ශ්‍රී ලංකා පාපන්දු සම්මේලනයේ පසුගිය නිලවරණයෙන් පසුව ශ්‍රී ලංකා පාපන්දු සම්මේලනයේ වසර ගණනාවක් පුරා සභාපතිවරයකුව සිටි මනිලාල් ප්‍රනාන්දු මහතා සිය පැරණි හිතවතුන් සමග ප්‍රකාශ කර ඇත්තේ ‘ලංකාවේ පාපන්දු තමන්ට එපාම වූ බවය.
පසුගිය 30 වැනිදා පැවැති නිලවරණයේදී මනිලාල් ප්‍රනාන්දු මහතාගේ පුත් වෛද්‍ය මනිල් ප්‍රනාන්දු මහතාගේ පරාජයෙන් පසුව හිටපු සභාපතිවරයා එසේ පවසා තිබේ.
මනිලාල් ප්‍රනාන්දු මහතා, අන්තර් ජාතික පාපන්දු සම්මේලනයේ හිටපු විධායක සභිකයකු වෙයි.
බදාදා පැවැති පාපන්දු සම්මේලන නිලවරණයේදී එහි හිටපු ලේකම් ජස්වර් උමාර් මහතා ජයගත්තේය. ඔහු සමග තරග කළ වෛද්‍ය මනිල් ප්‍රනාන්දු මහතා වැඩි ඡන්ද හයකින් පරාජයට පත්විය.
වෛද්‍ය මනිල් ප්‍රනාන්දු මහතා ශ්‍රී ලංකා පාපන්දු කේෂත්‍රයේ කවුරුත් හඳුනන මනිලාල් ප්‍රනාන්දු මහතාගේ කනිටු පුත්‍රයායි. විකලාංග වෛද්‍යවරයෙකු වන ඔහු පාපන්දු නිලවරණයට තරග වදින විටත් පාපන්දු සම්මේලනයේ වෛද්‍ය කමිටුවේ සභාපතිවරයා ලෙස කටයුතු කරමින් සිටියේය.
අන්තර්ජාතික පාපන්දු සම්මේලනය වසර 2014 සිට මනිලාල් ප්‍රනාන්දු මහතාට පාපන්දු ක්‍රීඩාව සම්බන්ධයෙන් සියලු කටයතු වලට සහභාගි වීමේ තහනමක් පනවා තිබේ. ඒ හේතුවෙන් එතැන් සිට ඒ මහතා දේශීය පාපන්දු කටයුතුවලින් මුළුමනින්ම ඉවත්ව සිටින අතර ඔහුගේ පුත්‍රයා වන මනිල් ප්‍රනාන්දු මහතා මෙවර නිලවරණයට ඉදිරිපත්වී සිටියේය.
මෙරට පාපන්දු ක්‍රීඩා කටයුතුවලින් මනිලාල් ප්‍රනාන්දු මහතා ඉවත්ව සිටියත් බදාදා පැවති නිලවරණයේදී වෛද්‍ය මනිල් ප්‍රනාන්දු මහතා හා එක්ව සිටියේ මනිලාල් ප්‍රනාන්දු මහතා සමග සිටි පාර්ශ්වයයි. සමස්ත ඡන්ද ප්‍රතිඵලය නිල වශයෙන් ප්‍රකාශ කිරීමටත් කලින් මනිලාල් ප්‍රනාන්දු මහතාට සිය පුතණුවන්ගේ පරාජය සිය හිතවතුන්ගෙන් දැනගන්නට ලැබුණි.
නිල ඡන්ද ප්‍රතිඵලය ප්‍රකාශ වීමෙන් පසුව ඔහු පවසා ඇත්තේ මෙයින් පසුව මනිල්ට කැමති තීරණයක් ගැනීමට ඉඩ හරින බවයි.
‘‘කළුතර ලීග් එකෙන් අයින් වෙනවා නම් ඒක එයාගේ වැඩක්’’ යයි මනිලාල් ප්‍රනාන්දු මහතා සිය පැරණි හිතවතුන්ට පවසා තිබේ.
කළුතර පාපන්දු ලීගයේ සභාපති ධුරය මේ වනවිට දරන්නේ මනිල් ප්‍රනාන්දු මහතාය. මෙවර පාපන්දු නිලවරණයේ දී මධ්‍යස්ථාන තුනක දී ඡන්දය ප්‍රකාශ කිරීම සිදුවිය. එහි දී බස්නාහිර පළාත් ලීග නියෝජිතයන් ඡන්දය ප්‍රකාශ කළ ගාල්ල මධ්‍යස්ථානයේ දී මනිල් ප්‍රනාන්දු මහතා විශාල ඡන්ද ගණකින් (51-19) ජයගෙන තිබුණත් ජස්වර් උමාර් මහතා පොළොන්නරුව හා මහනුවර යන මධ්‍යස්ථානවල ඡන්ද පහසුවෙන් ජයගෙන තිබුණි.
සුනාමි ආධාර ගිණුම් කිපයක තොරතුරු සම්බන්ධයෙන් ප්‍රකාශ ලබා ගැනීම සඳහා පසුගිය මැයි 06 වැනිදා කෝප් කමිටුව හමුවේ පෙනි සිටින ලෙස මනිලාල් ප්‍රනාන්දු මහතා
කැඳවීම් ලැබුවත් එය කොවිඩ් වසන්ගත තත්ත්වය හමුවේ කල් දමනු ලැබීය. එම අවස්ථාවේ දී ඔහු පැවසුවේ කෝප් කමිටුවේ කැඳවීම තමා සතුටින් බාර ගන්නා බවයි.
- 223
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
