දකුණු ඇමරිකානු පාපන්දු තරගාවලියේ අර්ධ අවසන් පූර්ව වටයේ තරග මේ මස 3 සහ 4 යන දිනවලදී පැවැත්වෙන අතර එහිදී පේරු රාජ්‍යයට එරෙහිව පැරගුවේද, බ්‍රසීලයට එරෙහිව චිලී රාජ්‍යයද, උරුගුවේට එරෙහිව කොලොම්බියාවද, ආර්ජන්ටිනාවට එරෙහිව ඉක්වදෝරයද තරග බිමට පිවිසීමට නියමිතය.
තරගාවලියේ සැකැස්ම අනුව අවසන් මහ තරගයෙදී බ්‍රසීලය සහ ආර්ජන්ටිනාව හමුවීමට ඉඩ ඇතත් ඒ සඳහා කණ්ඩායම් දෙකම, පිට පිට තරග දෙකක් අපරාජිතව සිටිය යුතුව තිබේ.
තරගාවලියේ මූලික වටයේදී කණ්ඩායම් 10 ක් ‘ඒ’ සහ ‘බී’ ලෙස කාණ්ඩ 2 ක් යටතේ තරග 20 කට සහභාගි වූහ. ඔවුන් අතරින් ඉහළම දස්කම් දැක්වූ කණ්ඩායම් 8 අර්ධ අවසන් පූර්ව වටයට සුදුසුකම් ලබාගත් අතර සෙසු කණ්ඩායම් දෙක තරගාවලියෙන් ඉවතට විසිවිය.
පළමු ස්ථානයේ සිට සිවුවැනි ස්ථානය දක්වා පිළිවෙලින් ආර්ජන්ටිනාව, උරුගුවේ, පැරගුවේ සහ චිලී රාජ්‍යය ‘ඒ’ කාණ්ඩයෙන්ද, බ්‍රසීලය, පේරු රාජ්‍යය, කොලොම්බියාව සහ ඉක්වදෝරය ‘බී’ කාණ්ඩයෙන්ද අර්ධ අවසන් පූර්ව වටයට පිවිසීමේ අවස්ථාව උදා කරගත්හ.
එම රටවල් අතරින් ආර්ජන්ටිනාව සහ බ්‍රසීලය මූලික වටයේදී අපරාජිත බව රැකගනිමින් අර්ධ අවසන් පූර්ව වටයට පිවිසි අතර කණ්ඩායම් දෙකම මූලික වටයේ තරග 4 න් 3 ක් ජයගෙන එක් තරගයක් ජය පැරදුමකින් තොරව අවසන් කරගත්හ.
මූලික වටයේ පළමු තරගයේදී චිලී රාජ්‍යය සමග ගෝල 1-1 ක් ලෙස සම වූ ආර්ජන්ටිනාව, ඉන් අනතුරුව ගෝල 1-0 ක් ලෙස උරුගුවේද, ගෝල 1-0 ක් ලෙස පැරගුවේද, ගෝල 4-1 ක් ලෙස බොලීවියාවද පරාජය කළේය. ගෝල 3-0 ක් ලෙස වෙනිසියුලාවද, ගෝල 4-0 ක් ලෙස පේරු රාජ්‍යයද, ගෝල 2-1 ක් ලෙස කොලොම්බියාවද පරාජය කළ බ්‍රසීලය, මූලික වටයේ අවසන් තරගයේදී ගෝල 1-1 ක් ලෙස ඉක්වදෝරය සමග සම විය.
එබැවින් බොහෝ දුරට තරගාවලියේ අවසන් මහ තරගයේදී ආර්ජන්ටිනාව සහ බ්‍රසීලය එකිනෙකාට එරෙහිව තරග වැදීමට වැඩි අවස්ථාවක් පවතින බව පාපන්දු විචාරකයෝ පවසති. බ්‍රසීලය මේ වන විට ලෝක පාපන්දු ශ්‍රේණිගත කිරීම්හි තෙවැනි ස්ථානයේ පසුවන අතර ආර්ජන්ටිනාව එහි 8 වැනි ස්ථානයේ රැදී සිටියි.
සිකුරාදා (ශ්‍රී ලංකාවේ වේලාවෙන් - සෙනසුරාදා) පැවැත්වෙන අර්ධ අවසන් පූර්ව තරග දෙකේදී පේරු රාජ්‍යයට එරෙහිව පැරගුවේද, බ්‍රසීලයට එරෙහිව චිලී රාජ්‍යයද තරග වදින අතර එම තරග පිළිවෙලින් ශ්‍රී ලංකා වේලාවෙන් අළුයම 2.30 ට සහ 5.30 ට ආරම්භ වීමට නියමිතය.
සෙනසුරාදා (ශ්‍රී ලංකාවේ වේලාවෙන් - ඉරිදා) පැවැත්වෙන අර්ධ අවසන් පූර්ව තරග දෙකේදී උරුගුවේට එරෙහිව කොලොම්බියාවද, ආර්ජන්ටිනාවට එරෙහිව ඉක්වදෝරයද තරග වදිති. එම තරග පිළිවෙලින් ශ්‍රී ලංකා වේලාවෙන් අළුයම 3.30 ට සහ 6.30 ට ආරම්භ වීමට නියමිතය.
අවසන් පූර්ව තරගවලදී පරාජයට පත්වන කණ්ඩායම් දෙක අතර තරගාවලියේ තෙවැනි ස්ථානය තේරීමේ තරගය 9 වැනි සිකුරාදා (ශ්‍රී ලංකාවේ වේලාවෙන් - සෙනසුරාදා) අලුයම 5.30 ට පැවැත්වේ. අවසන් මහ තරගය මේ මස 10 වැනිදා (ශ්‍රී ලංකාවේ වේලාවෙන් ඉරිදා) අලුයම 5.30 ට පැවැත්වීමට නියමිතය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
