දකුණු ඇමරිකානු පාපන්දු තරගාවලියේ මූලික වට‍ය යටතේ අද (29 වැනිදා) පැවැති 'ඒ' කාණ්ඩයේ තරගවලදී ජයග්‍රහණ වාර්තා කිරීමට ආර්ජන්ටිනාව සහ උරුගුවේ සමත් විය. මෙම තරග දෙකත් සමග තරගාවලියේ මූලික වටයේ තරග අවසන් වූ අතර එහි අර්ධ අවසන් පූර්ව වටයේ තරග ජූලි මස 3 සහ 4 යන දිනවලදී පැවැත්වේ.
අද පැවැති තරගයකදී බොලීවියාවට එරෙහිව ගෝල 4-1 ක ජයක් වාර්තා කළ ආර්ජන්ටිනාව, 'ඒ' කාණ්ඩයේ පෙරමුණ රැකගනිමින් අර්ධ අවසන් පූර්ව වටයට පිවිසීමට අවස්ථාව උදා කරගත්තේය. ආර්ජන්ටිනාව වෙනුවෙන් 148 වැනි ජාත්‍යන්තර තරගයට ක්‍රීඩා කළ ලයනල් මෙසී, එහිදී ගෝල දෙකක් ලබාගනිමින් සහ තවත් ගෝලයක් ලබාගැනීම සඳහා සහාය දක්වමින් ජයග්‍රහණයේ නියමුවා බවට පත්විය.
තරගය ආරම්භ වී විනාඩි 6 ක් ගතවන විට පැපූ ගෝමස්ට ගෝලයක් ලබාගැනීම සඳහා දක්ෂ පන්දු යොමුකිරීමක නිරත වූ මෙසී, 33 වැනි විනාඩියේදී ආර්ජන්ටිනාවට හිමිවූ දඬුවම් පහරක්ද සාර්ථක කරගත්තේය. ඉන් නොනැවතුණ ඔහු 42 වැනි විනාඩියේදී සර්ජියෝ ඇගීරෝගේ සහයෝගයෙන් තවත් ගෝලයක් ලබාගනිමින් පළමු අර්ධය නිමාවන විට සිය කණ්ඩායම ගෝල 3-0 ක් ලෙස පෙරමුණට ගෙන ආවේය.
දෙවැනි අර්ධය ආරම්භ වී විනාඩි 15 ක් ගතවන විට එනම් තරගයේ 60 වැනි විනාඩියේදී ලියොනල් ජස්ටීනියානෝගේ සහයෝගයෙන් බොලීවියාව වෙනුවෙන් ගෝලයක් ලබාගැනීමට අර්වින් සාවේද්‍රා සමත් වූ නමුත් පරාජයෙන් ගැළවීමට තරම් එය ප්‍රමාණවත් නොවීය. එතැන් පටත් විනාඩි 5 ක් ගතවන විට (65 වැනි විනාඩියේදී) ආර්ජන්ටිනාව වෙනුවෙන් තවත් ගෝලයක් ලබාගත් ලෝටාරෝ මාටිනස් සිය කණ්ඩායමට ගෝල 4-1 ක ජයක් අත්කර දුන්නේය.
මෙම තරගයට සමගාමීව අද පැවැති තවත් තරගයකදී පැරගුවේට එරෙහිව ගෝල 1-0 ක ජයක් වාර්තා කිරීමට උරුගුවේ සමත් වූ අතර එම ජයග්‍රහණයත් සමග 'ඒ' කාණ්ඩයේ දෙවැනි ස්ථානය හිමිකරගනිමින් අර්ධ අවසන් පූර්ව වටයට පිවිසීමට ඔවුන්ට හැකි විය. තරගයේ 21 වැනි විනාඩියේදී දඬුවම් පහරක් සාර්ථක කරගනිමින් උරුගුවේ පිල වෙනුවෙන් ජයග්‍රාහී ගෝලය වාර්තා කිරීමට එඩින්සන් කැවානි සමත් විය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
