ලෝක පාපන්දු ශ්‍රේණිගත කිරීම්හි දෙවැනි ස්ථානයේ පසුවන ප්‍රංශය, යූරෝ 2020 පාපන්දු තරගාවලියෙන් ඉවතට ඇද දැමීමට ශ්‍රේණිගත කිරීම්හි 13 වැනි ස්ථානයේ පසුවන ස්විට්සර්ලන්තය සමත් විය. ඊයේ (28 වැනිදා) පැවැති අවසන් 16 දෙනාගේ වටයේ තරගයකදී දඬුවම් පහර 5-4 ක් ලෙස ප්‍රංශයට එරෙහිව පෙරළිකාර ජයක් වාර්තා කරමින් ස්විට්සර්ලන්තය තරගාවලියේ අර්ධ අවසන් පූර්ව වටයට සුදුසුකම් ලැබීය.
තරගයේ 15 වැනි විනාඩියේදී ස්ටීවන් සුබර්ගේ පන්දු යොමුකිරීමක් හමුවේ තමා වෙත පැමිණි පන්දුව හිසෙන් දැල තුළට යොමුකළ හැරිස් සෙෆෙරොවික් පළමු අර්ධය නිමාවන විට ගෝල 1-0 ක් ලෙස ස්විට්සර්ලන්තය පෙරමුණට ගෙන ආවේය. එහෙත් දෙවැනි අර්ධය ආරම්භ වී විනාඩි 10 ක් ගතවන විට ස්විට්සර්ලන්තයට හිමි වූ දඬුවම් පහරක් සාර්ථක කරගැනීමට පෙඩ්‍රෝ රොඩ්‍රිගස් අසමත් විය.
දෙවැනි අර්ධයේදී විනාඩි 2 ක් තුළ (57 වැනි සහ 59 වැනි විනාඩිවලදී) කිලියාන් බාපේගේ සහයෝගයෙන් පිට පිටම ගෝල දෙකක් ලබාගත් කරීම් බෙන්සෙමා ගෝල 2-1 ක් ලෙස ප්‍රංශය තරගයේ පෙරමුණට ගෙන ආවේය. ඉන් අනතුරුව 75 වැනි විනාඩියේදී ප්‍රංශය වෙනුවෙන් තෙවැනි ගෝලයට ලබාගත් පෝල් පෝග්බා ගෝල 3-1 ක් ලෙස සිය කණ්ඩායම තවත් ඉහළට ඔසවා තැබීය.
කෙසේ වුවත් තරගය අවසන් වීමට විනාඩි 9 ක් ඉතිරිව තිබියදී (81 වැනි විනාඩියේදී) කෙවින් එම්බාබුගේ සහයොගයෙන් ගෝලයක් ලබාගත් යොමුකළ හැරිස් සෙෆෙරොවික් සහ අවසන් විනාඩියේදී (90 වැනි විනාඩියේදී) ග්‍රැනට් ෂාකාගේ සහයෝගයෙන් ගෝලයක් ලබාගත් මාරියෝ ගෞරානොවික් ගෝල 3-3 ක් ලෙස යළිත් වරක් තරගය සම කිරීම සඳහා ස්විට්සර්ලන්තයට අවස්ථාව උදාකර දුන්හ.
නියමිත කාලය සහ අතිරේක කාලය අවසන් වන විට දෙපිලම ගෝල 3 බැගින් ලබා සිටීම නිසා තරගයේ ජයග්‍රාහකයා තොරාගැනීම සඳහා දඬුවම් පහර ක්‍රියාත්මක කෙරිණ. එහිදී දඬුවම් පහර 5 ම සාර්ථක කරගැනීමට ස්විට්සර්ලන්තය සමත් වෙද්දී, ප්‍රංශයට සාර්ථක කරගත හැකි වූයේ දඬුවම් පහර 4 ක් පමණි. ඒ අනුව ස්විට්සර්ලන්තයට දඬුවම් පහර 5-4 ක් ලෙස තරගයේ ජය හිමිවිය.
මෙම තර‍ගයේදී ලැබූ ජයත් සමග ජූලි මස 2 වැනිදා අර්ධ අවසන් පූර්ව වටයේදී ස්පාඤ්ඤය එරෙහිව තරග වැදීම සඳහා ස්විට්සර්ලන්තය අවස්ථාව උදා කරගත්තේය. ‘ඊ’ කාණ්ඩයේ දෙවැනියා ලෙස අවසන් 16 දෙනාගේ වටයට සුදුසුකම් ලැබූ ස්පාඤ්ඤය, එහිදී ක්‍රොයේෂියාවට එරෙහිව ගෝල 5-3 ක ජයක් වාර්තා කරමින් තරගාවලියේ අර්ධ අවසන් පූර්ව වටයට පිවිසියේය.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
