සංචාරක පාකිස්තාන කණ්ඩායම සහ දකුණු අප්‍රිකානු කණ්ඩායම අතර පර්ල් නුවර බෝලන්ඩ් උද්‍යාන ක්‍රීඩාංගණයේදී ඊයේ (17 වැනිදා) පැවැති පළමු එක්දින ජාත්‍යන්තර තරගයෙන් කඩුලු 3 ක ජයක් වාර්තා කිරීමට පාකිස්තාන කණ්ඩායම සමත් විය. මෙම ජයත් සමග දෙරට අතර පැවැත්වෙන තරග 3 කින් සමන්විත එක්දින ක්‍රිකට් තරගාවලිය 1-0 ක් ලෙස පෙරමුණ ගැනීමටද පාකිස්ථානයට හැකි විය.
ජයග්‍රහණය සඳහා ලකුණු 240 ක ඉලක්කයක් හඹාගිය පාකිස්තාන ක්‍රීඩකයෝ කඩුලු 7 ක් දැවී පන්දු 3 ක් ඉතිරිව තිබියදී ඉලක්කය පසුකර ගියහ. අගනා පිතිහරඹයක නිරත වූ අඝා සල්මාන් පන්දු 90 කදී හයේ පහර 2 ක් සහ හතරේ පහර 4 ක් සමග නොදැවී ලකුණු 82 ක් රැස්කරමින් සිය කණ්ඩායම ජයග්‍රහණය කරා ගෙන ගියේය.
එහිදී සිය දෙවැනි ශතකය ලබාගත් ආරම්භක පිතිකරු සයිම් අයුබ් පාකිස්තාන කණ්ඩායමේ ජයග්‍රහණය සඳහා මනා අඩිතාලමක් දැමූ අතර පන්දු 119 කදී වාර්තා වූ ඔහුගේ ඉනිම හයේ පහර 3 කින් සහ හතරේ පහර 10 කින් සමන්විත විය. ආඝා සල්මාන් සමග එක්ව පස්වැනි කඩුල්ල වෙනුවෙන් පන්දු 133 කදී ලකුණු 141 ක සම්බන්ධතාවක් ගොඩනැගීමටද අයුබ් සමත් විය.
පළමුවෙන් පන්දුවට පහරදුන් දකුණු අප්‍රිකානු කණ්ඩායම ඕවර 50 අවසානයේ කඩුලු 9 ක් දැවී ලකුණු 239 ක් ලබාගත් අතර දකුණු අප්‍රිකානු ඉනිමේ වැඩිම ලකුණු ලාභියා බවට පත්වූ හෙන්රිච් ක්ලාසන් පන්දු 97 කින් ලකුණු 86 ක් රැස්කළේ හයේ පහර 2 ක් සහ හතරේ පහර 7 ක් සමගිනි. ඒඩ්න් මාක්‍රම් (35) සමග එක්ව 5 වැනි කඩුල්ල සඳහා පන්දු 107 කදී ලකුණු 73 ක් එක් කිරීමටද ක්ලාසන් සමත් විය.
පිත්තෙන් මෙන්ම පන්දුවෙන්ද එකසේ දස්කම් දැක්වූ ආඝා සල්මාන් ඕවර 8 ක් යවමින් ලකුණු 32 කට කඩුලු 4 ක් දවාගත් අතර දකුණු අප්‍රිකානු පිතිකරුවන් අසරණ කිරීම සඳහා ඔහුට අනගි සහායක් දුන් අබ්‍රාර් අහමඩ් ලකුණු 32 කට කඩුලු 2 ක් බිඳහෙළීය. එහිදී සයිම් අයුබ් සහ ශහීන් අෆ්රිඩ් එක් කඩුල්ල බැගින් දවාගත්හ.
දකුණු අප්‍රිකාව - ඕවර 50 කදී කඩුලු 9 කට 239
(ටෝනි ඩි’ සෝර්සි 33, රයන් රිකෙල්ටන් 36, ඒඩ්න් මාක්‍රම් 35, හෙන්රිච් ක්ලාසන් 86, ආඝා සල්මාන් 32/4, අබ්‍රාර් අහමඩ් 32/2)
පාකිස්තානය - ඕවර 49.3 කදී කඩුලු 7 කට 242
(සයිම් අයුබ් 109, බාබාර් අසාම් 23, ආඝා සල්මාන් නොදැවී 82, ඔට්නීල් බාර්ට්මන් 37/2, කගිසෝ රබාඩා 48/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
