(කරන්දෙණිය එම්.සුසිල් ප්‍රියන්ත)
බටහිර ආසියානු කණිෂ්ඨ චෙස් ශූරතාවලියේ පිරිමි හා කාන්තා රන් පදක්කම් දෙකම ශ්‍රී ලංකාව විසින් දිනා ගන්නා ලදි.
කොළඹ නාලන්දා විද්‍යාලයේ ඉන්ටර් නැෂනල් මාස්ටර් ලොකුගේ සුසාල් ද සිල්වා පිරිමි රන් පදක්කම දිනාගත්තේය. කොළඹ විචර්ලි ජාත්‍යන්තර පාසලේ ෆිඩේ මාස්ටර් ඔෂිනි දේවින්ද්‍යා ගුණවර්ධන කාන්තා ඉසව්වේ රන් පදක්කම දිනා ගත්තාය.
ආසියානු හා ශ්‍රී ලංකා චෙස් සම්මේලන දෙක ඒකාබද්ධව සංවිධානය කරන ලද මේ තරගාවලිය ජූලි 16 සිට 21 දක්වා වස්කඩුව සිට්රස් හෝටලයේදී පැවැත්විණ.
තරගාවලිය සඳහා ශ්‍රී ලංකාව, ඉන්දියාව, කසකස්ථානය, කිරිකිස්ථානය යන රටවල් වල වයස 20 ට අඩු චෙස් ක්‍රීඩක, ක්‍රීඩිකාවෝ සහභාගීවූහ.
බටහිර ආසියානු කණිෂ්ඨ චෙස් තරගාවලියක් ලංකාවේ පැවැතා පළමු අවස්ථාව මෙයයි.
මේ තරගාවලියේ පිරිමි ශූරයාවූ කොළඹ නාලන්දා විද්‍යාලයේ ලොකුගේ සුසාල් ද සිල්වා තුන්වැනි වතාවටත් ජාතික චෙස් කිරුළ තමා සතු කර ගත් අතර ශ්‍රී ලංකාවේ දැනට සිටින ලාබාලතම ඉන්ටර් නැෂනල් මාස්ටර් තත්ත්වය හිමි ක්‍රීඩකයා ද වෙයි.ජාත්‍යන්තර චෙස් ක්‍රීඩා ශ්‍රේණිගත කිරීම් ඉහළින්ම සිටින ශ්‍රි ලාංකික ක්‍රීඩකයාය.
බටහිර ආසියානු කණිෂ්ඨ චෙස් ශූරතාවලියේ පිරිමි තරගාවලිය සදහා චෙස් ක්‍රීඩකයන් 12 ක් සහභාගි වූහ.
තරගාවලිය ආරම්භයේ සිටම ඉදිරියෙන් සිටි සුසාල් තරග ජාත්‍යන්තර ශ්‍රේණිගත කිරීම අනුව තරග ලයිස්තුවේ අංක එක හිමිකර ගෙන සිටි බංග්ලාදේශ චෙස් ක්‍රීඩකයා තරග වට පහේදී පරාජය කරමින් ද එම තරග ලයිස්තුවේම අංක දෙකේ කිරිගිස්ථාන ක්‍රීඩකයාට අවසන් තරග වටයේදී පරාජය වෙමින්ද සහ අංක තුන කිරිගිස්ථානයේ ක්‍රීඩකයා සමග තරගය ජය පරාජයෙන් තොරව නිමාවට පත් කර ගනිමින් තරගමින්ද අනෙක් ක්‍රීඩකයන් හය දෙනාම පරාජය කරමින් මුහුණදුන් තරග වට නවයෙන් ලකුණු 7ක් ලබාගෙන තරගාවලියේ රන් පදක්කම දිනා ගත්තේය.
කොළඹ විචර්ලි ජාත්‍යන්තර පාසලේ ඔෂිනි දේවින්ද්‍යා ගුණවර්ධන ශ්‍රී ලංකා ජාතික චෙස් කිරුළ තමා වෙත හිමිකරගෙන සිටින ලංකාවේ ලාබාලතම ජාතික චෙස් ශූරියද වන්නිය. දැනට ජාත්‍යන්තර ශ්‍රේණිගත ලකුණු අනුව ලංකාවේ පළමු ස්ථානය ඔෂිනි හිමිව ඇත.
කාන්තා තරගාවලිය සදහාද ක්‍රීඩිකාවන් 31ක් දෙනෙකු සහභීගීවූ අතර ජාත්‍යන්තර ශ්‍රේණිගත ලකුණු අනුව තරග ලයිස්තුවේ ඔෂිනිට හිමිව තිබූවේ අංක අට වැනි ස්ථානයයි.එහිදී ඇය තමාට වඩා ශ්‍රේණිගත ලකුණු වැඩි ඉන්දියාව,බංග්ලාදේශය,කසකස්ථානය,යන රටවල ක්‍රීඩිකාවන් පරාජය කරමින් මුහුණදුන් තරග වට නවයෙන් ලකුණු 7ක් ලබාගෙන කාන්තා ශූරතාව දිනා ගත්තාය.
තරගාවලිය කාන්තා,පිරිමි ලෙස තරග ඉසව් දෙකක් යටතේ පැවැත්වූ අතර මේ ඉසව් දෙකටම තරග කළ හැකිව තිබූවේ වයස අවුරුදු 20ට අඩු බටහිර ආසියානු රටවල ඉහළ ජාත්‍යන්තර ශ්‍රේණිගත ලකුණු හිමිකර ගත් ක්‍රීඩක ක්‍රීඩිකාවන්ට පමණි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
