංවා තිබේ.
එසේ වුවත් ‘එච්’ කාණ්ඩය පෙරමුණේ පසුවූයේ සම ප්‍රසාද ලකුණු 07කට දකුණු කොරියානුවන්ය.
මේ වනවිට උතුරු කොරියානුවන්ගේ ඉවත්වීමෙන් ’එච්’ කාණ්ඩයේ ප්‍රසාද ලකුණු සටහන සංශෝධනය කර තිබේ. ඒ උතුරු කොරියාව තරගාවලියට සහභාගී නොවූ බව සලකමිනි. එම තත්වය තුළ එතෙක් තරග 04ක් ජය ගනිමින් ප්‍රසාද ලකුණු සටහනේ පෙරමුණේ පසුවූ තුර්ක්මෙනිස්ථානය ලකුණු 06කට සීමා වෙමින් 04 වැනි තැනට වැටී තිබේ.
අද (05) තරගයේ වඩාත් කතාබහට ලක්වූ ශ්‍රී ලංකා ක්‍රීඩක වසීම් රසීක් දඬුවම් පහරකින් සිය දෙවැනි ගෝලය වාර්ති කිරීම ඔහුගේ විශිෂ්ඨ පන්දු පහර දීම සනාථ කළ කදිම අවස්ථාවක් විය. ඔහු ශ්‍රී ලංකා කණ්ඩායමේ හිටපු නායකයෙකි. ඔහුගේ ක්‍රීඩා සමාජය නාවලපිටිය අප්කන්ටි්‍ර ක්‍රීඩා සමාජයයි. අද (05) ඔහු වාර්තා පොතට ඇතුළත් වූයේ මෙම තරගවටයේදී මෙතෙක් ශ්‍රී ලංකාවෙන් ගෝල වාර්තා කළ එකම ක්‍රීඩකයා බවට පත්වෙමිනි.
ශ්‍රී ලංකාව අද (05) වනවිට තරග 06කට මුහුණ දෙමින් එම සියලු තරග පරාජයට පත්වී ප්‍රතිවාදීන්ට එරෙහිව රැස්කර ඇත්තේද රසීක්ගේ ගෝල 02 පමණි. එසේ වුවත් එකී සියලු තරගවලදී ප්‍රතිවාදීන් ගෝල 18ක් ශ්‍රී ලංකාවට එරෙහිව රැස්කිරීමට සමත්ව තිබේ.
මෙම තරගවටයේදී අද (05) මුණගැසුණු ලෙබනනය හමුවේ ශ්‍රී ලංකාව වසර 2019 ඔක්තෝබර් 15 වැනිදා කොළඹදී දෙරට අතර පැවැති පළමු තරගයෙන් ගෝල 3-0කින් පරාජය වී තිබේ.
අද (05) ශ්‍රී ලංකා කණ්ඩායම වෙතින් කැපීපෙනෙන වර්ධනයක් පලවී තිබේ. දෙරට අතර පළමු තරගයේදී ලෙබනනයේ ජයග්‍රහණයට දඬුවම් පහර 02ක්ද හවුල් කරගෙන තිබේ. ශ්‍රී ලංකා පාපන්දු සම්මේලනයේ සභාපති අනුරද සිල්වා මහතා අද (05) තරගයෙන් පසුව ලංකාදීපයට පැවසූවේ පුහුණුකරු අමීර් ඇලජික් මහතාගේ සේවය පිළිබඳව තෘප්තිමත් වීමට එය අවස්ථාවක් වූ බවයි.
දස්කම් දැක්වූ ශ්‍රී ලංකා ක්‍රීඩකයන් හා කණ්ඩායම ඇගයීමට ඉදිරියේදී ශ්‍රී ලංකා පාපන්දු සම්මේලනය කටයුතු කරන බවත් ඔහු පැවසීය. අද (05) තරගය පැවැත්වෙන විට ලෝක පාපන්දු ශ්‍රේණිගත කිරීම් අනුව ලෙබනනය 93 වැනි ස්ථානයේද, ශ්‍රී ලංකාව 204 වැනි ස්ථානයේද පසුවිය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
