ස්විට්සර්ලන්ත පාපන්දු කණ්ඩායම ...
ස්පාඤ්ඤ කණ්ඩායමට එරෙහිව ස්විට්සර්ලන්තය තරග බිමට පිවිසෙන යූරෝ 2020 පාපන්දු තරගාවලියේ පළමු අර්ධයේ අවසන් පූර්ව තරගය ශ්‍රී ලංකා වේලාවෙන් හෙට (2 වැනිදා) රාත්‍රී 9.30 ට ආරම්භ වෙයි. ප්‍රබල ස්පාඤ්ඤය මේ වන විට ලෝක පාපන්දු ශ්‍රේණිගත කිරීම්හි 6 වැනි ස්ථානයේ පසුවන අතර ස්විට්සර්ලන්තය එහි 13 වැනි ස්ථානයේ රැදී සිටියි.
‘ඒ’ කාණ්ඩයේ තෙවැනි ස්ථානයට පත්වෙමින් අවසන් 16 දෙනාගේ වටයට සුදුසුකම් ලැබූ ස්විට්සර්ලන්තය, එහිදී දඬුවම් පහර 5-4 කින් ප්‍රබල ප්‍රංශය පරාජය කරමින් අර්ධ අවසන් පූර්ව වටයට පිවිසියේය. ‘ඊ’ කාණ්ඩයේ දෙවැනි ස්ථානය හිමිකර ගනිමින් අවසන් 16 දෙනාගේ වටයට සුදුසුකම් ලැබූ ස්පාඤ්ඤය, අර්ධ අවසන් පූර්ව වටයට පිවිසියේ ක්‍රොයේෂියාවට එරෙහිව ගෝල 5-3 ක ජයක් වාර්තා කරමිනි.
මූලික වටයේදී ස්ලෝවැකියාවට එරෙහිව ගෝල 5-0 ක ජයක් වාර්තා කළ ස්පාඤ්ඤය, පෝලන්තය සමග පැවැති තරගය ගෝල 1-1 ක් ලෙසත්, ස්වීඩනය සමග පැවැති තරගය ගෝල 0-0 ක් ලෙසත් සම කරගත්තේය. තුර්කියට එරෙහිව ගෝල 3-1 ක ජයක් වාර්තා කළ ස්විට්සර්ලන්තය, වේල්සය සමග ගෝල 1-1 ක් ලෙස සම වෙමින් ඉතාලිය හමුවේ ගෝල 3-0 ක් ලෙස පරාජයට පත්විය.
මින් පෙර ස්විට්සර්ලන්තය සහ ස්පාඤ්ඤය අවස්ථා 22 කදී එකිනෙකාට එරෙහිව තරගවැදී ඇති අතර ඉන් තරග 16 කදීම ජය ලැබීමට ස්පාඤ්ඤය සමත්වී ඇත. සෙසු තරග 6 න් 5 ක් ජය පැරදුමකින් තොරව නිමාවට පත්වී ඇති අතර ස්විට්සර්ලන්තයට ජයගැනීමට හැකි වී ඇත්තේ එක් තරගයක් පමණි. ඉකුත් වසරේ (2020) නොවැම්බර් මාසයේදී දෙරට අතර අවසන් වරට පැවැති තරගයද ගෝල 1-1 ක් ලෙස ජය පැරදුමකින් තොරව නිමාවට පත් වී ඇත.
කෙසේ වුවත් ඊට මාසකට පමණ ඉහතදී එනම් 2020 වසරේ ඔක්තෝබර් මාසයේදී ගෝල 1-0 කින් ස්විට්සර්ලන්තය පරාජය කිරීමට ස්පාඤ්ඤය සමත්වී තිබේ. අවසන් වරට ස්පාඤ්ඤය පරාජය කිරීමට ස්විට්සර්ලන්තය සමත්ව ඇත්තේ 2010 වසරේ ජූනි මාසයේදී වන අතර ලෝක කුසලාන පාපන්දු තරගාවලියේ තරගයක් ලෙස පැවැති එය ගෝල 1-0 ක් ලෙස ජය ගැනීමට ස්විට්සර්ලන්තය සමත් විය.
මෙම තරගයෙන් ජය ලබන කණ්ඩායම මේ මස 6 වැනිදා පැවැත්වෙන පළමු අවසන් පූර්ව තරගයේදී බෙල්ජියම හෝ ඉතාලිය එරෙහිව තරග වැදීම සඳහා අවස්ථාව උදා කරගනු ඇත.
ස්පාඤ්ඤ පාපන්දු කණ්ඩායම...
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
