(දමින්ද විජේසූරිය)
අන්තර්ජාතික රග්බි පිටියේ නවසීලන්ත සංකේතය වන ‘හකා නර්තනය’ ශ්‍රී ලාංකික රග්බි ලෝලීන්ට පියවි ඇසින් දැක ගැනීමේ අවස්ථාවක් මැයි මස මුල් සතියේදී උදාවෙයි. අන්තර්ජාතික රග්බි ශ්‍රේණිගත කිරීම් අතරේ 2 වැනි ස්ථානයේ සිටින නවසීලන්ත රග්බි ක්‍රීඩාවේ, කිලෝ ග්‍රෑම් 85 ට අඩු ක්‍රීඩකයන්ගෙන් සමන්විත නවසීලන්ත ජාතික රග්බි කණ්ඩායම මේ මස 30 වැනිදා දිවයිනට පැමිණෙයි. ශ්‍රී ලංකා රග්බි කණ්ඩායමේ හිටපු ක්‍රීඩකයකු වන ඉන්ති මරික්කාර් මහතා නවසීලන්ත රග්බි බලධාරීන්ගෙන් පසුගිය දෙසැම්බර් මාසයේදී කරන ලද ඉල්ලීමක ප්‍රතිඵලයක් ලෙසිනි.
කිලෝ ග්‍රෑම් 85 ට අඩු නවසීලන්ත කණ්ඩායම සහ ශ්‍රී ලංකාවේ ජාතික රග්බි කණ්ඩායම අතර තරග දෙකක් පැවැත්වේ. ඉන් පළමුවැන්න මැයි මස 4 වැනිදා නිත්තවෙල ක්‍රීඩාංගණයේදී පැවැත්වෙන අතර දෙවැනි තරගය මැයි මස 10 වැනිදා කොළඹ තුරඟ තරග පිටියේදී පැවැත්වෙයි.
බර කිලෝ ග්‍රෑම් 85 ට අඩු රග්බි ක්‍රීඩාව ආසියානු කලාපයේදී වෙනත් කිසිම රටක නොකෙරෙන්නකි. එහෙත් එය ලෝකයේ වෙනත් කලාපයන්හි ඉතාම ජනප්‍රිය මෙන්ම වේගවත් ක්‍රීඩාවකි. බර කිලෝ ග්‍රෑම් 85 ට අඩු රග්බි තරගාවලියක් ආසියානු කලාපයේ රටකදී පැවැත්වෙන මුල්ම අවස්ථාව ද මෙයයි.
තරගාවලියේ පූර්ණ අනුග්‍රාහකයන් වශයෙන් ‘ඩයලොග් ආසියාටා’ ඉදිරිපත් වී සිටින අතර තරග දෙකේම රූපවාහිනී විකාශය අයිතිය ද ‘ඩයලොග් ටෙලිවිශන්’ සහ ‘ද පපරේ ටී.වී.’ වෙතින්
නවසීලන්තයෙන් පැමිණෙන කණ්ඩායම කිලෝ ග්‍රෑම් 85 ට අඩු ක්‍රීඩකයන්ගෙන් සමන්විත නමුත් ශ්‍රී ලංකා කණ්ඩායම බර පංතිය පිළිබඳ සීමාවකින් තොර ක්‍රීඩකයන්ගෙන් සමන්විත වේ. කෙසේ වෙතත් ශ්‍රී ලංකා කණ්ඩායමේ ‘ප්‍රොප් ෆොවර්ඩ්’ ක්‍රීඩකයන් පමණක් කිලෝ ග්‍රෑම් 105 ට අඩු ක්‍රීඩකයන්ගෙන් සමන්විත විය යුතු යයි එකඟතාවකට පැමිණ ඇත්තේ නවසීලන්ත ක්‍රීඩකයන් තුවාල ලැබීමෙන් ආරක්‍ෂා කරගැනීමේ අරමුණ ඇතිවය.
ලෝක රග්බි සංගමයේ ශ්‍රේණිගත කිරීම් අනුව ශ්‍රී ලංකාව 40 වැනි ස්ථානයේ සිටින අතර හිමි ප්‍රසාද ලකුණු සංඛ්‍යාව 47.39 කි. ශ්‍රේණිගත කිරීම් අතරේ දෙවැනි ස්ථානයේ සිටින නවසීලන්තය සතු ප්‍රසාද ලකුණු සංඛ්‍යාව 90.36 කි. ආසියානු කලාපයේදී ශ්‍රී ලංකා කණ්ඩායමට ශ්‍රේණිගත කිරීම් අතරේදී පස් වැනි ස්ථානය හිමිවී තිබේ.
ආසියාවේ පැරණිතම රග්බි සංගමය ලෙසින් සැලකෙන ශ්‍රී ලංකා රග්බි සංගමයේ ආරම්භය 1908 දක්වා ඈතට දිවයයි. 1879 දී ආරම්භ කරන ලද කොළඹ පාපන්දු සමාජය ශ්‍රී ලංකාවේ පළමු වැනි රග්බි ක්‍රීඩා සමාජය ලෙසින් සැලකේ. ත්‍රිත්ව විද්‍යාලයෙන් පැමිණි එමානුවෙල් ලුවි බ්ලේස් විසින් 1893 දී මහනුවර කිංග්ස්වුඩ් විද්‍යාලය රග්බ ක්‍රීඩාව හඳුන්වා දෙන ලද අතර ශ්‍රී ලංකාවේ පළමු වන පාසල් රග්බි තරගය මෙම විදුහල් දෙක අතර 1906 දී පැවැත්වී තිබේ.
ශ්‍රී ලංකාවේ පැරණිතම අන්තර්ජාතික රග්බි තරගය ලෙසින් වාර්තා වන්නේ 1907 දී ශ්‍රී ලංකාවට (එවකට ලංකාව) පැමිණි නවසීලන්ත ‘ඕල් බ්ලැක්ස්’ කණ්ඩායමට එරෙහිව පැවැති තරගයයි. තරගාවලියක් සඳහා එංගලන්තයට යමින් සිටිදී, විවේකයක් ලබාගැනීම සඳහා කොළඹ වරායට ගොඩ බට නවසීලන්ත කණ්ඩායමත් ලංකා කණ්ඩායමත් අතර පැවැති තරගයේදී නවසීලන්ත ක්‍රීඩකයෝ 33-6 ක ජයක් අත් කරගත්හ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
