(ශානුක අරවින්ද)
සංචාරක බංග්ලාදේශ වයස 19 න් පහළ කාන්තා කණ්ඩායමට එරෙහිව කොළඹ තර්ස්ටන් විදුහල් ක්‍රීඩාංගණයේදී අද (6 වැනිදා) පැවැති දෙවැනි විස්සයි-20 ක්‍රිකට් තරගයෙන් ලකුණු 65 ක පහසු ජයක් වාර්තා කිරීමට ශ්‍රී ලංකා වයස 19 න් පහළ කාන්ත කණ්ඩායම සමත් විය. මෙම තරගාවලියේදී ශ්‍රී ලංකා යොවුන් ක්‍රීඩිකාවන් ලැබූ දෙවැනි ජය මෙය විය.
ජයග්‍රහණය සඳහා ලකුණු 126 ක ඉලක්කයක් හඹාගිය බංග්ලාදේශ යොවුන් කාන්තා කණ්ඩායමට ඕවර 12.2 ක් අවසානයේ සියලු දෙනා දැවී ලබාගත හැකි වූයේ ලකුණු 60 ක් පමණි. චමෝදි මුණසිංහ සහ අසේනි තලගුනේ කඩුලු 3 බැගින් දවාගනිමින් බංග්ලාදේශ කණ්ඩායමේ ජයග්‍රාහී මාවත අවහිර කළහ.
කාසියේ වාසිය දිනා පළමුවෙන් පන්දුවට පහරදුන් ශ්‍රී ලංකා යොවුන් කාන්තා කණ්ඩායම ඕවර 20 අවසානයේ කඩුලු 4 ක් දැවී ලකුණු 125 ක් ලබාගත්තේය. එහිදී නායකත්වයේ පිතිහරඹයක නිරත වූ මනුදි නානායක්කාර පන්දු 45 කින් ලකුණු 50 ක් රැස්කළේ හයේ පහරක් සහ හතරේ පහර 5 ක් සමගිනි.
දැහැමි සෙනෙත්මා (25) සමග එක්ව තෙවැනි කඩුල්ල වෙනුවෙන් පන්දු 67 කදී ලකුණු 59 ක සම්බන්ධතාවක් ගොඩනැගීමටද මනුදි සමත් වූවාය. දැහැමිගේ දැවී යෑමෙන් අනතුරුව පිටියට පිවිසි රෂ්මිකා සෙව්වන්දි පන්දු 22 කදී හයේ පහරක් සහ හතරේ පහර 2 ක් සමග නොදැවී ලකුණු 27 ක් රැස්කළාය.
ශ්‍රී ලංකා යොවුන් කාන්තා පිල - ඕවර 20 කදී කඩුලු 4 ක් දැවී 125
(දැහැමි සෙනෙත්මා 25, මනුදි නානායක්කාර 50, රෂ්මිකා සෙව්වන්දි නොදැවී 27, සුමුදු නිසංසලා නොදැවී 13, නිෂිතා අක්තර් 07/2)
බංග්ලාදේශ යොවුන් කාන්තා පිල - ඕවර 12.2 කදී සියලු දෙනා දැවී 60
(සාදියා අක්තර් 18, චමෝදි මුණසිංහ 13/3, අසේනි තලගුනේ 14/3, ලිමිණි තිලකරත්න 14/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
