(නාමල් පතිරගේ)
ආන්දෝලනාත්මක කතාබහක් ඇතිවූ ශ්‍රී ලංකා පාපන්දු සම්මේලනයේ සුනාමි ආධාර මුදල් අවභාවිත කිරීමේ චෝදනාව සම්බන්ධයෙන් නීතිපතිවරයාගේ උපදෙස් පරිදි ඒ පිළිබඳව කෝප් කමිටුවේදී තවදුරටත් සාකච්ඡා නොකිරීමට කෝප් කමිටුව අද (3) තීරණය කළේය.
එම චෝදනා විමර්ශනය කර පවත්වාගෙන යාමට තරම් කරුණු හෙළි නොවීම නිසා ඒ සම්බන්ධයෙන් කෝප් කමිටුවේදි සාකච්ඡා කිරීමේ අවශ්‍යතාවයක් තවදුරටත් නොමැති බව ඊයේ පාර්ලිමේන්තුවේදී රැස්වූ පොදු ව්‍යාපාර පිළිබඳ කාරක සභාව හෙවත් කෝප් කමිටුව නිගමනය කර තිබේ.
ඊයේ රැස්වීමට ශ්‍රී ලගංකා පාපන්දු සම්මේලනයේ හා ක්‍රීඩා අමාත්‍යාංශයේ ප්‍රධානීහු රැසක් කෝප් කමිටුවේ කැඳවීම් මත පෙනී සිටියහ. ශ්‍රී ලංකා පාපන්දු සම්මේලනයේ සභාපති ජස්වර් උමාර්, එහි ලේකම් උපාලි හේවගේ, ක්‍රීඩා අමාත්‍යාංශයේ ලේකම් අනුරාධ විජේකෝන්, ක්‍රීඩා අධ්‍යක්ෂ ජනරාල් අමල් එදිරිසූරිය යන මහත්වරු ඇතුළු එම පාර්ශ්ව දෙකම අයත් නීති මූල්‍ය හා පරිපාලන අංශවලට සම්බන්ධ ඉහළ පෙළේ නිලධාරීහු රැසක් ද ඒ අතර වූහ.
කෝප් කමිටුවේදී මීට පෙර රැස්වූ අවස්ථාවලදී ආන්දෝලනාත්මක කතාබහක් ඇතිවූ සුනාමි ආධාර මුදල් අවභාවිත කිරීම සම්බන්ධයෙන් චෝදනා එල්ල වූයේ එවකට ශ්‍රී ලංකා පාපන්දු සම්මේලනයේ කළමනාකාර මණ්ඩලයේ සභාපති ධුරය දැරූ මනිලාල් ප්‍රනාන්දු මහතාටය. ඔහු ආසියානු පාපන්දු සමුළුවේ උප සභාපතිවරයකු ලෙසත් ලෝක පාපන්දු සම්මේලනයේ විධායක සභිකයකු ලෙසත් කටයුතු කළ ශ්‍රී ලංකා පාපන්දු පරිපාලනයේ ප්‍රවීණයෙකි.
සුනාමි ආධාර ලෙසින් ලැබුණද, අවභාවිත කර ඇතැයි ප්‍රකාශ වූ මුදල යුරෝ 40,000ක් හා ඩොලර් 260,000කි. ඒ හැරෙන්නට ආසියානු පාපන්දු සමුළුව සුනාමියෙන් විපතට පත්වූවන්ගේ නිවාස සාදාදීම සඳහා ලබාදුන් තවත් රුපියල් කෝටියක මුදලක් ද ඊට ඇතුළත් වේ.
කෙසේ වුවත් පාපන්දු සම්මේලනයේ ප්‍රධානීන්ට කෝප් කමිටුව උපදෙස් දී ඇත්තේ දැනට නීතිපතිවරයාගේ නිගමනය මත අත්හිටුවා තිබෙන සුනාමි ආධාර අවභාවිත කිරීමේ විමර්ශන නැවත ඇරඹීමේ හැකියාවක් පවතින්නේ නම් ඒ සඳහා කරුණු සොයා බලන ලෙසයි.
