2022 ලෝක කුසලාන පාපන්දු තරගාවලියට සුදුසුකම් ලබාගැනීමේ තරගාවලියේ දකුණු ඇමරිකානු කාණ්ඩයේ තරගයකදී ගෝල 2-0 ක් ලෙස ඉක්වදෝරය පරාජය කිරීමට බ්‍රසීලය සමත් විය. ඊයේ (5 වැනිදා) ලබාගත් එම ජයත් සමගින් තවදුරටත් දකුණු ඇමරිකානු කාණ්ඩයේ පෙරමුණ රැක ගැනීමටද බ්‍රසීලයට හැකි විය.
සුදුසුකම් ලබාගැනීමේ තරගාවලියේ මෙතෙක් පැවැති තරග 5 න්ම ජය ලබා සිටින බ්‍රසීලය ලබන බදාදා (9 වැනිදා) පැරගුවේට එරෙහිව තරග වැදීමට නියමිතය. මින් පෙර පැවැති තරගවලදී බොලීවියාවට එරෙහිව ගෝල 5-0 ක් ලෙසද, පේරු රාජ්‍යයට එරෙහිව ගෝල 4-2 ක් ලෙසද, වෙනිසියුලාවට එරෙහිව ගෝල 1-0 ක් ලෙසද, උරුගුවේට එරෙහිව ගෝල 2-0 ක් ලෙසද ජය වාර්තා කිරීමට බ්‍රසීලය සමත් විය.
ඉක්වදෝරය සහ බ්‍රසීලය අතර පැවැති තරගයේ පළමු අර්ධය නිමාවන විට දෙපිලම ගෝල ලබාගැනීමට අසමත්ව සිටියේය. එහෙත් දෙවැනි අර්ධය ආරම්භ වී විනාඩ 20 ක් ගතවීමෙන් අනතුරුව එනම් 65 වැනි විනාඩියේදී රිචර්ලිසන් ඩි’ ඇන්ඩ්‍රාඩේ ගෝලයක් ලබාගනිමින් ගෝල 1-0 ක් ලෙස බ්‍රසීලය පෙරමුණට ගෙන ආවේය.
තරගයේ නියමිත කාලය නිමාවීමෙන් අනතරුව ක්‍රියාත්මක කෙරුණ අතිරේක කාලයේ අවසන් මිනිත්තුවේදී දඬුවම් පහරක් සාර්ථක කරගත් නේමාර් ද සිල්වා ගෝල 2-0 ක් ලෙස තරගය අවසන් කිරීම සඳහා බ්‍රසීලයට මඟ පාදා දුන්නේය. ඉක්වදෝර් කණ්ඩායමේ ගේබ්‍රියල් ජෙසස්ගේ නීතිවිරෝධී ක්‍රියාවක් හේතුවෙන් බ්‍රසීල කණ්ඩායමට එම දඬුවම් පහර හිමිවිය.
මේ අතර පෙරේදා පැවැති තරගවලදී ගෝල 3-0 ක් ලෙස පේරු රාජ්‍යය පරාජය කිරීමට කොලොම්බියාවද, ගෝල 3-1 ක් ලෙස වෙනිසියුලාව පරාජය කිරීමට බොලීවියාවද සමත් විය. පෙරේදා පැවැති සෙසු තරග අතරින් ආජන්ටිනාව සහ චිලී රාජ්‍යය අතර පැවැති තරගය ගොල් 1-1 ක් ලෙසද, උරු‍ගුවේ සහ පැරගුවේ අතර පැවැති තරගය ගෝල 0-0 ක් ලෙසද ජය පැරදුමකින් තොරව අවසන් විය.
සුදුසුකම් ලබාගැනීමේ තරගාවලියේදී රටවල් 10 ක් දකුණු ඇමරිකානු කාණ්ඩය යටතේ තරග වදින අතර මේ වන විට ඔවුන් සියලු දෙනාම තරග 5 කට බැගින් සහභාගි වී සිටිති. තරග 3 ක් ජයගෙන 2 ක් ජය පැරදුමෙන් තොරව අවසන් කරගෙන සිටින ආජන්ටිනාව ලකුණු සටහනේ දෙවැනි ස්ථානයේ පසුවන අතර තරග 3 ක් ජයගෙන 2 ක් පරාජය වී සිටින ඉක්වදෝරය එහි තෙවැනි ස්ථානයේ රැදී සිටියි.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
