බෙල්ජියම් කණ්ඩායම පුහුණුවීම්වල නිරතවෙමින්...
යූරෝ 2020 පාපන්දු තරගාවලියේ අර්ධ අවසන් පූර්ව වටයේ තරගයකදී බෙල්ජියමට එරෙහිව ඉතාලිය ශ්‍රී ලංකා වේලාවෙන් අනිද්දා (3 වැනිදා) අලුයම 12.30 ට තරග බිමට පිවිසෙයි. මෙම කණ්ඩායම් දෙකම මූලික වටයේ සිට මේ දක්වා සහභාගී වූ සෑම තරගයකින්ම ජය ලබා 100% ක ජයග්‍රාහී ප්‍රතිශතයක් රඳවාගෙන අපරාජිතව සිටීම නිසා මෙම තරගය කෙරෙහි වැඩි දෙනකුගේ අවධානය යොමුවී තිබේ.
කෙසේ වුවත් මෙම තරගයෙන් පසුව එක් කණ්ඩායමක අපරාජිත වාර්තාව බිඳවැටෙන අතර ඔවුන්ට තරගාවලියෙන් ඉවත්වීමටද සිදුවනු ඇත. ඉන් ජය ලබන කණ්ඩායම මේ මස 6 වැනිදා පැවැත්වෙන පළමු අවසන් පූර්ව තරගය සඳහා සුදුසුකම් ලබාගනු ඇත.
‘ඒ’ කාණ්ඩයේ ශූරයන් බවට පත්වෙමින් අවසන් 16 දෙනාගේ වටයට සුදුසුකම් ලැබූ ඉතාලිය, එහිදී ගෝල 2-1 ක් ලෙස ඔස්ට්‍රියාව පරාජය කරමින් අර්ධ අවසන් පූර්ව වටයට පිවිසියේය. ‘බී’ කාණ්ඩයේ ශූරයන් බවට පත්වෙමින් අවසන් 16 දෙනාගේ වටයට සුදුසුකම් ලැබූ බෙල්ජියම, අර්ධ අවසන් පූර්ව වටයට පිවිසියේ එහිදී පෘතුගාලයට එරෙහිව ගෝල 1-0 ක ජයක් වාර්තා කරමිනි.
මේ වන විට බෙල්ජියම ලෝක පාපන්දු ශ්‍රේණිගත කිරීම්හි පෙරමුණේ පසුවන අතර ඉතාලිය එහි 7 වැනි ස්ථානයේ රැදී සිටියි. මින් පෙර බෙල්ජියම සහ ඉතාලිය අවස්ථා 22 කදී එකිනෙකාට එරෙහිව තරගවැදී ඇති අතර ඉන් තරග 14 කදීම ජය ලැබීමට ඉතාලිය සමත්වී ඇත. සෙසු තරග 8 න් 4 ක් ජය පැරදු‍මකින් තොරව නිමාවට පත්වී ඇති අතර බෙල්ජියමට ජයගැනීමට හැකි වී ඇත්තේ තරග 4 ක් පමණි.
කෙසේ වුවත් 2016 වසරේ ජූනි මාසයෙන් පසුව බෙල්ජියම සහ ඉතාලිය එකිනෙකාට එරෙහිව තරග වැදී නොමැති අතර මෙම තරගයේදී ඔවුන් එකිනෙකා හමුවන්නේ වසර 5 කට පසුවය. අවසන් වරට දෙටර අතර පැවැති තරගයද යූරෝ කුසලාන පාපන්දු තරගයක් වන අතර එහිදී ගෝල 2-0 ක් ලෙස බෙල්ජියම පරාජය කිරීමට ඉතාලිය සමත්වී ඇත.
අවසන් වටර ඉතාලිය පරාජය කිරීමට බෙල්ජියම සමත්ව ඇත්තේ 2015 වසරේ නොවැම්බර් මාසයේදී වන අතර ජාත්‍යන්තර සුහද තරගයක් ලෙස පැවැති එම තරගයෙන් ගෝල 3-1 ක් ලෙස බෙල්ජියම ජය ලැබීය. ඒ අනුව මෙම තරගයේදී කණ්ඩායම් දෙක අතර ඉතා තියුණු සටනක් දැක බලාගැනීමට ප්‍රේක්ෂකයන්ට අවස්ථාව උදාවනු නොඅනුමානය.
මෙම තරගයෙන් ජය ලබන කණ්ඩායම අවසන් පූර්ව වටයේදී ස්විට්සර්ලන්තයට හෝ ස්පාඤ්ඤයට එරෙහිව තරග වැදීම සඳහා අවස්ථාව උදා කරගනු ඇත. ස්විට්සර්ලන්තය සහ ස්පාඤ්ඤය අතර පැවැත්වෙන අර්ධ අවසන් පූර්ව තරගය ශ්‍රී ලංකා වේලාවෙන් හෙට (2 වැනිදා) රාත්‍රී 9.30 ට ආරම්භ වේ.
පුහුණුවීම්වල නිරතවන ඉතාලි කණ්ඩායම...
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
