ස්විට්සර්ලන්තයට එරෙහිව ඊයේ (2 වැනිදා) පැවැති අර්ධ අවසන් පූර්ව තරගය දඬුවම් පහර 3-1 ක් ලෙස ජයගත් ස්පාඤ්ඤය යූරෝ 2020 පාපන්දු තරගාවලියේ අවසන් පූර්ව වටයට සුදුසුකම් ලබාගත්තේය. ඒ අනුව මේ මස 6 වැනිදා පැවැත්වෙන පළමු අවසන් පූර්ව තරගයේදී ඉතාලියට එරෙහිව ස්පාඤ්ඤය තරග බිමට පිවිසීමට නියමිතය.
තරගයේ නියමිත කාලය සහ අතිරේක කාලය නිමාවන විට ගෝල 1-1 ක් ලෙස දෙපිලම සම තත්ත්වයේ පසුවීම නිසා ජයග්‍රාහකයා තෝරාගැනීම සඳහා දඬුවම් පහර කරා යෑමට විනිසුරුවරයාට සිදුවිය. එහිදී දඬුවම් පහර 3 ක් සාර්ථක කරගැනීමට ස්පාඤ්ඤ ක්‍රීඩකයෝ සමත් වෙද්දී, ස්විට්සර්ලන්ත ක්‍රීඩකයන්ට සාර්ථක කරගත හැකිවූයේ එක් දඬුවම් පහරක් පමණි.
තරග ආරම්භ වී විනාඩි 8 ක් ගතවන විට ස්විට්සර්ලන්ත ක්‍රීඩක ඩෙනිස් සකාරියා අත්වැරදීමකින් තම දැල තුළටම පන්දුව යොමු කිරීම නිසා ස්පාඤ්ඤයට ගෝලයක් හිමිවිය. එම ගෝලයත් සමග ගෝල 1-0 ක් ලෙස ස්පාඤ්ඤයට පෙරමුණ ගෙන දෙමින් තරගයේ පළමු අර්ධය නිමාවට පත් විය.
දෙවැනි අර්ධය ආරම්භ වී විනාඩි 23 කට පසුව එනම් 68 වැනි විනාඩියේදී ස්විට්සර්ලන්තය වෙනුවෙන් ගෝලයක් ලබාගත් නායක ෂර්ඩන් ෂකීරි තරගය ගෝල 1-1 ක් ලෙස සම තත්ත්වයට පත්කළේය. ඉන් අනතුරුව තරගය නිමාවන තෙක්ම ගෝල ලබාගැනීමට දෙපිලේම ක්‍රීඩකයෝ අසමත් වූහ.
ස්විට්සර්ලන්තය වෙනුවෙන් වාර්තා වූ එකම ගෝලය සඳහා සහය දැක්වූ ඉදිරි පෙළ ක්‍රීඩක රීමෝ ෆෝලර්ට නිති විරෝධී ක්‍රියාවක් හේතුවෙන් තරගයේ 77 වැනි විනාඩියේදී රතු කාඩ් පතක් හිමිවිය. ඒ අනුව එතැන් පටන් තරගය නිමාවන තෙක්ම ස්විට්සර්ලන්තයට ක්‍රීඩකයන් 10 දෙනකුගෙන් ක්‍රීඩා කිරීමට සිදුවූ අතර ප්‍රබල ඉදිරි‍පෙළ ක්‍රීඩකයකු අඩුවිම ඔවුන්ට විශාල පාඩුවක් විය.
‘ඒ’ කාණ්ඩයේ තෙවැනි ස්ථානයට පත්වෙමින් අවසන් 16 දෙනාගේ වටයට සුදුසුකම් ලැබූ ස්විට්සර්ලන්තය, එහිදී දඬුවම් පහර 5-4 කින් ප්‍රබල ප්‍රංශය පරාජය කරමින් අර්ධ අවසන් පූර්ව වටයට පිවිසියේය. ‘ඊ’ කාණ්ඩයේ දෙවැනි ස්ථානය හිමිකර ගනිමින් අවසන් 16 දෙනාගේ වටයට සුදුසුකම් ලැබූ ස්පාඤ්ඤය, අර්ධ අවසන් පූර්ව වටයට පිවිසියේ එහිදී ක්‍රොයේෂියාවට එරෙහිව ගෝල 5-3 ක ජයක් වාර්තා කරමිනි.
මූලික වටයේදී ස්ලෝවැකියාවට එරෙහිව ගෝල 5-0 ක ජයක් වාර්තා කළ ස්පාඤ්ඤය, පෝලන්තය සමග ගෝල 1-1 ක් ලෙසත්, ස්වීඩනය සමග ගෝල 0-0 ක් ලෙසත් සම විය. එහිදී තුර්කියට එරෙහිව ගෝල 3-1 ක ජයක් වාර්තා කළ ස්විට්සර්ලන්තය, වේල්සය සමග ගෝල 1-1 ක් ලෙස සම වෙමින් ඉතාලිය හමුවේ ගෝල 3-0 ක් ලෙස පරාජයට පත්විය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