අප්‍රේල් 22 වැනිදා රැස්වීමේදී කෝප් කමිටුවේ විවේචනයට ලක්වූ පාපන්දු සම්මේලනයේ විධායක සභාවේ විශාල සංයුතිය 12 දෙනකුට සීමා කිරීමට කටයුතු කළ බව ඊයේ රැස්වීමේදී ශ්‍රී ලංකා පාපන්දු සම්මේලනයේ සභාපති ජස්වර් උමාර් මහතා පෙන්වා දී තිබේ.
ඒ සම්බන්ධයෙන් කෝප් කමිටුවේ සභාපති, පාර්ලිමේන්තු මන්ත්‍රී මහාචාර්ය චරිත හේරත් මහතා සිය ප්‍රසාදය පාපන්දු සභාපතිවරයාට පළකර තිබේ. සම්මේලනයේ අනුකමිටු ගණන පුළුල් කිරීම තමන්ට අදාළ නැතත් ඒවායෙහි ප්‍රධානීන් විධායක සභාවට පත් කිරීම සීමා කළ යුතු බවට එහිදී කෝප් කමිටුව අවධාරණය කර තිබේ.
ඊයේ රැස්වීමේදී කෝප් කමිටුව, ක්‍රීඩා අමාත්‍යාංශය හා පාපන්දු සම්මේලනයේ ප්‍රධානීන්ට වැඩිදුරටත් අවධාරණය කර ඇත්තේ පාපන්දු සංවර්ධන කටයුතු සඳහා මෙරටට ලැබෙන අරමුදල් නිසි කළමනාකාරීත්වයක් යටතේ රටේ සියලු දිස්ත්‍රික්කවලට සම සේ බෙදීයාමට කටයුතු කළ යුතු බවයි.
කෝප් කමිටුවේදී ඊයේ කතාබහට ලක්වූ කාරණා අතර ශ්‍රී ලංකා පාපන්දු සම්මේලනයේ ව්‍යවස්ථා සංශෝධනය ද විය. වසරක නිල කාලයක් සංවර්ධන කටයුතු සඳහා සම්මේලනයට ප්‍රමාණවත් නොවන බැවින් එය අන්තර්ජාතික පාපන්දු සම්මේලනයේ රෙගුලාසිවලට අනුකූලව සිව් වසරක් දක්වා වන නිල කාලයකට සංශෝධනය කිරීමේදී අවශ්‍ය සහයෝගය ක්‍රීඩා අමාත්‍යාංශයට ලබාදෙන ලෙසත් කෝප් කමිටුව ක්‍රීඩා අමාත්‍යාංශයේ ලේකම්වරයාට උපදෙස් දුන්නේය.
ක්‍රීඩා අධ්‍යක්ෂ ජනරාල් අමල් එදිරිසූරිය මහතා ඊයේ පැවති කෝප් කමිටුවේ රැස්වීම සම්බන්ධයෙන් මෙසේ පැවසීය.
“මීට කලින් කැඳවීම් ලබා සිටි මනිලාල් ප්‍රනාන්දු හා පාපන්දු සම්මේලනයේ හිටපු සභාපති අනුර ද සිල්වා මහතා අද රැස්වීමට කැඳවීම් නොලැබුවේ කෝප් කමිටුව සාමාන්‍යයෙන් කැඳවීම් කරන්නේ වර්තමානයේ තනතුරු දරන්නන්ට වීම නිසයි.
කෝප් කමිටුව ක්‍රීඩා අමාත්‍යාංශයට ලබාදුන් උපදෙස් ක්‍රියාත්මක කරනවා. ඒ අනුව මින් ඉදිරියට පාපන්දු සම්මේලනයේ මුල්‍ය කටයුතු පිළිබඳව දැඩි අවධානය යොමු කරනවා. ඒ වගේම විධායක සභාවේ සංයුතිය පාලනයට කටයුතු කරනවා. ව්‍යවස්ථා සංශෝධනය සඳහාත් අපේ ඉක්මන් සහයෝගය ලබා දෙනවා.”
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
