Last Update  :  2025-04-05 19:07:00 About Contact
Follow Us -
IMG-LOGO
නිවස්න පිටුව Top story යුක්රේනයත් අර්ධ අවසන් පූර්ව වටයට

යුක්රේනයත් අර්ධ අවසන් පූර්ව වටයට

editorial - 2021 ජුනි මස 30 {{hitsCtrl.values.hits}} Views 0 Comment
A A A

අතිශය තියුණු තරගයකින් අනතුරුව දෙවැනි අතිරේක කාලයේදී ගෝල 2-1 ක් ලෙස ස්වීඩනය පරාජය කළ යුක්රේනය යූ‍රෝ 2020 පාපන්දු තරගාවලියේ අර්ධ අවසන් පූර්ව වටයට සුදුසුකම් ලබාගැනීමට බදාදා සමත් විය. තරගයේ 121 වැනි විනාඩියේදී ඔලෙක්සැන්ඩර් සින්චෙන්කෝ‍ගේ පන්දු‍ පිරිනැමීමක් ඔස්සේ තමා වෙත පැමිණි පන්දුව හිසින් දැල තුළට යොමු කළ ආටෙම් ඩොව්බික්, දැඩි නිහැඬියාවකින් පසුව යුක්රේනය වෙනුවෙන් ජයග්‍රාහී ගෝලය වාර්තා කළේය.

තරගයේ 27 වැනි විනාඩියේදී ඇන්ඩ්‍රි යර්මොලෙන්කෝගේ සහයෝගයෙන් ගෝලයක් ලබාගත් ඔලෙක්සැන්ඩර් සින්චෙන්කෝ‍ ගෝල 1-0 ක් ලෙස යුක්රේනය පෙරමුණට ගෙන ආවේය. එහෙත් පළමු අර්ධය නිමාවීමට විනාඩි 2 ක් තිබියදී (43 වැනි විනාඩියේදී) ඇලෙක්සැන්ඩර් ඉසාක්ගේ සහායෝගයෙන් ස්වීඩනය වෙනුවෙන් ගෝලයක් ලබාගත් එමිල් ෆෝස්බර්ග් එම අර්ධය නිමාවන විට ගෝල 1-1 ක් ‍ලෙස තරගය සම තත්ත්වයට පත්කළේය.

දෙවැනි අර්ධයේදී ගෝල ලබාගැනීමට දෙපිලේම ක්‍රීඩකයන් අසමත්වීම නිසා නියමිත කාලය අවසන් වන විටද තරගය ගෝල 1-1 ක් ලෙස සම තත්ත්වයේ පැවතිණ. ඉන් අනතුරුව ලබාදුන් අතිරේක කාලයේදීද ගෝල ලබාගැනීම දෙපිලම අපොහොසත් වීම නිසා දඬුවම් පහර කරා යෑමට පෙර තවත් කෙටි අතිරේක කාලයක් ලබාදීමට විනිසුරුවරයා පියවර ගත්තේය.
 
මෙම තරගයට පෙර ස්වීඩනය ලෝක පාපන්දු ශ්‍රේණිගත කිරීම්හි‍ 18 වැනි ස්ථානයේ පසුවූ අතර යුක්රේනය එහි 24 වැනි ස්ථානයේ රැදී සිටියේය. මූලික වටයේදී උතුරු මැසිඩෝනියාවට එරෙහිව ‍ගෝල 2-1 ක ජයක් ලැබූ යුක්රේනය, නෙදර්ලන්තය හමුවේ ගෝල 3-2 ක්‍ ලෙසද, ඔස්ට්‍රියාව හමුවේ ගෝල 1-0 ක් ලෙසද පරාජයට පත්වෙමින් ‘සී’ කාණ්ඩයේ තෙවැනියා ලෙස අවසන් 16 දෙනාගේ වටයට සුදුසුකම් ලැබීය.

මෙම තරගයේදී යුක්රේනය හමුවේ පරාජය වීම හේතුවෙන් තරගාවලියෙන් ඉවතට විසිවූ ස්වීඩනය අවසන් 16 දෙනාගේ වටයට පිවිසියේ මූලික වටයේදී ජයග්‍රහණ 2 ක් ලබා ‘ඊ’ කාණ්ඩයේ ශූරයන් ලෙසිනි. එහිදී පෝලන්තයට එරෙහිව ගෝල 3-2 ක් ලෙසද, ස්ලෝවැකියාවට එරෙහිව ගෝල 1-0 ක් ලෙසද ජය ලැබූ ස්වීඩනය, ස්පාඤ්ඤය සමග පැවැති තරගය ගෝල 0-0 ක් ලෙස ජය පැරදුමෙන් තොරව නිමා කළේය.  

මෙම තර‍ගයේදී ලැබූ ජයත් සමග ජූලි මස 3 වැනිදා අර්ධ අවසන් පූර්ව වටයේදී එංගලන්තයට එරෙහිව තරග වැදීම සඳහා යුක්රේනය අවස්ථාව උදා කරගත්තේය. මූලික වටයේදී ‘ඩී’ කාණ්ඩයේ ශුරයන් බවට පත්වෙමින් අවසන් 16 දෙනාගේ වටයට සුදුසුකම් ලැබූ එංගලන්තය, එහිදී ප්‍රබල ජර්මනියට එරෙහිව ගෝල ‍‍‍2-0 ක ජයක් වාර්තා කරමින් තරගාවලියේ අර්ධ අවසන් පූර්ව වටයට පිවිසියේය.


 

-036


අදහස් (0)

යුක්රේනයත් අර්ධ අවසන් පූර්ව වටයට

ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.