ඩෙන්මාර්කයට එරෙහිව ලබාගත් ගෝල 2-1 ක ජයත් සමගින් යූරෝ 2020 පාපන්දු තරගාවලියේ අවසන් 16 දෙනාගේ වටයට සුදුසුකම් ලබාගත් දෙවැනි කණ්ඩායම බවට බෙල්ජියම පත් විය. ලෝක පාපන්දු ශ්‍රේණිගත කිරීම්හි පෙරමුණේ පසුවන බෙල්ජියම ඊයේ (17 වැනිදා) පැවැති ‘බී’ කාණ්ඩයේ මූලික වටයේ තරගයකදී ඩෙන්මාකයට එරෙහිව ගෝල 2-1 ක ජයක් වාර්තා කළේය.
තරගය ආරම්භ වී විනාඩි 1 යි තත්පර 39 ක් ගතවනවාත් සමගම ගෝලයක් ලබාගත් යූසුෆ් පෝල්සන්, පළමු අර්ධය නිමාවන විට ගෝල 1-0 ක් ලෙස පෙරමුණ ගැනීම සඳහා ඩෙන්මාකයට අවස්ථාව උදා කර දුන්නේය. බෙල්ජියම් ආරක්ෂක වළල්ලේ සුළු වරදකින් උපරිම ඵල නෙලාගත් පෝල්සන්, දැල රකින්නාද පරාජය කරමින් පන්දුව දැල තුළට යොමු කළේය.
කෙ‍ෙස් වුවත් දෙවැනි අර්ධය ආරම්භ වී විනාඩි 9 ක් ගතවන විට එනම් 54 වැනි විනාඩියේදී බෙල්ජියම වෙනුවෙන් ගෝලයක් ලබාගත් තොර්ජන් හසාඩ් තරගය ගෝල 1-1 ක් ලෙස තරගය සම තත්ත්වයට පත් කළේය. හසාඩ්‍ට එම ගෝලය ලබාගැනීම සඳහා දක්ෂ පන්දු යොමු කිරීමක නිරත වූ කෙවින් ඩි’බ්‍රයන්, තරගය නිමා වීමට විනාඩි 20 ක් ඉතිරිව තිබියදී තවත් ගෝලයක් ලබා ගනිමින් බෙල්ජියමට ගෝල 2-1 ක ජයක් අත්කර දුන්නේය.
ඩෙන්මාර්කය සහභාගි වූ පළමු තරගය අතරතුර හෘදයාබාධයක් හේතුවෙන් ක්‍රීඩාංගණය මත සිහිසුන්ව ඇද වැටුණ ක්‍රිස්ටියන් එරික්සන් සිහි කරමින් මෙම තරගයේ 10 වැනි විනාඩියේදී තරගය මඳකට නතර කරමින් අත්පොලසන් දීමට ක්‍රීඩකයන්, විනිසුරුවරු සහ නරඹන්නෝ කටයුතු කළහ. එරික්සන්ගේ ටී-ෂර්ටයේ සඳහන් අංකය ‘10’ වීම හේතුවෙන් ඔවුන් තරගයේ 10 වැනි විනාඩි එරින්සන්ට ගෞරව කිරීමට යොදාගත්හ.
මේ දක්වා පැවැති තරගවලදී ජයග්‍රහණය 2 ක් වාර්තා කරමින් ලකුණු 6 ක් ලබා ‘බී’ කාණ්ඩයේ පෙරමුණ ගැනීමට බෙල්ජියම සමත්ව සිටින අතර එක් තරගය බැගින් ජයගෙන සිටි රුසියාව සහ ෆින්ලන්තය ලකුණු 3 බැගින් ලබා පිළිවෙලින් එහි දෙවැනි සහ තෙවැනි ස්ථානවල රැදී සිටිති. මූලික වටයේදී බෙල්ජියම සහභාභී වන අවසන් තරගය මේ මස 21 වැනිදා ෆින්ලන්තයට එරෙහිව පැවැත්වෙන අතර එදිනම ඩෙන්මාකයට එරෙහිව රුසියාවද තරග බිමට පිවිසීමට නියමිතය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
