(ශානුක අරවින්ද සාජා ක්‍රිකට් ක්‍රීඩාංගණයේ සිට..)
කාන්තා ලෝක කුසලාන ක්‍රිකට් තරගාවලියේ 9 වැනි තරගය ලෙස එංගලන්තය සහ දකුණු අප්‍රිකාව අතර සාජා ක්‍රිකට් ක්‍රීඩාංගණයේදී අද (7 වැනිදා) පැවැති තරගයෙන් කඩුලු 7 ක ජයක් වාර්තා කිරීමට එංගලන්ත කාන්තා කණ්ඩායම සමත් විය.
ජයග්‍රහණය සඳහා ලකුණු 125 ක ඉලක්කයක් හඹාගිය එංගලන්ත ක්‍රීඩිකාවෝ ඕවර 19.2 ක් අවසානයේ කඩුුලු 3 ක් දැවී ඉලක්කය සපුරාගත්හ. නටාලි සීවර් පන්දු 36 කදී හතරේ පහර 6 ක් සමග නොදැවී ලකුණු 48 ක් රැස්කරමින් එංගලන්ත කණ්ඩායමේ ජයග්‍රහණය තහවුරු කළාය.
එංගලන්ත කණ්ඩායමට සාර්ථක ආරම්භයක් ලබාදුන් ආරම්භක පිතිකාරිණී ඩැනියෙල් වයට් පන්දු 43 කින් ලකුණු 43 ක් රැස්කළේ හතරේ පහර 4 ක් සමගිනි. ඒ සඳහා ඇයට අනගි සහායක් දුන් ඇලිස් කැප්සේ පන්දු 16 කදී හතරේ පහර 3 ක් සමග ලකුණු 19 ක් රැස්කළාය.
කාසියේ වාසිය දිනා පළමුවෙන් පන්දුවට පහරදුන් දකුණු අප්‍රිකානු ක්‍රීඩිකාවෝ ඕවර 20 අවසානයේ කඩුලු 6 ක් දැවී ලකුණු 124 ක් ලබාගත්හ. දකුණු අප්‍රිකානු ඉනිමේ වැඩිම ලකුණු ලාභිණිය බවට පත්වූ නායිකා ලෝරා වුල්වාඩ්ට් පන්දු 39 කදී හතරේ පහර 3 ක් සමග ලකුණු 42 ක් රැස්කරමින් සිය කණ්ඩායමට සාර්ථක ආරම්භයක් ලබා දුන්නාය.
දකුණු අප්‍රිකානු කාන්තා පිල - ඕවර 20 කදී කඩුලු 6 ක් දැවී 124
(ලෝරා වුල්වාඩ්ට් 42, ඇනීක් බොස්ච් 18, මරිසේන් කැප් 26, ඇනෙරි ඩාක්සන් නොදැවී 20, සොෆී එක්ලෙස්ටෝන් 15/2)
එංගලන්ත කාන්තා පිල - ඕවර 19.2 කදී කඩුලු 3 ක් දැවී 125
(ඩැනියෙල් වයට් 43, ඇලිස් කැප්සේ 19, නටාලි සීවර් නොදැවී 48)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
