ලෝක කුසලාන පාපන්දු තරගාවලියට සුදුසුකම් ලැබීමේ තරගාවලියේ දෙවැනි වටයේ තරගයක් ලෙස දකුණු කොරියාවේ සෝල් නගරයේදී ශ්‍රී ලංකාව සහ ලෙබනනය අතර අද (5 වැනිදා) පැවැති තරගයෙන් ගෝල 3-2 ක ජයක් වාර්තා කිරීමට ලෙබනනය සමත් විය.
තරගයේ 10 වැනි විනාඩියේදී ගෝලයක් ලබාගනිමින් ශ්‍රී ලංකා කණ්ඩායමට සාර්ථක ආරභයක් ලබාදීමට අහමඩ් වසීම් රාසික් සමත් විය. කවිදු ඉෂාන්ගේ පන්දු යොමුකිරීමක් මගින් ක්‍රීඩංගණය මැද කොට‍සේද තමා වෙත පැමිණි පන්දුව දැල ආසන්නයටම රැගෙන විත් දැල රකින්නාගේ අත් අවාරණ අතරින් දැල වෙත යොමු කිරීමට එහිදී රාසික් සමත් විය.
දෙවැනි වටයේදී ‘එච්’ කාණ්ඩයට යටතේ තරගය වදින ශ්‍රී ලංකාව, මේ දක්වා පැවැති තරගවලදී ලබාගත් පළමු ගෝලය ලෙසද රාසික්ගේ එම ගෝලය සටහන් විය. මින් පෙර පැවැති තරගවලදී තුර්ක්මේනිස්තානය හමුවේ ගෝල 2-0 ක් ලෙස දෙවරක්ද, දකුණු කොරියාව හමුවේ ගෝල 8-0 ක් ලෙසද, ලෙබනනය හමුවේ ගෝල 3-0 ක් ලෙසද ශ්‍රී ලංකාව පරාජයට පත්විය.
කෙසේ වුවත් රාසික් ලබාගත් ගෝලයේ සතුට වැඩි වේලාවක් බුක්තිවිඳීමට ශ්‍රී ලංකා ක්‍රීඩකයන්ට ඉඩක් ලබා නොදුන් ජොවාන් ඔමාරි, ඊලඟ විනාඩියේදීම එනම් තරගයේ 11 වැනි විනාඩියේදී ලෙබනනය වෙනුවෙන් පළමු ගෝලය ලබාගත්තේය. මොහොමඩ් හයිඩර් විසින් එල්ල කරන ලද නිදහස් පහරකින් තමා වෙත ඇදී ආ පන්දුව හිසින් දැල තුළට යොමුකරමින් ඔමාරි එම ගෝලය ලබාගත්තේය.
ඔමාරිගේ එම ගෝලයත් සමග තරගය 1-1 ක් ලෙස සම තත්ත්වයට පත් වූ අතර එතැන් පටන් ඉතාමත් ආක්‍රමණශීලී ක්‍රීඩා විලාශයක නිරත වූ ලෙබනන් ක්‍රීඩකයෝ, සිය දැල අසලට පන්දුවට රැගෙන යෑම සඳහා ශ්‍රී ලංකා කණ්ඩායමට ලබාදුන් අවස්ථාවන් ඉතා අල්ප විය. ඒ අතර තුර 17 වැනි විනාඩියේදී රබී අතායාගේ පැති පහරකින් පන්දුව ලබාගත් මජීඩ් ඔස්මන් එය දැල අසලට යොමුකළ අතර දැල අසල සිටි මොහොමඩ් ජලාල් ගුවනට පැන හිසින් පන්දුවට දැල වෙත යොමු කළේය.
ජලාල්ගේ ගෝලයත් සමග ශ්‍රී ලංකා කණ්ඩායම පසුපසට ඇද දමමින් ගෝල 2-1 ක් ලෙස තරගයේ පෙරමුණ ගත් ලෙබනනය, පළමු අර්ධය අවසන් වීමට පෙර තවත් ගෝලයක් ලබාගනිමින් ගෝල 3-1 ක් ලෙස පරතරය වැඩි කරගැනීමටද සමත් විය. 44 වැනි මිනිත්තුවේදී රබී අතායාගේ පැති පහරකින් දැල ආසන්නයට පැමිණි පන්දුව තමාගේ පපුවෙන් නවතාගෙන කරණමක් ගසමින් දැල වෙත යොමුකළ ජොවාන් ඔමාරි එම ගෝලයට හිමිකම් කීවේය. මෙම තරගයේදී ඔහු ලබාගත් දෙවැනි ගෝලය ලෙස එය සටහන් විය.
ඒ අනුව ගෝල 3-1 ක් ලෙස පළමු අර්ධය නිමා වූ අතර දෙවැනි අර්ධයේ 61 වැනි විනාඩිය දක්වාම ගෝලයක් ලබාගැනීමට කණ්ඩායම් දෙකම අසමත් විය. කෙසේ වුවත් 61 වැනි විනාඩියේදී හසන් ශිබ්‍රිකෝගේ නීති විරෝධී ක්‍රියාවක් හේතුවෙන් ශ්‍රී ලංකා කණ්ඩායමට දඬුවම් පහරක් ලබාදීමට විනිසුරුවරයා කටයුතු කළ අතර එම දඬුවම් පහර සාර්ථක කරගත් අහමඩ් වසීම් රාසික් ගෝල 3-2 ක් දක්වා ශ්‍රී ලංකා කණ්ඩායම රැගෙන ආවේය.
ඉන් අනතුරුව තරගය නිමාවන තෙක්ම කණ්ඩායම් දෙකටම ගෝල ලබාගැනීමට නොහැකි වීම නිසා ගෝල 3-2 ක් ලෙස තරගයේ ජය ලෙබනනයට හිමිවිය. මේ දක්වා තරගාවලියේ දෙවැනි වටයේදී තරග 5 කට සහභාගි වී එම තරග 5 දීම පරාජයට පත්ව සිටින ශ්‍රී ලංකා කණ්ඩායම, මේ මස 9 වැනිදා සත්කාරක දකුණු කොරියානු කණ්ඩායමට එරෙහිව සිය අවසන් තරගයට සහභාගී වීමට නියමිතය. උතුරු කොරියාව තරගාවලියෙන් ඉවත් වීම නිසා ශ්‍රී ලංකාව සහ උතුරු කොරියාව අතර පැවැති තරගය නොසලකා හරිනු ඇත.
ඡායාරූප - ආසියානු පාපන්දු සම්මේලන වෙබ් අඩවිය
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
